Свет
Шведска лекарка ја врати Нобеловата награда за мир како протест поради Хандке

Шведската лекарка и писателка Кристина Доктаре, која ја доби Нобеловата награда за мир во 1988 година како членка на мировните сили на ОН, ја врати наградата во знак на протест поради доделување на Нобеловата награда за литература на австрискиот писател Петер Хандке.
Швеѓанката како лекарка на ОН во 1992 година прва проговори за систематските силувања за време на војната во Босна и Херцеговина и укажала што се случува. Синоќа таа се обрати пред стотици лица собрани во Стокхолм во знак на протест против одлуката на Шведската академија да му го врачи признанието на Австриецот, кој за време на војните во поранешна Југославија го поддржуваше режимот на Слободан Милошевиќ и кој отворено негира дека во Сребреница се случил геноцид.
„Му честита и му ја даде наградата. Сега јас мојата ќе ја вратам“, изјави таа пред насобраните покажувајќи го медалот в рака. Насобраните гласно ѝ аплаудираа и го извикуваа нејзиното име.
Таа се присети на војните на Балканот, од каде што известувала и укажувала на злосторствата што се случуваат. Таа зборуваше за смрдеата на распаднатите тела и ужасите на кои сведочела.
„Додека сум жива, ќе сведочам за вистината за ужасната војна никогаш да не биде негирана“, потенцира нобеловката Доктаре.
Австрискиот писател Питер Хандке синоќа ја доби Нобеловата награда за литература во Стокхолм, а пред зградата се одржува протест. Годинешниот добитник на Нобеловата награда за литература е познат по своите контроверзни ставови за тоа што се случи во регионот, односно го негира геноцидот во Сребреница и повика на одбрана на Слободан Милошевиќ, поранешниот претседател на Србија и обвинет за воени злосторства во Хаг.
За време на доделувањето на Нобеловата награда се одржа голем протест против Шведската академија и одлуката годинешниот лауреат да биде контроверзниот австриски писател Питер Хандке.
Речиси сите балкански земји одлучија да го бојкотираат вечерашното доделување на Нобеловата награда за литература на австрискиот писател Петер Хандке поради неговата поддршка на Милошевиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Гор: „Администрацијата на Трамп е како нацистичка Германија“

Поранешниот потпретседател на Соединетите Американски Држави, Ал Гор, ја спореди администрацијата на Доналд Трамп со нацистичка Германија.
Зборувајќи на митингот по повод почетокот на Неделата на климата во Сан Франциско, тој рече дека администрацијата на Трамп се обидува да создаде своја преферирана верзија на реалноста со цел да ги постигне своите сеопфатни цели слични на Нацистичката партија на Адолф Хитлер во 1930-тите и 1940-тите, објавува „Политико“.
„Многу добро разбирам зошто е погрешно да се споредува Третиот рајх на Адолф Хитлер со кое било друго движење. Тоа беше уникатно зло, точка. Сфаќам. Но, постојат важни лекции од историјата на тоа зло што се појави“, рече Гор, кој беше потпретседател под Бил Клинтон.
Претставниците на Белата куќа не ги коментираа изјавите на Гор.
Свет
Путин нема да присуствува на погребот на папата

Руската државна агенција ТАСС објави дека претседателот Владимир Путин не планира да присуствува на погребот на папата Франциско повикувајќи се на портпаролот на Кремљ, Дмитриј Песков.
„Претседателот нема такви планови“, изјави Песков пред новинарите, според агенцијата, додавајќи дека сè уште не е донесена одлука за тоа кој ќе ја претставува Русија на испраќањето во Ватикан.
Путин последен пат го посети папата Франциско во Ватикан во јули 2019 година.
Телото на папата Франциско ќе биде префрлено во базиликата „Свети Петар“ в среда наутро во 9 часот, објави Ватикан.
Неговото тело моментно е положено во ковчег во капелата на Каса Санта Марта, каде што живеел за време на своето 12-годишно папство.
Ватикан денес објави дека погребот на папата Франциско ќе се одржи в сабота во 10 часот на плоштадот Свети Петар. Тој ќе биде погребан во базиликата „Света Марија Голема“ во Рим.
На последното збогување ќе присуствуваат стотици илјади верници, како и странски лидери, како што се американскиот претседател Доналд Трамп, францускиот претседател Емануел Макрон и украинскиот претседател Володимир Зеленски.
Свет
Недостиг на лекови во Газа: ОН предупредува на катастрофа

Палестинските пациенти во Газа се во сè полоша ситуација поради израелската блокада, а недостигот од клучни лекови и медицински потрошен материјал доведува многу животи на работ на смртта.
Затворањето на граничните премини од 2 март ги исцрпе болничките резерви на основни потреби создавајќи ситуации опасни за животот за сите на кои им е потребна терапија – од хронични болести до повреди од војната.
Министерството за здравство на Газа постојано предупредува на влошување на кризата поради недостиг на лекови, што дополнително ги оптоварува веќе слабите капацитети на здравствениот систем.
Во разговор за агенцијата „Анадолијањ, Ала Хилес, директор на Одделот за болничка фармација при Министерството за здравство на Газа, изјави дека повеќе од 37 проценти од основните лекови и најмалку 59 проценти од медицинските потрошни материјали моментно не се достапни во магацините на Министерството.
„Овој недостиг директно влијае на сите медицински услуги вклучувајќи ги ракот и крвните заболувања“, рече Хилес додавајќи дека 54 проценти од лековите за овие болести се исто така недостапни.
Тој исто така истакна дека повеќе од 24 проценти од лековите што им се потребни на пациентите на дијализа во моментот не се достапни.
Хилес изјави дека Министерството редовно поднесува извештаи за недостиг на лекови до релевантни меѓународни организации, вклучувајќи ги Меѓународниот комитет на Црвениот крст и Светската здравствена организација.
Во оваа криза Министерството за здравство се обидува да најде медицински алтернативи за ублажување на последиците од недостигот и намалување на компликациите за пациентите. Но, Хилес предупредува дека овие алтернативи не се секогаш соодветни и дека менувањето на лековите може да претставува дополнителен ризик за здравјето на пациентите.
Обединетите нации во понеделникот одбележаа 50 дена откога Израел целосно ја блокира хуманитарната помош за Газа предупредувајќи на брзо влошување на ситуацијата, што сериозно ги загрозува животите на цивилите.
„Денес, се навршуваат 50 дена откога израелските власти целосно го запреа протокот на какви било резерви во Газа“, изјави портпаролот на ОН, Стефан Дужарик, на прес-конференција.
Повикувајќи се на Канцеларијата на ОН за координација на хуманитарни прашања (OCHA), Дужарик нагласи: „Од почетокот на март на ниеден камион што носи храна, гориво, лекови или други потребни работи не му е дозволено да влезе во Газа, без разлика колку се важни овие резерви за опстанокот на луѓето“.