Свет
Почнаа да работат првите камери што фаќаат возачи што користат телефон зад воланот

Австралиската држава Нов Јужен Велс во неделата ги претстави камерите за детектирање висока дефиниција дизајнирани да ги фатат возачите што користат мобилни телефони зад воланот.
Ендру Констанс, министер за патишта на Нов Јужен Велс, рече дека технологијата – прва од ваков вид во светот – ќе таргетира нелегални телефонски повици преку фиксни и мобилни камери. Камерите ќе користат вештачка интелигенција за прегледување слики и откривање нелегална употреба на мобилен телефон, објави Си-ен-ен.
Фотографиите што камерата ги идентификува го содржат возачот додека остварува телефонски повици зад воланот, а потоа тие ќе бидат проверени од овластен персонал, изјавија официјални лица додавајќи дека сликите што ќе ги направи системот ќе бидат чувани на безбедно.
Во текот на следните три години државните власти ќе распоредат 45 преносни камери на непознати локации и без знаци на предупредување. Првите три месеци непослушните возачи фатени од камерата ќе добијат предупредувачки писма, а по тој период, ќе бидат казнети со глоба до 344 долари, односно 457 долари во училишна зона, или ќе бидат казнети со поени во возачката дозвола.
„Владата на Нов Јужен Велс е сериозна во врска со намалувањето на жртвите на патот, а камерите што откриваат мобилни телефони се еден од начините да го сторат тоа“, рече Констанс.
Официјалните претставници посочија дека над 100.000 возачи што користеле мобилни телефони додека управувале со возило биле фатени за време на пробата на новиот систем претходно оваа година. Речиси 329 лица загинаа во сообраќајни несреќи во Нов Јужен Велс оваа година, а во 2018 година загинаа 354, според официјалната статистика. Владата сака смртните случаи на патиштата да ги намали 30 проценти до 2021 година.
Зборувањето преку мобилен телефон за време на возењето е нелегално во Нов Јужен Велс, но дозволено е користење безжична технологија (слушалки). Употребата на други функции, вклучувајќи ги социјалните мрежи, видеоповиците, фотографирање и слушање музика, е дозволено само доколку возилото е паркирано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон со најава: ќе го забрани пристапот до социјални мрежи за деца под 15 години

Претседателот на Франција, Емануел Макрон, објави дека ќе го забрани пристапот до социјалните мрежи за деца под 15 години доколку наскоро не се постигне напредок по ова прашање на ниво на Европската унија.
Оваа одлука следеше по вчерашниот смртоносен напад од страна на ученик врз 31-годишен училишен надзорник пред основно училиште во градот Ножан.
„Не можеме повеќе да чекаме“, рече Макрон во телевизиско обраќање на каналот „Франс 2“, пренесува бриселски „Политико“.
Тој истакна дека прекумерната употреба на социјалните мрежи меѓу децата е фактор на ризик и дека воведувањето контрола на старосната граница би можело да помогне во заштитата на младите луѓе.
Грција, со поддршка на Франција и Шпанија, веќе предводи иницијатива во рамките на ЕУ за ограничување на времето што тинејџерите го поминуваат на интернет, но Макрон сака Франција да преземе мерки дури и пред евентуалната заедничка европска одлука.
Макрон, исто така, најави дополнителни безбедносни мерки, вклучително и проверка на возраста на корисниците на веб-страниците што продаваат ножеви преку интернет.
Тој најави големи казни и забрани за сајтовите што не се придржуваат.
„Петнаесетгодишник повеќе нема да може да купи нож преку интернет“, рече претседателот.
Францускиот премиер Франсоа Баиро претходно изјави дека сака да ја забрани продажбата на какви било ножеви на малолетници.
Француските власти веќе преземаат чекори за да ги обврзат платформите како што се Ix, Reddit и Bluskaj да применуваат проверки на возраста, третирајќи ги како сајтови со содржина за возрасни.
Во Франција, на 7 јуни, стапија во сила мерките што ги обврзуваат порнографските сајтови да ја потврдат возраста на корисниците.
Како резултат на тоа, сајтот „Pornhub“ престана да работи во земјата, што предизвика ненадејно зголемување на употребата на VPN услуги што ја заобиколуваат геолокацијата, пренесува Танјуг.
Свет
Нов аларм во Грац: само неколку часа по масакрот во училиштето, пристигнаа заканувачки повици

Во вторникот наутро, Грац беше шокиран од веста за масакрот во училиштето, каде што напаѓачот убил 10 лица, а потоа извршил самоубиство, а само неколку часа подоцна имаше нов аларм.
Како што пишува „Кронен“, само неколку часа по масовното убиство во училиштето, имитаторите го искористиле пукањето како изговор за да упатат закани.
Имено, друга гимназија во Грац добила заканувачки повик во вторникот вечерта, изјави Франц Руф, генерален директор за јавна безбедност.
Закана била испратена и до централната станица во Грац во вторникот попладне, пишува „Кронен“ и додава дека истрагите за овие закани се во тек.
Свет
Руски амбасадор: Обновувањето на односите меѓу САД и Русија го забавува „длабоката држава“ во Америка

Разговорот меѓу САД и Русија за решавање на прашањата во нивните билатерални односи ќе биде преместен од Истанбул во Москва, изјави денес за ТАСС новиот руски амбасадор во Вашингтон.
„Сè уште има долг пат за обновување на руско-американските односи“, рече амбасадорот Александар Дарчиев.
Според него, зближувањето со Москва го забавуваат таканаречената „длабока држава“ во САД и антируските „јастреби“ во Конгресот.
„Можам да потврдам дека во блиска иднина во Москва ќе се одржат нови разговори на делегации“, рече Дарчиев.
Војната во Украина предизвика најголеми тензии во односите меѓу Москва и Западот од Студената војна. Искусни дипломати од Москва и Вашингтон изјавија за Ројтерс во 2024 година дека не можат да се сетат дека односите некогаш биле полоши.
Администрацијата на претседателот Доналд Трамп го смета украинскиот конфликт за посредничка „proxy“ војна меѓу САД и Русија. Трамп постојано предупредуваше на ризикот од ескалација на конфликтот во светска војна.