Македонија
Царовска: Оперативниот план за вработување со реализација од 98,6 проценти

Вицепремиеркара задолжена за економски прашања Мила Царовска, дополнителната заменска министерка за труд и социјална политика Санела Шкријељ и директорката на Агенцијата за вработување Билјана Јовановска ги презентираа резултатите на Оперативниот план за активни програми и мерки за вработување и услуги на пазарот на трудот за 2019 година.
Царовска истакна дека Оперативниот план за 2019 година е со исклучително висок процент на реализација од 98,6 проценти, што е резултат од добро осмислените програми и мерки, кои се креирани во соработка со бизнис-секторот, со цел истите максимално да се апсорбираат од страна на бизнис-заедницата на локално и државно ниво.
„Имплементацијата на Оперативниот план за 2019 година, значително придонесе за намалувањето на невработеноста, која моментално е на рекордно ниска стапка од 17,1 отсто, пришто во изминатите две и пол години, регистрирани се нови 59.600 вработувања, дел од нив како резултат токму програмите и мерките од оперативните планови. Во 2019 година за реализација на ОП од буџетот се издвоени рекордни 1,3 милијарди денари, што е за 84 проценти повисок износ во споредба со 2016 година кога буџетот изнесувал 707 милиони денари. Ова се средства со кои директно се влијае кон зголемување на вработливоста на невработените лица, но и можност за формирање нови компании, кои понатаму треба да отворат нови работни места“, потенцираше Царовска.
Вицепремиерката додаде дека најголем дел од средствата се наменети токму за поттикнување на претриемништвото и креирање нови микро компании, а дека како резултат на програмите и мерките од ОП се произлезени и системски решенија. Како конкретен пример таа го посочи Законот за практиканство, како рамка младите невработени лица да добијат можност да ги стекнат потребните вештини и искуство преку практична работа во компаните и на тој начин ја зголемат можноста за сопствено вработување. Вицепремиерката упати благодарност до УНДП кои имаа голем придонес во реализацијата на мерката саомвработување.
„Преку Програмата за самовработување, во 2019 година, одобрени се 1484 грантови, а притоа се формирани 1320 микро компании. Од овие лица, 468 се млади луѓе, односно 36,8 проценти‘ од вкупниот број, додека 439 се жени (33,9%). Со оваа мерка не само што овозможуваме овие млади невработени лица да отворат сопствен бизнис, туку во целиот процес на едукација претходно, го создаваме претриемачкиот дух и ги поттикнуваме со други мерки да продолжат да отвораат дополнителни работни места“, подвлече вицепремиерката за економски прашања Мила Царовска.
Директорката на Агенцијата за вработување, Билјана Јовановска, во своето излагање, нагласи дека успешната реализација на Оперативниот план е резултат на тимска работа и позитивна енергија на вработените во Агенцијата и центрите за вработување, вработените во Министерството за труд и социјална политика, како и партнерите во спроведувањето УНДП и УНОПС, работодавачите и самите невработени лица. Таа додаде дека сите активни програми и мерки беа атрактивни за работодавачите и невработените лица и постигнат е максимален опфат согласно планираното.
„Преку субвенционирањето на плати отворени се 1383 нови работни места, додека со поддршка за вработување и раст на правни субјекти се придонесе за отворање на 621 работно место. Практиканството е уште една мерка која беше атрактивна кај работодавачите и младите лица, при што со оваа мерка беа опфатени 1697 лица. Она што особено беше побарано од стопанството беа обуките, се спроведоа вкупно 55 обуки за 22 занимања на територија на цела држава, при што 3704 лица успешно завршија обука. Станува збор за најразлични обуки, детектирани за потребите на пазарот на трудот: монтери, инсталатери, оператори за веб-дизајн, изработувачи на мебел, оџачари, гастрономи, електромеханичари, автомеханичари, заварувачи, фризери, козметичари“, појасни директорката Јовановска.
Дополнителната заменска министерка за труд и социјална политика Санела Шкријељ се осврна на реализацијата на Младинската гаранција, како мерка која е насочена исклучиво кон младите лица, кои се иднина на нашата држава, како инвестиција во нивното знење, доградба и преквалификација.
