Македонија
(Видео) Арсовски: Јанева е пуштена по налог на Заев за да не пропее за вмешаноста на власта во „Рекет“
„Шест месеци сме сведоци на правосудна фарса што ни се случува во делот околу случајот ‘Рекет’. Шест месеци пред очите на јавноста се случува класична лакрдија со една цел, а тоа е да се заштити криминалот на власта и на СДСМ.Катица Јанева беше пуштена од притвор со најсмешните образложенија во одлуката на кацарска-судството“, изјави Димче Арсовски, портпарол на ВМРО-ДПМНЕ.
„Замислете, во одлуката велат дека Катица Јанева е невработена и без имот. Зошто сето ова е небулозно? Катица Јанева има куќа во Гевгелија од 371 метар квадратен, нејзиниот син има стан во Скопје и нејзината ќерка има стан во Скопје, со големина од 72 и 68 метри квадратни. Значи Катица Јанева очигледно има имот, а ја носат во домашен притвор кај нејзиниот син, кој исто така има кривична пријава за случајот со рекетирање и очигледно е дека може да си влијаат еден на друг.
Она што исто така е смешно е дека Катица Јанева ја рангираат како самохрана мајка, Катица Јанева всушност е мајка на две полнолетни деца. Исто така смешно и лудо е да велиш дека Катица Јанева е невработена, односно без приходи, а да ја товариш со дело со кое стекнала противправна финансиска вредност, каде што најверојатно се здобила со стотици илјади евра рекетирани и притоа парите да не се пронајдени, што значи дека сè уште се кај неa или таа знае каде се“, додаде тој.
Според Арсовски, Катица Јанева за 4 години има заработени над 260.000 евра регуларни од СЈО, од кои само 157.000 евра како додаток за доверливост од СЈО, односно да не го изнесува јавно она што го слушнала во бомбите.
„Оттука очигледно е дека Катица Јанева е пуштена по налог на Зоран Заев само за да не пропее за вмешаноста на политичкиот врв на СДСМ и власта во случајот ‘Рекет’. Сето она што го имаше кажано Апелација пропаѓа во вода. Јавното обвинителство, Вилма Русковска и Љубомир Јовевски, поттрчкото на Зоран Заев, глумат театар за јавноста и пред јавноста дека се револтирани од одлуката и притоа Вилма Русковска се заканува со СМС-пораки до судиите за да одглуми браник на правдата и жртва, а таа целиот овој период ја водеше истрагата во корист на Катица Јанева и Заев.
Замислете што ќе се случува во иднина ако стане пракса странка во предмет, како што е Русковска, да се заканува до судиите. Странки се и адвокатите и сведоците и сите останати освен Судот, а притоа знаеме дека истата таа Русковска ѝ дозволи на Катица Јанева да брише докази, да форматира компјутери и да ги чисти трагите за случајот ‘Рекет’. Ова е руинирано Луј Витон-судство и обвинителство, по примерот на Кацарска и Русковска ко што се пример за заштитници на криминалот.За сите овие работи што се случуваат еден ден некој ќе треба да одговара и да сноси одговорност.Потребна е темелна и суштинска обнова на правосудниот систем, а тоа ќе се случи по 12 април по доаѓањето на ВМРО-ДПМНЕ на власт“, истакна Арсовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денеска сончево и топло, промена на времето со пороен дожд и грмежи од први мај
Управата за хидрометеоролошки работи информира дека времето денеска ќе биде сончево и релативно топло со мала до умерена локална облачност. Ќе дува слаб до умерен ветер претежно од североисточен правец. Минималната температура ќе биде во интервал од 3 до 10, а максималната ќе достигне од 21 до 27 степени Целзиусови.
Во Скопје ќе биде сончево и релативно топло со мала облачност и со слаб североисточен ветер. Минималната температура ќе се спушти до 8, а максималната ќе достигне до 26 степени, велат од УХМР.
Стабилното и суво време, сепак, нема да се задржи долго. Веќе од средината на следната седмица, повторно се очекува дожд.
Промената на времето ќе започне уште во среда, на први мај, кога во попладневните часови ќе има услови за локална појава на краткотраен пороен дожд и ретки грмежи. Поголема нестабилност со дожд и чести грмежи се очекува во четврток.
