Македонија
Администрацијата чистеше во Скопје, отстранети и импровизираните објекти од кејот на Вардар
Вработените на градската администрација, јавните претпријатија и градските јавни културни институции денеска учествуваа во големата акција за чистење на Скопје, која се одржа како начин за одработување на неработниот ден од годинава, 2 јануари.
Во текот на денешната акција повеќе од 40.000 вработени од јавниот сектор спроведоа голема акција за чистење, која се одвиваше на 20 локации во Скопје и тоа: се езерцето Треска во Сарај, Аквадуктот, СЦ „Борис Трајковски“, Кале, Музејот на современа уметност, касарната „Илинден“, Јужен булевар, „Бихаќка“, Државното училиште за физичка култура „Методија Митевски Брицо“, Железничката и автобуската станица, улица „Џон Кенеди“, кај Собранието, цела улица „Македонија“, МКЦ и МТВ, касарната „Гоце Делчев“, улица „Ферид Бајрам“, улица „Александар Урдаревски“, Европската очна болница, улица „Индустриска“ во Гази Баба и целиот кеј на реката Вардар.
Вработените од Градот Скопје чистеа на повеќе локации по должината на Кејот на реката Вардар, на потег од мостот „Обединети нации“ до мостот Тодор Александров (Поранешен Близнак), вториот дел од Градскиот парк и други јавни површини.
„Се надевам дека со оваа акција ќе ја постигнеме основната цел на оваа акција, а тоа е подигнување на свеста кај сите граѓани за одговорно однесување кон хигиената во градот. Скопје мора и може да биде почист град, а за тоа покрај реформите во начинот на функционирање на службите задолжени за тоа, неопходно е и секој од нас како граѓанин да обрнува внимание на одржувањето на хигиената во градот. Скопје е нашиот заеднички дом, затоа верувам дека можеме да успееме да го одржуваме чист, исто како дома. Само со заеднички сили можеме да го постигнеме тоа. На крајот на денот хигиената значи здравје, а нема ништо поважно од нашето здравје и здравјето на нашите сакани“, кажа градоначалникот Шилегов за време на денешната акција.
Во текот на оваа акција, во соработка со Министерството за труд и социјална политика, се изврши чистење на импровизираните објекти на ролерско-велосипедската патека на Вардар, која е посочена како една од локациите на која често се врши нелегално палење на отпад и придонесуваат на загадувањето на амбиенталниот воздух.
– Ова е второ чистење на оваа локација во изминативе две години и иселување на лицата кои живеат на оваа дива населба. За таа цел решивме овојпат, покрај нивно дислоцирање, да извршиме и целосно чистење на просторот со цел да спречиме нивно повторно враќање. Градот работи да ја утврди и сопственоста на конкретната локација, бидејќи тука имаше спорни состојби, за доколку истото е приватно земјиште да го задолжиме сопственикот истото да го огради, додека доколку е државно истото да го облагородиме и да го урбанизираме и да спречиме повторно да се создаваат вакви појави додаде градоначалникот Шилегов.
Министерката Мила Царовска ја оцени денешната акција како успешна, каде вработените од министерството за труд и социјална политика го чистеа реонот околу Скопското кале и Музејот за современа уметност.
– Од оваа локација преселивме и обезбедивме соодветно топло живеалиште во зимскиот период за 14 семејства или околу 80 лица. Ова го правиме по втор пат, каде овие лица имаат живеалишта од привремен карактер во Визбегово зад домот за азиланти. Со ова не само што обезбедуваме топол дом за најмладите и можност истите да ги посетуваат дневни центри и училиште, туку имаме и можност да ги активираме работоспособните лица да бидат активни на пазарот на труд, се со цел обезбедување на социјална парична помош и детски додаток, да понатаму ги видиме како активни чинители во економијата во државата – кажа министерката Царовска.
Во поддршка на акцијата за чистење се приклучија и јавните градски претпријатија, кои чистеа на повее локации, екипите на јавните претпријатија „Комунална хигиена“ и „Паркови и зеленило“ учествуваа со соодветна механизација на повеќе локации, додека ЈСП-Скопје обезбеди превоз до локациите кои се наоѓаат подалеку од центарот на градот.
Оваа акција се реализира со одлука на Владата на РСМ, во соработка со иницијативата „Не биди ѓубре“ кои помогнаа при изборот на локациите за чистење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно време со повремен слаб дожд
Променливо облачно време, претпладне со повремен локален дожд и услови за појава на ретки грмежи. Ќе дува слаб до умерен, а наместа во западните делови повремено засилен ветер од јужен правец. Минималната температура ќе биде во интервал од 4 до 12, а максималната ќе достигне од 20 до 26 степени.
Во Скопје променливо облачно, претпладне во делови од котлината со повремен слаб дожд. Ќе дува слаб јужен ветер. Минималната температура ќе се спушти до 10, а максималната ќе достигне до 23 степени.
Во следните денови времето ќе биде стабилно и релативно топло, освен во петок кога ќе има услови за повремен локален дожд и појава на ретки грмежи.
Скопје
Без вода дел од Центар
ЈП Водовод и канализација – Скопје извести дека денеска без вода ќе биде дел од Центар.
• Поради дефект на улична цевка ф 80мм на улица Народен Фронт бр 17 без вода ќе останат корисниците на дел од улицата Народен Фронт и дел од улицата Васил Ѓоргов во општина Центар. Водоснабдувањето ќе биде прекинато од 08:00 часот до завршување на интервенцијата.
• Поради водоводен приклучок од 3/4 на улицата Славе Георгиевски-Шнајдерот бр 6 без вода ќе останат корисниците од улицата Ленинградска во општина Центар. Водоснабдувањето ќе биде прекинато од 10:00 часот до завршување на интервенцијата.
Македонија
Без струја неколку општини во Скопје
Регионалниот центар за управување со кризи на Град Скопје, по добиеното известување од ЕВН, известува дека поради планирани зафати во електро дистрибутивната мрежа денеска, без напојување со електрична енергија ќе останат:
Во период од 08:30 до 14:30 часот дел од ул. Хо-Ши Мин, ул. Марјан Лазевски, ул Софре Марковски, дел од. ул. Натанаил Кучевишки . (Општина Бутел)
Во период од 09:00 до 11:00 часот дел од с.Долно Соње (м.б.Азмак) (Општина Сопиште)
Во период од 08:30 до 12:00 часот дел од корисниците на ул.Лука Геров, Арск Мицков, Пекљане, Тиранска, Антон Чехов, Пелинце (Општина Ѓорче Петров)
Во период од 08:10 до 11:10 часот ул. Рокомија, ул. Ферид Бајрам, ул. Александар Турунџов, дел од бул Христијан Тодоровски Карпош објектите наспорти новата зграда на ЗСФ (Општина Бутел)
Во период од 08:00 до 11:00 часот дел од с.Љубош (ул.1 и околни) (Општина Студеничани)
Во период од 08:00 до 12:00 часот корисниците од с.Кучково (Општина Ѓорче Петров).