Свет
Турција не известила за преместувањето на силите во Идлиб пред да бидат гранатирани од сириските трупи
Инцидентот во кој турските сили беа гранатирани во Идлиб, Сирија, и во кој биле убиени четворица турски војници, можел да биде избегнат ако Турција предупредела за движењето на својот конвој, соопшти руската војска.
„Единиците на турската војска се преместуваа во зоната на деескалација на Идлиб ноќта кон 3 февруари, без да ја известат руската страна, и се најдоа под оган од сириските владини трупи, кои таргетираа терористи западно од Саракиб“, изјави рускиот Центар за помирување во Сирија.
Во изјавата се истакнува дека постојат воспоставени линии на комуникации помеѓу руските сили во Сирија и турската команда. Во соопштението се додава дека турските авиони не влегле во сирискиот воздушен простор по инцидентот спротивно на некои извештаи во турските медиуми, во кои се вели дека Анкара наредила воздушни напади на сириските позиции како одмазда за гранатирањето. Во него се додава и дека руската и турската војска се во постојан контакт за да ги евакуираат повредените трупи во Турција.
Новинската агенција „Анадолија“ претходно објави дека Турција распоредува оклопни возила и тенкови на границата со Сирија, кои во моментот се во областа Рејханли во провинцијата Хатај, која граничи со сириски Идлиб. Турското Министерство за одбрана претходно објави дека четворица турски војници загинале, а девет други се повредени во инцидентот со гранатирањето.
Турскиот претседател, Реџеп Таип Ердоган, реагира бргу ветувајќи дека ќе се одмазди за какви било напади против турските сили во сириската провинција Идлиб. Провинцијата Идлиб е назначена зона за деескалација според договорите меѓу Русија, Турција и Иран.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Шолц за Берлинскиот процес: Соработката во Западен Балкан е важна затоа што тие можат само заедно да влезат во ЕУ
По денешниот самит за Берлинскиот процес, германскиот канцелар Олаф Шолц ја истакна важноста на соработката во регионот на Западен Балкан, кој, како што рече, се уште е оптоварен со проблеми од минатото, пишуваат медиумите во регионот.
„Берлинскиот процес помага да се надминат границите меѓу земјите. Ова е важно бидејќи конфликтите од минатото и денес влијаат на соработката, за жал, и разговаравме за тоа. Дијалогот за нормализација на односите меѓу Србија и Косово не оди во задоволителна насока“, изјави тој за новинарите.
Тој ги повика властите на Србија и на Косово да ги исполнат своите обврски, бидејќи тоа е важно за граѓаните и нивната иднина во ЕУ.
Шолц истакна дека сè уште постои националистичка реторика која предизвикува поделеност и претставува опасност за растот и заедничкиот живот во мир и просперитет.
Тој додаде дека е јасно оти земјите од Западен Балкан само заедно ќе можат да влезат во Европската унија, што ја прави регионалната иницијатива за добрососедски односи уште поважна.
Тој, според написите, го пофали Косово бидејќи административните премини се отворени за стока од Србија.
Шолц посочи дека билатералните проблеми на земјите-кандидатки треба да останат билатерални и да не влијаат на европската интеграција која се заснова на заслуги.
Тој рече и дека е договорен акциски план за борба против пластичниот отпад, побрзо спроведување на зелената агенда за Западен Балкан до 2030 година, кој Германија го поддржува и во оваа смисла планираните 1,5 милијарди евра ќе бидат исплатени до крајот на годината.
Лидерите од Западен Балкан денеска на самитот на Берлинскиот процес ја потпишаа новата фаза од Акцискиот план за заедничкиот регионален пазар од 2025 до 2028 година.
На самитот беше одбележана 10-годишнината од Берлинскиот процес.
Лидерите го потпишаа и Договорот за пристап до високото образование и прием на студии во Западен Балкан и ја усвоија Декларацијата за пристап и соработка во инфраструктурата за истражување и иновации и Декларацијата за регионални стандарди за проверка на директните странски инвестиции.
