Катар синоќа потврди дека една иранска ракета ја погодила американската воздухопловна база Ал Удеид на нејзина територија без да предизвика жртви или штета, додека останатите проектили биле пресретнати и паднале во морето, јавува „Анадодлија“.

Оваа информација ја потврди заменик началникот на Генералштабот на вооружените сили на Катар Шаек ал Хајри за време на прес-конференција во Доха.

Првиот бран вклучувал седум проектили, од кои сите биле пресретнати и паднале во морето пред да стигнат до нивната цел. Вториот бран се состоел од 11 ракети, од кои само една ја погодила базата без жртви или материјални загуби, додека останатите ракети биле соборени, додаде тој.

Говорејќи на истиот брифинг, портпаролот на катарското Министерство за надворешни работи, Маџед ал-Ансари рече дека земјата го обезбедила својот воздушен и поморски простор, како одговор на иранските закани дека ќе ги таргетираат американските бази во регионот.

Иран лансираше низа проектили врз американската воздухопловна база Ал Удеид во Катар, што означи драматична ескалација на тензиите откако САД извршија напади врз три нуклеарни постројки во Иран во неделата.

Регионалните тензии нагло ескалираа во неделата откако САД бомбардираа три ирански нуклеарни постројки во Фордо, Натанц и Исфахан.

Американските напади се најновата ескалација на израелските напади врз Иран кои започнаа на 13 јуни, што го натера Техеран да возврати на Израел.

Американскиот претседател, Доналд Трамп, на социјалната мрежа „Трут соушал“ се огласи по повод иранските напади врз американската база во Катар.

Тој го опиша нападот како многу слаб одговор што САД го очекувале и ефикасно го одбиле.

„Истрелани се 14 проектили – 13 од нив се соборени, а 1 е пуштен, бидејќи отишол во ненасочен правец“, додаде тој.

„Задоволство ми е да известам дека ниту еден Американец не е повреден и дека е причинета минимална штета.

Тој додаде: „Најважно од сè е што изгледа дека ‘се испразнија’ и, се надеваме, нема да има понатаму омраза. Му благодарам на Иран што ни даде однапред известување, што овозможи да нема жртви или повредени. Можеби Иран сега може да се движи кон мир и хармонија во регионот, а јас со задоволство ќе го охрабрам Израел да го стори истото“.

Трамп рече и дека покрај фактот што ниту еден Американец не е убиен или ранет, подеднакво е важно што нема ниту загинати или ранети Катарци.

Американскиот претседател порача дека е време за мир.

Ниту еден обид за заобиколување на консензусот од 2022 година за Северна Македонија нема да биде успешен. Европскиот парламент нема надлежност да изразува мислење за прашања како што се идентитетот, јазикот и слични формулации, изјави во Брисел министерот за надворешни работи на Бугарија Георг Георгиев, пренесуваат бугарските медиуми.

„Засрамени сме од фактот што политичарите предвидуваат развој на настаните во врска со извештајот, од мешањето на земја-кандидат во работата на ЕП. Нашите европратеници работат исклучително активно. Она што зависи од извршната власт и комуникациите што таа може да ги спроведува – исто така.“

Тој истакнува дека ваквите разговори како оние на Мицкоски, можат да имаат само краткорочен популистички резултат, нагласувајќи дека пристапувањето кон Европската Унија се заснова на принципи, вредности и одговорности.

„Европскиот парламент нема надлежност да изразува мислење за прашања како што се идентитетот, јазикот и слични формулации. Европските институции не треба да се користат за инструментализирање на една или друга политика. Ниту еден обид за заобиколување на консензусот од 2022 година нема да биде успешен, бидејќи ќе наиде на решителен отпор од Бугарија. Од разговорите со другите колеги, нема земја-членка на ЕУ што би отстапила од она што беше постигнато тогаш. Консензусот останува валиден. Ние ја почитуваме работата на ЕП на извештајот, но тој нема меѓународно правно обврзувачка природа. Секој кандидат мора да ги почитува условите на сите земји-членки“, објасни Георгиев.

„Сакам да ги уверам бугарските граѓани и сите заинтересирани за процесот дека го охрабруваме процесот на проширување, но тој мора да се базира на сопствените заслуги“, додаде тој.