Свесни за предизвиците како што се високото ниво на младинска невработеност и иселувањето, сите мерки од Оперативниот план се насочени пред сè кон поддршка и поттикнување на младите луѓе, додаде Шкријељ.
„Младинската гаранција е една од носечките европски иницијативи, а Република Северна Македонија е единствена држава која не е членка на ЕУ, а почна со реализација на овој проект. Започна со реализација во 2018 година, најпрвин како пилот-проект, за во 2019 да се прошири на територијата на цела држава. Охрабрени сме со резултатите од реализацијата на Младинската гаранција, во 2019 година 20.301 лице се опфатени со оваа мерка. Секое младо лице во рок од 4 месеци по пријавување во Агенцијата за вработување добива можност за вработување, обука, преквалификација или практиканство. Од бројката на вклучени, 52% се жени, охрабрува што мерките кои се креирани се атрактивни и одговораат токму за млади девојки и жени. Само во 2019 година бројот на вработени преку младинска гаранција се 6004 лица, а овој број ќе продолжи да расте, во април 2020 година би можеле да ја имаме конечната бројка за лицата вклучени во 2019 година. Радува што мерката има позитивен ефект кај ранливите групи на лица, како што се Ромите. Во 2019 година во младинска гаранција се вклучени 1457 Роми, од нив 212 се веќе вработени. Во последниот квартал стапката на невработеност кај младите изнесува 35,3%, за споредба во 2016 тој процент беше 48,2%, а паралелно расте стапката на вработеност. На институциите останува да продолжиме да рабтиме во овој правец и да се издвојат сè повеќе средства имплементација на вакви програми“, заклучи дополнителната заменска министерка Шкријељ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шабан Салиу: Децата во Шуто Оризари заслужуваат современо и модерно основно училиште

Кандидатот за градоначалник од Демократските сили на Ромите (ДСР), Шабан Салиу најавува силен фокус на образованието, културата и идентитетот на ромската заедница, со порака дека „Шуто Оризари е приказна што ја пишуваме заедно“.
„Тоа е ромскиот идентитет, тоа е ромската музика, тоа е смеата на децата што трчаат по нашите маала. А нашите деца заслужуваат многу повеќе,“ порачува Салиу, нагласувајќи дека достоинството на заедницата започнува со квалитетни услови за учење.
Салиу зборува и за својата образовна визија како градоначалник на оваа скопска општина.
„Заслужуваат современо и модерно основно училиште — модерни училници, дигитална опрема и услови за квалитетно образование на секое дете. Заслужуваат специјализирани простории за музичка, ликовна и техничка настава. Време е сонот да стане јаве, да стане наше секојдневие — генерација по генерација,“ порачува Салиу.
Повикувајќи на заедничка одговорност и работа, Салиу истакна: „Драги мои, да покажеме дека Шуто Оризари не моли — Шуто Оризари работи. Тоа е мојата задача. Тоа е нашата победа.“
Македонија
Мицкоски: Неформалната коалиција СДСМ-ДУИ излегува со лаги и манипулации небаре граѓаните имаат кратко памтење

Претседателот на ВМРО-ДПМНЕ, Христијан Мицкоски на денешниот народен митинг во општина Дебарца, во рамки на изборната кампањата со слоган „Вистинскиот избор! Со твојот човек! За твоето место! За твојата иднина!“, порача дека од тоа што се гледа на терен е јасно дека работат ќе биде завршена уште во прв круг и Златко Сиљаноски ќе биде новиот градоначалник.
Мицкоски исто така повика што е можно помасовно излегување на гласање на овие локални избори, задутре на 19 октомври и да го заокружат бројот 9.
Мицкоски повтори дека ова кампања понуди имаа две групи кои се издвојуваат, едната е групата којашто е неформална коалиција помеѓу СДСМ, ДУИ и Левица која на овие избори излегува, исклучиво, со црна кампања од прв ден се до денес.
„Кампања на лаги, на клевети, кампања во која се обидуваат повторно да ги навредат граѓаните, нивната интелигенција и играат на картата на кратко помнење, небаре сите ние сме заборавиле дека до пред само година и половина влада во Македонија беше коалицијата СДСМ и ДУИ. Небаре граѓаните не разбираат за сето тоа коешто тие го работеа тие и како да заборавија на сите нивни скандали кои тогаш ни се случуваа“, рече Мицкоски, додавајќи дека со тоа само ја промашија кампањата и политичките пораки, слушнавме се само не какви проекти нудат.