Лидерите на Берлинскиот процес ги истакнаа резултатите постигнати во рамките на Заедничкиот регионален пазар 2021-2024 година, вклучувајќи слобода на движење со лична карта, меѓусебно признавање на високото образование и професионални квалификации во регионот, целосно функционален режим на роаминг како во Западен Балкан, намалување на трошоците за роаминг на податоци помеѓу ЕУ и шесте земји од Западен Балкан, напредок кон членство во Единствениот европлатен простор (SEPA), воспоставување зелени коридори и намалување на времето на чекање и ги поздрави напорите направени за зајакнување регионална соработка, пишуваат медиумите.
Свет
Трамп побара од Камала Харис да направи тест за ментална агилност
Поранешниот американски претседател и републикански претседателски кандидат Доналд Трамп побара потпретседателката на САД и демократска претседателска кандидатка Камала Харис да направи тест за ментална агилност за да докаже дека е способна да ја извршува функцијата претседател.
Трамп тоа го побара во неделата вечерта на неговата социјална мрежа Truth Social, еден месец откако тој наводно ја нарекол Харис „ретардирана“ на републиканскиот прибирање средства во Њујорк, објави Њујорк Тајмс.
Коментирајќи го интервјуто на Камала Харис за Си-Би-Ес, Трамп рече дека е многу важно за неа да го положи тестот за когнитивна агилност, бидејќи, како што изјави, нејзините постапки навеле многумина да веруваат дека „нешто не е во ред со неа“.
„Исто така, таа е бавна и летаргична во одговарањето дури и на најлесните прашања. Само што поминавме низ речиси четири години од тоа, не треба да го правиме тоа повторно!“, рече Трамп, пренесе Newsweek.
„Ни се смеат низ целиот свет. Знаете на што навистина се смеат? Камали. Не можат да веруваат дека таа ќе биде претседателка. Не можат да веруваат. Зборувате за когнитивни проблеми? Таа според мене има поголеми когнитивни проблеми од него“, рекол Трамп, пренесува Танјуг.
Откако Харис го замени Бајден, демократите почнаа да го напаѓаат Трамп поради неговата возраст и други гафови.
Бајден има 81, Трамп 78, а Харис 59 години.
Свет
Украина го повикува Бразил да го уапси Путин доколку дојде на самитот на Г20
Главниот украински обвинител Андриј Костин денеска изјави дека добил разузнавачки информации дека рускиот претседател Владимир Путин би можел да присуствува на самитот на Г-20 во Бразил следниот месец и ги повика тамошните власти да издадат налог за негово апсење доколку тој се појави.
Меѓународниот кривичен суд во Хаг издаде налог за апсење на Путин во март 2023 година, околу една година по рускиот напад врз Украина, обвинувајќи го за воено злосторство депортација на деца, објави Ројтерс.
Кремљ ја отфрли наредбата на МКС како ништовна.
На новинарско прашање дали е донесена одлука Путин да присуствува на состанокот на Г-20, портпаролот на Кремљ, Дмитриј Песков, денеска на новинарите им рече дека тоа е негативно.
„Кога ќе биде донесена одлуката, ќе ве информираме“, додаде Песков, пренесува Танјуг.
Украинскиот обвинител Костин рече дека е важно меѓународната заедница да биде обединета и да бара одговорност од Путин.
Тој додаде дека обврска на бразилските власти врз основа на Римскиот статут, со кој е основан МКС, е да го уапсат Путин доколку се осмели да дојде на самитот.
Според него, ова ќе го докаже статусот на Бразил како демократска држава регулирана со закони, додека во спротивно тоа ќе биде преседан што значи дека лидерите обвинети за злосторства можат неказнето да патуваат.
Бразил испрати стандардна покана до Путин за учество на самитот на Г20 во Рио де Жанеиро на 18-19 ноември, но не доби потврда за неговото доаѓање, изјавија двајца бразилски владини претставници.