Култура
Деветтото издание на фестивалот за анимирани филмови „Анимакс“ од 20 до 22 декември
![](https://makfax.com.mk/wp-content/uploads/2019/12/animaks-9-izdanie.jpg)
Под мотото „Од дел до цел“ ќе се одржи деветтото издание на меѓународниот филмски фестивал за анимирани филмови „Анимакс Скопје фест.“ На него ќе бидат прикажани 40 анимирани филмови во официјалната програма, a 10 анимирани филмови се наменети за детската публика. Настанот ќе се одржува од 20 до 22 декември во Кинотека на Македонија.
Филмовите во официјална конкуренција се избрани од пријавениот рекорден број анимации, меѓу кои најголем број од Франција, Англија, Германија, Шпанија, Русија и Бразил…
Овогодишната жири комисија ја сочинуваат португалскиот аниматор Фернандо Гарлито, бугарската аниматорка Радостина Нејкова и македонскиот уметник Горан Трифуновски – Пајак.
Голем дел од филмовите кои се борат за наградата Златна тула се носители на престижни награди, победници на филмски фестивали од А категорија.
„Официјалната програма на фестивалот со прикажување на филмовите ќе почне во 20:00 часот. Проекциите на филмови за деца ќе се одржат на 21 и 22 декември (сабота и недела) со почеток во 14:00 и 16:00 часот в сабота и 12:00 часот в недела. Публиката ќе има можност да гласа за најдобриот филм за деца и да го одбере победникот“, информираат организаторите од каде додаваат дека проекциите за деца се бесплатни.
Во рамки на фестивалот ќе биде организирана работилница за анимација наменета за деца „Џвакај и анимирај“ во која група деца под менторство на искусни едукатори и аниматори со помош на мастиките Чунга Лунга ќе изработат цртан филм во техниката стоп-анимација со необичен материјал – гуми за џвакање.
!Анимакс Скопје фест“ е прв и единствен фестивал на анимиран филм во Македонија. Цел на фестивалот е подигање и градење на културата во поглед на изработка на анимирани филмови за возрасни и деца, кои презентираат различни аспекти од секојдневниот живот.
Фестивалот е во организација на продуцентската куќа „Аурипигмент“, во соработка со филмското училиште „Тинтири-минтири“ од Скопје, со поддршка од Агенција за филм на Република Македонија и Град Скопје и во соработка со Кинотека на Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Култура
Поради задоцнетите летови откажан е уличниот спектакл на француската театарска трупа „Кидам“
![](https://makfax.com.mk/wp-content/uploads/2024/06/kidam-otkazano.jpg)
Изведбата на уличното дефиле и претстава на француската театарска група „Кидам“ (La Compagnie des Quidams) е откажана, откако уметниците од „Кидам“ ниту вчеравечер не пристигнаа во Скопје, поради задоцнети и откажани летови.
Од Францускиот институт во Скопје соопштија дека се работи само за одложување и посочуваат дека тие ќе го одржат своето ветување и ќе донесат голема и убава улична претстава во Скопје, отворена за најширока публика, во знак на затворање на 50-годишнината од своето постоење.
Францускиот институт во Скопје ви се заблагодарува на разбирањето и уште отсега ви го најавува настанот којшто, штом се создадат услови, ќе се одржи оваа есен, соопштија од Францускиот институт во Скопје.
Претставата најпрвин требаше да се одржи на 28 јуни, но беше преместена за вечер, поради летот на гостите од Франција, кој бил одложен за денеска заради големото невреме. Сепак, уметниците ниту вчеравечер не пристигнаа во Скопје, а причина се задоцнети и откажани летови, кои се должат на невремето што изминатиов период ја зафати Западна Европа.
Култура
Вечер во Скопје уличен спектакл на француската театарска трупа „Кидам“
![](https://makfax.com.mk/wp-content/uploads/2024/06/institut.jpg)
Со улично дефиле и претстава, насловени „Сонот на Ербер“ вечер во главниот град ќе биде заокружена прославата на 50-годишнината од постоењето на Францускиот институт во Скопје. Претставата е во изведбата на француската театарска трупа „Кидам“ (La Compagnie des Quidams), која има од 100 до 150 настапи годишно низ целиот свет.
Настанот што го организираат Францускиот институт и фестивалот „Скопско лето“ ќе започне во 21:00 часот, од пред Музејот на град Скопје. Дефилето потоа ќе помине низ улица „Македонија“, преку Камениот мост до плоштадот „Карпошово востание“, каде што ќе се одржи финалето на претставата.
Низ волшебна музика, пет обемни фигури, високи четири метри, ќе изведат магичен ритуал преку кој ќе ѝ овозможат на една ѕвезда да се издигне на небото…Претставата е наменета за сите возрасти. На крајот на претставата, на фасадата на „Ибни Пајко“, ќе биде прикажан видео-мапинг на македонскиот визуелен уметник Емил Петро, насловен „Франција во светлина“.
Претставата требаше да се одржи вчера, но поместена е за еден ден бидејќи летот на гостите од Франција, беше одложен поради големото невреме.
Прославата на 50-годишнината е поддржана од повеќе компании пријатели на Францускиот институт во Скопје.
Култура
Изложба на македонскиот сликар Стефан Хаџи-Николов во Крива Паланка
![](https://makfax.com.mk/wp-content/uploads/2024/06/thumbnail_b7e07bee-f891-44b8-ae57-093748b22b8e.jpg)
Самостојна изложба на познатиот македонски сликар Стефан Хаџи-Николов ќе биде отворена во сабота, 29 јуни, во галеријата на ЛУ Градски музеј Крива Паланка, со почеток во 20,00 часот.
Изложбата е на иницијатива на Градскиот музеј кој од оваа година започнува со организирање годишни изложи на по еден учесник на Меѓународната ликовна колонија „Свети Јоаким Осоговски“, што се одржува во истоимениот манастриски комплекс.
Стефан Хаџи-Николов е долгогодишен учесник на колонијата и член на Организацискиот одбор, со кого започнува серијата изложби во локалната музејска установа. Член е на ДЛУМ од 1984 година, досега има реализирано повеќе од 75 самостојни изложби и над 100 групни изложби во земјата и странство. Добитник е на бројни награди и признанија меѓу кои и највисоките државни награди и тоа: „23-ти Октомври“ за долгогодишни остварувања во културата и уметноста и „13-ти Ноември“ за долгогодишни високи остварувања во сликарството. Ги има добиено и наградите „Климент Охридски“, „Вангел Коџоман“, „Константин Мазев“, „Лазар Личеноски“, а особено се издвојува наградата „Златни феномени“, доделена од бугарската асоцијација „Феномени“ (АСФЕН). Хаџи-Николов е првиот Македонец кому му е доделена оваа награда , врачена на неговата изложба во софискиот центар „ЦУМ“ во 2002 година.
Изложбата на Стефан Хаџи-Николов е дел од богатата програма на манифестацијата „Крива Паланка –Град на културата2024“.