Овие од ДУИ, додаде Мицкоски, покажаа дека можеби сум им идол, па половина од кампањата немаше митинг Али Ахмети да не излезе и да не го спомне моето име.
Во однос на Левица, Мицкоски посочи дека тие малку беа збунети, бидејќи сега бараат нов стопан, а претходно им беше Зоран Заев.
„Бидејќи нивната карактерна особина им е таква, или на социјалните медиуми каде што се присутни да лажат, да креираат материјали, да вадат од контекст, мислејќи дека на тој начин ќе добијат некаква симпатија. Или пак сега да одработуваат, во случајот за Али Ахмети и ДУИ“, додаде Мицкоски објаснувајќи дека Левица одлучила да не кандидираат кандидати за градоначалници во родниот град на претседателот на партијата, Велес и Штип, но извадија во Тетово, Гостивар и Струга.
„И нивните кандидати за градоначалници, па и самото раководство на партијата, нема да го слушнете да каже ниту еден лош збор, да речеме за Рамиз Мерко. Тој е добар. Нема ниту еден статус, ниту еден лош збор нема да слушнете за на пример, кандидатот на ДУИ и Алијанса на Албанците во Струга. Нема лош збор, тој е идеален. Или пак за актуелниот градоначалник во Гостивар, којшто е наследник на Арбен Таравари и поддржан од Али Ахмети“, посочи Мицкоски.
Македонија
Сиљаноски: Заокружи 9 за нова, модерна и просперитетна Дебарца

Златко Сиљаноски, кандидат за градоначалник за општина „Дебарца“ од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, се обрати и рече дека на општина Дебарца и претстои многу работа и истакна дел од проектите на изборната програма.
„Ни претстои многу работа, но ние од работа не се плашиме, ќе почнеме од почеток, коцка по коцка да го местиме мозаикот наречен модерна Дебарца. Со нашата програма ќе почнеме да ја реализираме промената во Дебарца. Ќе почнеме од семејствата, ќе има 50 илјади денари еднократна парична помош за млади брачни парови до 30 години, 10 илјади денари еднократна парична помош за секое запишани прваче, 100 илјади денари еднократна парична помош за трето дете, 100 илјади денари помош и ослободување од комуналии за изградба на семејна куќа за жители на општина Дебарца“, посочи Сиљаноски и додаде:
„Воведуваме бесплатен превоз за викендите за нашите студенти, пензионери, ранливи категории, недела ќе биде ден за прошетка во Охрид или за гости за кај во Дебарца, воведуваме директна инвестиција за нашите млади преку целосно субвенционирање на трошоците за возачки испит за сите матуранти, ќе дадеме директна поддршка на локалните бизниси, секој постоечки и нов маркет ќе добива 12 илјади денари месечно да им помогнеме да растат и да опстанат, со поддршката на Владата започнуваме комплетна реконструкција на спортското игралиште во село Мешеишта, целосно ќе реконструираме неколку улици значајни за селото, ќе реконструираме објект наменет за селска продавница, комплетна реконструкција на домот. Во Волино ќе ги реконструираме мостовите на двата влеза од селото, ќе го реконструираме игралиштето за голем фудбал, ќе го уредиме речното корито низ селото, ќе реконструираме неколку значајни улици. Во Требеништа ќе ги асфалтираме патиштата до црквата Св.Варвара и Св.Петка, со нов пат ќе ги поврзиме Мислешево-Волино“.
На крај Сиљаноски ги повика граѓаните да излезат и да го заокружат бројот 9, за нова, модерна, и просперитетна Дебарца.
„Следуваат убави денови за Дебарца и за секој еден граѓанин во општина Дебарца. Затоа ве повикувам на 19 октомври сите заедно, обединети да го изразиме нашето незадоволство, да излеземе и масовно да гласаме за бројот 9 за градоначалник и за победничка советничка листа со мнозинство во Советот на општината и заедно да почнеме да ја градиме новата, модерна, просперитетна Дебарца, како убав дом за сите граѓани во општина Дебарца“, дециден е Сиљаноски.