На самитот на Европската народна партија во Загреб се случи целосен меѓународен пораз на лажните и лицемерни политики на Мицкоски и ВМРО-ДПМНЕ. Не само што се покажа дека едно зборува пред граѓаните, а друго надвор од државата, туку и јавно, пред камерите, на клучните стратешки теми Мицкоски доживеа дебакл. Тоа е очекувано затоа што Мицкоски нема свој став, туку работи под диктат на Никола Груевски, изјави Бојан Маричиќ, претседател на Комисијата на СДСМ за европски прашања.

Според него, дури и Европската народна партија, каде што членка е ВМРО-ДПМНЕ и има право на глас, во донесената резолуција од загрепскиот самит констатира дека ЕУ со неносењето одлука за почеток на преговорите направила историска, геостратешка грешка.

„Тоа е потврда дека ние ги направиваме реформите што беа потребни, дека сè што требаше испорачавме, но дека одлуката на ЕУ е поради внатрешни проблеми во самата Унија, како што потврдија и највисоките челници на ЕУ.

Оваа резолуција е врела шлаканица за Мицкоски и ВМРО-ДПМНЕ, кои виновници бараа внатре во земјата. Се покажа уште еднаш дека целиот демократски свет ги препознава реформите и успесите, дека сите важни фактори и претставници во ЕУ се за тоа да почнеме преговори, само Мицкоски навива против напредокот на нашата татковина во евроинтеграциите“, додаде тој.

Според Маричиќ, радоста на Мицкоски дека биле во право оние што ја блокирале нашата земја очигледно заврши неславно и тоа на негов терен.

„Додека дома Мицксоки вели дека не го признава уставното име на државата, граѓаните видоа дека нема проблем неговата ВМРО-ДПМНЕ во Европската народна партија да биде претставничка од Република Северна Македонија. Самитот во Загреб го разоткри целиот лажен патриотизам, го разоткри целото лицемерство на Мицкоски и ВМРО-ДПМНЕ.

На самитот на Европската народна партија, Мицкоски го поддржа договорот со Бугарија за кој велеше дека е штетен за националните интереси, ги призна уставното име и договорот од Преспа. Мицкоски се премисли за сè за што зборуваше во изминатите две години и го одрече за две минути. Толку од искреноста, честитоста и доследноста во ставовите за кои зборува Мицкоски. Затоа, граѓаните на 12 април ќе го казнат неговиот нечесен и лицмерен однос и ќе пoтврдат дека државата е на прав пат“, додаде тој.