Регион
Протести поради пензиските реформи во Атина
Сообраќајот во делови од Атина беше запрен синоќа кога превозниците му се приклучија на штрајкот против планираните пензиски реформи. Во исто време илјадници луѓе маршираа мирно низ центарот на градот барајќи предлог-законот да биде укинат.
Бидејќи метрото, возовите и автобусите не сообраќаа, многумина беа принудени со автомобили да одат на работа предизвикувајќи градот со речиси четири милиони луѓе да биде целосно блокиран.
Патничките бродови исто така останале во пристаништата, јавуваат агенциите. Синдикатите од јавниот сектор повикаа на еднодневен прекин на работата, загрижени дека реформите ќе значат намалување на пензиите, кои веќе постепено се намалија кога Грција ја зеде првата финансиска помош во 2010 година.
Демонстрантите се собраа пред парламентот, каде што пратениците од денеска ќе почнат да разговараат за нацрт-законот. Од Синдикатот на вработените во јавниот сектор (АДЕДИ) изјавуваат дека со новиот закон не се менува старосната граница за пензионирање, односно и во новиот закон таа ќе биде на 67 години или 62 години со 40 години работен стаж.
Меѓу другото, тие бараат враќање на 13. и 14. плата, како и државна гаранција за сите пензии. Министерот за труд и социјална политика на Грција, Јанис Вруцис, рече дека станува збор за атрактивен закон, кој предвидува и зголемување на пензиите. Тој додаде дека тоа е првиот закон за социјално осигурување во историјата кој се заснова на експертска студија со која се потврдува одржливоста на системот за осигурување во земјата до 2070 година и дека тоа е првиот закон по 12 години што не предвидува намалување на пензиите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Кси слета во Србија: Претседателот на Кина пречекан од Вучиќ и државниот врв
Заедно со претседателот на Србија Александар Вучиќ и првата дама, кинескиот претседател Кси Џинпинг беше пречекан на црвениот тепих од српската делегација составена од премиерот Милош Вучевиќ, претседателката на Собранието Ана Брнабиќ, министерот за надворешни работи Марко Ѓуриќ, српската амбасадорка во Кина Маја Стефановиќ и кинескиот амбасадор во Белград Ли Минг со сопругата.
Свечениот пречек на кинеската делегација која брои 400 лица е закажан за в среда пред палатата „Србија“.
Домаќин на претседателот Кси Џинпинг ќе биде српскиот претседател Александар Вучиќ, а двајцата лидери ќе разговараат за широк спектар на теми – од политички, економски и технолошки до соработка во областа на културата.
За време на дводневната посета на Кси Џинпинг на Србија, планирано е да се потпишат над 30 договори.
Беше организиран и свечен ручек на кој кинескиот претседател ќе има можност да дегустира српски јадења и вина, а ќе има и музичка програма на српски и кинески јазик, која ќе заврши со песната „Ова е Србија“.
Поради доаѓањето на кинескиот претседател преземени се големи безбедносни мерки, па неговата делегација ќе ја обезбедуваат 3.400 полицајци.
Регион
Руски хакери ги нападнаа веб-страниците на косовските институции
Руски хакери ги нападнаа веб-страниците на косовските институции, изјави министерот за одбрана Ејуп Македончи.
„Група руски хакери извршија сајбер-напад на Косово како одмазда за мојата изјава за поддршка на Украина“, изјави Македончи.
Во текстот на руските хакери се споменува говорот на тој косовски министер кој, според нив, рекол дека „Косово е подготвено да и понуди воена помош на Украина“.
„Косово е подготвено да ги здружи колективните напори за поддршка на одбраната на Украина. Треба повеќе да размислат за ова“ – напишаа хакерите на руски, спомнувајќи го министерот Македончи.
Министерката за надворешни работи и дијаспора Доника Гервала објави дека „Русија врши хибриден напад на Косово“.
Гервала на мрежата „Х“ изјави дека „рускиот хибриден напад на Косово“ доаѓа по најавата за поддршка на Косово за Украина со воена опрема.
Регион
Александар Вулин: Пријателството меѓу Србија и Кина е челик затоа што го ковавме во оган
Вицепремиерот на Србија, Александар Вулин, на промоцијата на културната размена меѓу Кина и Србија на тема „Што ги делат планините и реките, пријателството обединува“, изјави дека пријателството меѓу двете земји е челик бидејќи е ковано во оган и дека Србија и Кина се разделени за многу работи, но најважното ги обединува, а тоа е одлуката на две држави да бидат слободни.
„Пријателството на нашите лидери, претседателот Вучиќ и претседателот Си Џинпинг, не обврзува да сториме сè, исто како нив, за нашите народи да бидат поблиски отколку што нè прави блиски географијата или историјата. Србите и Кинезите ги дели сè, ние сме различни во сè, но нас нè обединува она најважното – нашата одлука да бидеме слободни, нашата посветеност на најважната карактеристика на народите и луѓето – слободата“, рече Вулин на настан организиран од China Media Group.