Свет
Нетанјаху и Саар во трка за претседател на Ликуд
Израелската владејачка партија Ликуд, денеска одржува примарни внатрешни избори, при што ветеранот Гидеон Саар се надева дека ќе го смени премиерот Бенјамин Нетанјаху од лидерската функција во партијата по повеќе од една деценија на власт.
Саар тврди дека ќе биде во подобра позиција да формира влада по парламентарните избори во март бидејќи Нетанјаху не успеа да го стори тоа во два наврата годинава.
И покрај тоа што е засенет од обвиненија за корупција, Нетанјаху сè уште е популарен кај членовите на Ликуд, партија што имала само четворица лидери од основањето во 70-тите години на минатиот век.
Се очекува актуелниот премиер да оствари лесна победа над Саар, со што ќе се засили неговата позиција пред претстојните избори.
Сепак, Саар, кој има поддршка од неколку пратеници на Ликуд, може да има корист од слабиот одѕив на партиските членови на гласањето.
Ако победи, тој би можел да стане кандидат на Ликуд за премиер по изборите во март.
Гласањето завршува во 23 часот, а првите резултати ќе бидат објавени утре наутро.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Венс: Русите и Украинците да патуваат и да соработуваат, не да се убиваат
Американскиот потпретседател Џеј Ди Венс изјави дека смета оти Русија и Украина треба да тргуваат и да се вклучат во културни размени наместо да војуваат. Во разговор за „Бреитбарт њуз“, Венс рече дека администрацијата на Доналд Трамп ја користи економската моќ за да поттикне завршување на конфликтите ширум светот.
Тој наведе дека Трамп работи на повеќе мировни договори и дека, според него, заслужува Нобелова награда за мир. Венс го опиша Трамп како тврд, но ненасилен и истакна дека неговиот пристап кон рускиот и украинскиот конфликт се темели на идејата за соработка наместо насилство.
Коментарите уследија по извештаите на американски медиуми за нов мировен план што наводно го одобрил претседателот Трамп.
Свет
Санкциите на САД кон „Лукоил“ и „Роснефт“ стапуваат во сила
Санкциите што ги воведоа САД врз руските нафтени гиганти Лукоил и Роснефт, објавени од Министерството за финансии во октомври, стапуваат во сила денеска.
САД ги ставија Лукоил и Роснефт, како и десетици нивни подружници, на списокот на специјално назначени лица на ОФАЦ (Канцеларија за контрола на странски средства).
Според Вашингтон, санкциите имаат за цел да го зголемат притисокот врз Кремљ поради недостатокот на сериозна посветеност на Русија кон мировниот процес во Украина.
Американскиот министер за финансии Скот Бесант изјави дека администрацијата е подготвена да преземе дополнителни чекори доколку е потребно.
Бигарските медиуми потсетуваат дека парламентот во таа земја донесе закон со кој се дозволува назначување на специјален менаџер во рафинеријата Лукоил во Бургас, со цел да се обезбеди континуитет на работата по 21 ноември. САД одобрија ослободување од одговорност за бугарските компании поврзани со Лукоил, кое важи до 29 април 2026 година, и овозможува нормално работење на рафинеријата во Бургас.
Свет
Нов напад на доселениците на Западниот Брег: уништени и запалени 150 автомобили
Израелските доселеници вчера подметнаа пожар на депонија за автомобили во окупираниот град Хувара на Западниот Брег, уништувајќи десетици автомобили. Нападот се случи откако израелскиот премиер Бенјамин Нетанјаху свика состанок за безбедност за да разговара за зголемувањето на насилството меѓу доселениците, објави Си-ен-ен.
Според сведоци и официјалната палестинска новинска агенција WAFA, доселениците упаднале во депонија за автомобили во Хувара, град во северниот дел на Западниот Брег. Мохамед Далал, сопственикот на депонијата, рече дека повеќе од десетина доселеници влегле во имотот, кршејќи возила пред да ги запалат. Иако никој не бил на местото во времето на нападот, Далал процени дека околу 150 автомобили биле уништени или оштетени.
„Имам деца на колеџ, имам внуци, имам семејство; сите зависиме од оваа депонија“, изјави Далал за Си-Ен-Ен. „Како и многу Палестинци, имам маслинки, но не можев да ги наберам моите маслинки и затоа ова е нашиот единствен извор на приход. Сè што можам да направам е да му се молам на Бога да нè обештети.“
Израелската армија потврди дека нејзините војници биле испратени во Хувара по извештаите за „израелски цивили кои фрлале камења кон палестински возила, палеле пожари и оштетувале имот“. Тие признаа дека автомобилите биле запалени во близина на населбата Јицар, позната по својата екстремистичка идеологија. Во соопштението за медиумите се наведува дека никој не е повреден во инцидентот, а војниците кои ја пребарале областа не пронашле осомничени.
Во исто време, состанокот на Нетанјаху за насилството на доселениците, кое се зголеми во последните недели, го потврдија двајца израелски претставници. Засега не е познато дали се донесени конкретни одлуки за тоа како да се спречи ескалацијата на нападите. Нетанјаху го осуди насилството во понеделник, велејќи дека го спроведува „мала, екстремистичка група“.
фото: принтскрин

