Свет
(Видео) Норвешката полиција ќе интервенира против навредата на верските симболи
Ново толкување на Законот за говор на омраза во Норвешка, делумно втемелено на стравот од одмазда, значи дека полицијата ќе интервенира против навредата на верските симболи, како што е Куранот, пренесува „Спутник“.
Неодамнешниот пример на горење на Куранот од страна на „Стоп за исламизацијата на Норвешка“ (СИАН) во градот Кристијансанд, прв во Норвешка, иницираше жестока дебата за прифатливоста на ваквите активности и за судирот меѓу слободата на говорот и слободата на религија.
Полицијата на крајот интервенирала и го прекинала протестот на СИАН по тепачката меѓу активистите и нивните противници, постапувајќи по новата експлицитна наредба од полицискиот директор Бенедикт Бјорнланд, објави норвешкиот радиодифузер НРК.
„Повредата на Куранот, во даден контекст, може да биде повреда на делот за говорот на омраза од Кривичниот законик“, рече Бјорланд.
Тој посочи дека случаите на палење на сите религиски симболи мора да се третираат подеднакво и правилно.
Kortversjonen av koranbrenningen
✌ @Sian @EdbRegadog pic.twitter.com/i9DtfBLfnB— Lena Andreassen (@AndreassenLena) November 18, 2019
„Пораката е: ако сé уште го правите тоа, ние ќе ве спречиме. Секој треба да зборува сè додека не ги крши законите, во случајов Кривичниот законик. Ние не сме полиција за мислење, но имаме насоки и кога ќе видиме кршење на дадените упатства, интервенираме“, рече Бјорланд, признавајќи дека оценката дали да се интервенира во слободата на изразување и собирање е сериозен проблем.
Важна причина за новото толкување е проценката на заканата од Полициската служба за безбедност (ПСТ) дека јавното палење на Куранот би можело да доведе до сериозни одмазднички напади против Норвешка.
„Точно е дека во последните месеци ПСТ се загрижени за последиците што палењето на Куранот може да ги има. Ние го гледаме тоа како иницијална каписла за насилни дејства и ѝ дадовме опис на состојбата на полицијата “, рече високиот советник на ПСТ, Мартин Берсен.
Сепак, полициската наредба не е насочена само кон антиисламските провокации туку кон уништување на сите видови религиски симболи. По демонстрациите во Кристијансанд, еден член на СИА беше уапсен за непочитување на полициските наредби. Градоначалникот на Кристијансанд, Харалд Фуре, кој беше присутен за време на демонстрациите на СИАН, ги осуди дејствата.
„Посакувам полицијата да интервенираше порано и да го спречеше палењето“, рече Фуре.
Началникот на полицијата во областа Агдер, Мортен Сјустул, ги нарече ваквите дејства контроверзни, нагласувајќи дека тие предизвикуваат силен ангажман.
Лидерот на СИАН, Ларс Торсен, ја нарече акцијата добар начин да се визуелизира негативната моќ на исламот и јасно стави до знаење дека не треба да се исклучат повторувања на настаните.
„Стоп за исламизација на Норвешка“ датира од раните 2000 и тврди дека се спротивставува на ширењето на исламот зашто смета дека е тоталитарна политичка идеологија што ги крши норвешкиот Устав и демократските и човечките вредности.
Торсен не е непознат за политичките контроверзии откако неодамна доби казна затвор во траење од 30 дена и парична казна за дистрибуција на памфлети во главниот град на Норвешка во кои ги нарече муслиманите озлогласени сексуални предатори кои силуваат во епидемиски размери“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.
Свет
Нетанјаху: Ако Евреите не се заштитат самите, никој нема да ги заштити
Евреите мора да бидат способни да се „одбранат“ бидејќи никој нема да ги заштити, изјави денеска израелскиот премиер Бенјамин Нетанјаху, додека се повеќе се креваат гласови против војната што Израел ја води во Појасот Газа.
„Ако треба да се браниме, ќе се браниме. Ако е можно да се мобилизираат „оние што не се Евреи“, тоа е добро. Но, ако не се заштитиме, никој нема да го направи тоа“, рече Нетанјаху.
Премиерот ова го изјави на приемот на преживеаните од нацистичкиот геноцид кои во недела ќе учествуваат на церемонијата на Денот на сеќавањето на Холокаустот во меморијалниот центар Јад Вашем.
Разорната војна што Израел ја започна во Појасот Газа како одмазда за нападот на палестинското движење Хамас на 7 октомври во Израел предизвикува зголемени критики ширум светот.
Осврнувајќи се на студентското движење во знак на солидарност со Палестинците во градовите на американските колеџи, Нетанјаху рече дека ги осудува „страшните демонстрации на антисемитските орди кои повикуваат на уништување на Израел и ги напаѓаат еврејските студенти и професори“.
Нетанјаху, исто така, се соочува со отворено меѓународно противење на неговата намера да започне голема офанзива врз градот Рафах, во јужниот дел на Појасот Газа.
Тоа е засолниште за еден и пол милион Палестинци, од кои огромното мнозинство се раселени поради војната, додека израелските власти сметаат дека градот е последното упориште на борците на Хамас.
Свет
Трамп: Погледнете ги Лондон и Париз, тие се непрепознатливи
Поранешниот американски претседател Доналд Трамп изјави за време на предизборниот митинг во Висконсин дека Лондон и Париз се „непрепознатливи“, пренесува „Politico“.
„Видовме што се случи кога Европа ги отвори вратите за џихад. Погледнете го Париз, погледнете го Лондон. Тие се непрепознатливи“, рече Трамп, кој ќе се кандидира за нов мандат во Белата куќа на претседателските избори во ноември годинава.
„Ќе влезам во многу проблеми со луѓето во Париз и луѓето во Лондон, но знаете што, тоа е факт. Тие се непрепознатливи и не можеме да дозволиме тоа да и се случи на нашата земја. Имаме неверојатна култура, традиција. Не можеме да дозволиме тоа да се случи овде и никогаш нема да дозволам да им се случи на Соединетите Американски Држави“, рече тој.
Трамп често ги критикуваше европските земји. Во декември 2015 година, набргу откако Париз беше погоден од смртоносен исламистички терористички напад, тој рече дека населбите во Париз и Лондон се толку опасни што полицијата одбила да оди таму. Во тоа време, Трамп го бранеше својот план „целосно да им забрани на муслиманите да влезат во САД“.
И покрај тоа што беше критикуван за тие забелешки, Трамп продолжи да ја брани својата позиција. „Вистинскиот Париз е различен од Градот на светлината за кој читате. Има области во Париз каде луѓето се толку радикализирани и толку злобни, што полицијата одбива да оди таму. Тие нема да одат таму. Тоа ќе се случи на нашата земја“, предупреди тој.
Во јануари 2016 година тој изјави дека животот во Брисел е како да живееш во „пекол“ поради недостаток на „асимилација“ на муслиманското население.