Македонија
Пленковиќ домаќин на Османи и Димитров: Влезот на Западен Балкан во ЕУ е директен интерес на Хрватска
Интеграцијата на Западен Балкан во ЕУ претставува и директен интерес на Република Хрватска, посочил хрватскиот премиер, Андреј Пленковиќ, на средбата со министерот за надворешни работи, Никола Димитров, и вицепремиерот Бујар Османи во Загреб.
Според Пленковиќ, земјава е подготвена за почеток на преговорите и тој изразил надеж дека датумот ќе биде одреден во рамките на хрватското претседателство со Унијата.
Вицепремиерот Османи изразил благодарност за активниот пристап на Хрватска додавајќи дека новата методологија на Европската комисија претставува добра основа за навистина квалитетен процес на преговори.
„Ова несомнено ќе биде од корист за граѓаните, кои ќе добијат квалитетни и спроводливи реформи, а уште повеќе, методологијата претставува и добра основа за земјите членки да ги надминат разликите за политичката контрола на овој процес, што ќе отвори простор за да се обезбеди консензус од страна на Европскиот совет за почеток на преговорите на самитот на ЕУ во март“, истакна Османи.
Според министерот Димитров, доколку ЕУ остане неодлучна наместо да помага и поддржува, ќе му направи голема штета на регионот.
„Европската геополитичка амбиција тешко ќе се оствари без завршување на работата за земјите кандидати со перспектива за зачленување во ЕУ. Во пресрет на мартовските дискусии на Советот помошта на Хрватска ќе биде од клучно значење да се подготви теренот и да се овозможи донесување на одлуката за преговори заедно со методологијата. Методологијата според нашите оценки дава повеќе за оние што ќе постигнат повеќе, а нуди помалку за оние што нема да успеат да испорачаат доволно. Затоа, сметаме дека за нас таа претставува шанса да го надополниме изгубеното време и да се докажеме дека сме способни да го изодиме патот“, нагласи македонскиот министер за надворешни работи.
Во рамките на посетата на Хрватска, Османи и Димитров остварија средби и со министерот за надворешни и европски работи, Гордан Грлиќ Радман, како и со претседателите на собраниските комисии за надворешна политика и за европски прашања, Миро Ковач и Домагој Иван Милошевиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.