Свет
Шведска – земја во која пратениците немаат привилегии, дури и кафето го плаќаат од својот џеб

Народните избраници во Шведска имаат право на канцелариски простор од седум квадратни метри, мали станови за службени лица и строги лимити за користење пари од даночните обврзници во текот на парламентарните активности.
Шведските пратеници немаат дополнителни привилегии како парламентарците од други земји, како на пример буџет за чартер-авиони, финансиска помош за изнајмување стан, лични советници или здравствени трошоци, средства за публикација на мандатот, вклучително и платена грижа за деца.
Во Шведска, пратеничкиот имунитет е концепт што не постои.
„Ние сме обични граѓани“, изјави во една пригода за „Би-би-си њус Бразил“ потпретседателот Пер-Арне Хакансон од Социјал-демократската партија.
„Нема смисла да им се даваат посебни привилегии на пратениците бидејќи наша задача е да ги претставуваме граѓаните и да ја знаеме реалноста во која живеат. Претставувањето на граѓаните е привилегија само по себе, затоа што имаме можност да влијаеме на патот на земјата”, додава Хакансон.
За разлика од други земји, Шведска не им нуди никаков луксиз или привилегии на своите политичари. Без службени возила и без лични возачи, шведските минстри и членови на парламентот на работа одат со преполни автобуси или возови, исто како и граѓаните што ги претставуваат.
Без никакво право на пратенички имунитет, тие можат да бидат изведени пред суд како и секој обичен човек. Тие немаат лични секретари/секретарки пред влезот на нивниот кабинет, кој не е поголем од осум метри квадратни.
„Јас ги плаќам политичарите“, вели Хоаким Холм, шведски државјанин, и додава „не гледам причина да имаат луксузен живот“.
Политичарите кои ќе се осмелат да трошат народни пари на возење со такси,наместо да патуваат со воз, завршуваат на насловните страници. Дури и спикерот на парламентот добива картичка за користење на јавниот превоз. Само премиерот има право да користи автомобил од безбедносните сили на трајна основа.
Шведските парламентарци живеат во мали станови во главниот град, каде својата облека ја перат и пеглаат во комунални пералници. Ова можеби некому ќе му изгледа прескромно, но всушност е многу подобро од порано. До крајот на 80-тите години на минатиот век сите парламентарци спиеја на троседот во своите канцеларии.
Шведска е држава која своите владини функционери и политички претставници ги третира како обични граѓани. Земја каде не се употребуваат зборовите „екселенции“ или други формални титули и обраќања.
Општество што ја укина службената употреба на формални заменки во 1960-тите и каде сите меѓусебе се обраќаат едноставно со „вие“. Затоа што, според шведскиот систем на вредности, никој не е над кој било друг. Ниту политичарите кои треба да живеат во услови слични на реалноста на луѓето што ги избираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Напад во кривичниот суд во Њујорк, има повредени

Тројца судски службеници денес биле нападнати со нож и повредени во зградата на Кривичниот суд на Менхетен, потврдија два извори од њујоршката полиција кои се запознаени со нападот.
„Осомничениот напаѓач е приведен по нападот врз службениците во зградата на судот на Централната улица во Њујорк. Нападот се случил близу фоајето“, изјавил неименуван полициски извор за NBC.
Еден судски службеник се здобил со посекотини на лицето, друг на вратот, а третиот бил повреден кога осомничениот го фрлил на подот обидувајќи се да побегне, се наведува во извештајот на американската телевизиска мрежа.
Сите тројца повредени се медицински згрижени и се чувствуваат добро, а истрагата е во тек, иако засега не е јасно што бил мотивот за нападот.
Свет
„Ерусалим пост“: Трамп ќе му даде на Иран последна шанса

Американскиот претседател, Доналд Трамп, планира да му упати на Иран последна шанса за договор, објави „Ерусалим пост“, повикувајќи се на американски и европски претставници.
Според неофицијални информации, новата понуда би можела да биде уште поповолна од онаа од пред недела и половина, но сепак би се базирала на американското барање за нулта толеранција за збогатување ураниум.
Според истиот извор, Иран се обидел да посредува со американската администрација преку Оман и Катар со цел да ги запре израелските напади и да ги обнови преговорите за нуклеарната програма. Саудиска Арабија наводно дејствува преку посебен канал со иста цел – постигнување прекин на огнот.
Свет
Претседателот на Иран: Не сакаме ширење на војната

Иранскиот претседател Масуд Пезешкијан изјави дека Иран не сака да ја прошири војната со Израел, но ќе одговори пропорционално на секој напад, пренесува државната иранска новинска агенција.
Пезешкијан ова го рекол за време на телефонскиот разговор со турскиот претседател Реџеп Таип Ердоган.
„Иранските научни, воени и цивилни објекти беа под израелска агресија, при што беа убиени цивили, научници и воени водачи“, рече Пезешкијан.
„Иран не ја започна оваа војна, но ќе одговори според нивото на напад“, изјави.
Тој додаде дека учеството на Иран во нуклеарните преговори со САД зависи исклучиво од прекинот на нападите на ционистичкиот режим врз земјите во регионот.
Турскиот претседател Ердоган, според турската државна агенција, му рекол на Пезешкијан дека Турција е подготвена да игра улога на посредник за да помогне во деескалацијата на конфликтот и да го поддржи враќањето на преговорите за нуклеарната програма.