Македонија
Апасиев од Тетово: Под власта на учките од ДУИ, поддржани од корумпираната македонска елита, секое второ дете од Полог се раѓа во Швајцарија
,,Етнотрибализмот ни го сервираат како европска вредност. Ние создадовме општество на квоти, коешто ни донесе секое второ дете од Полог да се раѓа во Италија, во Швајцарија или надвор од Македонија“, вели претседателот на Левица, Димитар Апасиев.
„Првиот концепт кој што ни го нудат е концептот на дејтонизација. Либанизација на Македонија, бејрутизација на Скопје. Тоа е нивната агенда, спонзорирана од западните амбасади. Ни понудија модел на бинационален грабеж.
Ние сме единствена земја во светот со еден Парламент и две Влади. Но помина времето кога Македонецот беше инфериорен во сопствената држава. Левица е принципиелно против Бадентер и против Балансер“, истакна претседателот на Левица, Димитар Апасиев.
Македонија
Мицкоски: СДСМ и ДУИ имаа две сценарија, прво, тивок бојкот за претседателските избори, второ, Ахмети добил бел лист од Ковачевски да напише што сака
Државата ни ја одземаа. Народот изгуби контрола над системот, институциите се киднапирани од стотина души на ДУИ кои управуваат со се. Додека тие од СДСМ им се верни слуги во секој криминал и тендер. И навистина е лицемерно од ДУИ и СДСМ да велат дека носеле храбри одлуки што е храброст да продадеш име, устав, да проблематизираш историја, и повторно да бидеш пред портите на ЕУ. Затоа што и тие од ЕУ знаат дека криминалци владеат со државата, рече Христијан Мицкоски, претседател на ВМРО-ДПМНЕ на вчерашниот митинг во Кочани.
Мицкоски укажа дека од СДСМ и ДУИ се подготвени на се за да ги задржат фотелјите и привилегиите.
„Затоа излезот го бараат во двете сценарија. Првото е тивкиот бојкот за претседателсите избори кој го заговараат. Додека се удираат во гради дека ќе згазеле во вториот круг, всушност тие сакаат да одработуват на тивок бојкот и спласнување на атмосферата на изборите. Второто сценарио е она на Ковачвски кој ја дал најдарежливата понуда до Али Ахмети. Ахмети има добиено бел лист на хартија од Ковачевски на кој само треба да ги напише институциите и министерствата кои сака да ги добие“, кажа Мицкоски.
Мицкоски порача дека излезот од сето ова е масовна излезност на изборите, како и масовна и недвосмилена поддршка за ВМРО-ДПМНЕ која е единствената сила за промени.
„Таа поддршка ни е потребна и за да нема уцени, ниту притисоци. Да имаме сила за промени, а таа сила можете само вие да ја дадете, народот на Македонија. Во првиот круг тука победата беше убедлива. 8079 гласа на 3900 за поранешнот претседател Пендаровски. Сега поддршката нека биде уште поголема за да може да жолтиот картон од првиот круг да биде црвен. Имаме незавршена работа, која ќе се финализира со огромна победа на 8 мај“, изјави Мицкоски.
Мицкоски се обрати и до неопределените, како и оние кои гласаа за кандидатите кои не се дел од вториот круг.
„Цунамито не огромниот бран на промени е започнат. Приклучете се и бидете дел од оваа генерација која одучува за сопствената иднина. Има надеж и ние заедно ќе се избориме. Сите оние кои пак во првиот круг гласаа за некој од другите опозициски кандидати кои сега се надвор од трката за претседател. Дојдете и поддржете ја единствената и главната сила за промени Гордана Силјановска Давкова и ВМРО-ДПМНЕ. Да не се ситнат промените. Приклучете се таму каде што е огромното мнозинство кое ја носи новата надеж за иднината на државата“, кажа Мицкоски.
Мицкиски на крајот им порача на граѓаните. „Ова не е Македонија што ја сакаш и ја заслужуваш. Овие избори се последна шанса за спас. Ширете ја пораката на промените. Тоа не се промени за освети не се промени за поделби. Тоа се промени во кои надежта го победува стравот. Заедништвото ги победува поделбите“.