Македонија
СДСМ: Мицкоски е нагазна мина и опасен за животната средина

„ВМРО-ДПМНЕ за 11 години на власт направи бројни катастрофални и апсурдни проекти кои сведочат за нивното криминално владеење.Такво сведоштво е и фасадата од 11 милиони евра на МЕПСО, која на еден поголем налет на ветер се сруши и беше потенцијален ризик за животот на граѓаните. Бароко , спомениците, рајските градини се проектите што ги реализираше ВМРО-ДПМНЕ за време на 11 години на власт, истовремено безмилосно расфрлајќи се со парите на граѓаните“, соопшти СДСМ.
„Поскапување на струјата за 100%, укинување на евтината тарифа и увоз на струја на вртоглави 38%.Тоа се проектите на ВМРО-ДПМНЕ кои ги реализираше за времето на владеење.
Затоа денес не се чудиме ниту на апсурдните проекти кои им ги нудат на граѓаните, а сè во насока на предизборни ветувања. Апсурдот на ВМРО-ДПМНЕ оди дотаму што додека цела ЕУ има јасна стратегија на затворање на сите електрани на јаглен и за 30 години целосно да биде укинато, Христијан Мицковски предлага отворање на нова термоцентрала.
Додека земјата се гасифицира и додека одиме на соларни панели, Мицкоски сака да ја враќа земјата назад во енергетска опасност.Апсурдот на ВМРО-ДПМНЕ се огледа и во тоа што предлагаат гасификација на Клинички центар , а изгледа забораваат дека таа е завршена и Клинички е гасифициран.
ВМРО-ДПМНЕ ќе ја модернизирала РЕК Битола? Токму состојбата во РЕК Битола во 2017 беше катастрофална, а еколошките процеси очајни. Денес, постапката за новите филтри во РЕК Битола е готова и за првпат по 40 години од монтирањето филтри, РЕК Битола ќе има нови.Ќе се направи темелна реконструкција на трите филтри и замена на вентилаторите. Тоа значи дека за првпат по инсталирањето на филтрите во 80-тите години, во 2020 година оваа година наесен ќе се врши целосна реконструкција на електростатскиот филтер на овој блок, 2021 и 2022 на другите два блока и од 2023 до 2025 ќе се заврши и втората фаза десулфуризацијата. При тоа, обезбедени се 32 милиони евра. ВМРО-ДПМНЕ само потврдуваат дека кај нив ништо не се сменило, на граѓаните им нудат проекти кои се опасни за животната средина. Граѓаните добро нека ги запаметат предлозите на ВМРО-ДПМНЕ и најлошиот директор на ЕЛЕМ Мицкоски, кој е нагазна мина од која последиците на крај ќе ги трпат токму граѓаните. Деструктивни политики на ВМРО-ДПМНЕ не смеат да се вратат, земјата мора да оди напред. Затоа на 12 април сите заедно ќе порачаме режим никогаш повеќе“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче од Атина: За работниците направивме најмногу, мора да знаат дека со социјалдемократијата нивните права и стандард ќе растат

За работниците направивме најмногу, мора да знаат дека со социјалдемократијата нивните права и стандард ќе растат. Ова го истакна претседателот на СДСМ, Венко Филипче, на панел-дискусијата „Прогресивен одговор на кризата на демократијата“, во рамките на втората Меѓународна конференција за демократија и социјална правда, организирана од Институтот „Алексис Ципрас“ во Атина.
На панелот, на кој учествуваа професори од неколку светски универзитети и други говорници, меѓу кои и од Универзитетот Харвард, Филипче, како претседател на СДСМ, ги сподели своите ставови за тоа како да се заштитат темелите на демократските општества, кои сè почесто се загрозени од дејствувањето на авторитарните режими.
„Мораме да ги потсетиме нашите традиционални гласачи – работниците. Треба да признаеме дека во изминатите изборни циклуси многу од нив гласаа за десните партии, заоа што се чувствуваа напуштени од нас“, изјави Филипче.
Тој го посочи примерот со Македонија, каде што, и покрај реалните вложувања и мерки за поддршка на работничките права, политиките не допреле до гласачите поради влијанието на хибридни инструменти што ги користат авторитарните режими.
„Тоа е парадоксот, ова е групата граѓани за кои направивме најмногу. Го зголемивме минималецот, обезбедивме социјална поддршка, но тие не ги препознаа придобивките од нашата политика“, рече Филипче, додавајќи дека мора да се преземат конкретни мерки против овие хибридни закани.
Како втора мерка, тој го нагласи значењето на подобар социјален и економски статус за работниците.
„Мораме да ги поврземе нивниот социјален и економски статус со животниот стандард, за да сфатат дека тоа е демократија, систем што им овозможува да ги остварат своите идеи и да постигнат благосостојба“, појасни Филипче.
Третата насока, според него, е справувањето со неконтролираниот капитализам.
„Особено сегашните и многу модерни, јас ги нарекувам технофеудалисти, кои успеаја да ги придобијат нашите традиционални гласачи, не затоа што им понудија подобри услови, туку затоа што го искористија нивниот страв од глобализацијата и имиграцијата.
Социјалдемократските и прогресивните либерални сили треба заеднички да ги искористат своите капацитети за запирање на подемот на авторитарните режими ширум светот#, рече тој. Филипче подвлече дека клучот лежи во отворената комуникација со граѓаните.
„Без разлика колку некое прашање изгледа ирационално, мора да разговараме за тоа, бидејќи кога луѓето се плашат од нешто и нешто не им е јасно, тогаш тие одат кон авторитарните режими, затоа што се чувствуваат побезбедно“, истакна тој.
Како заклучок, Филипче посочи дека иако предизвиците се големи, постои капацитет меѓу прогресивните сили да се здружат и да ги надминат опасностите што се закануваат на темелите на демократијата.
Македонија
Потпишан Меморандум за соработка помеѓу Македонија и Италија за користење на ЕУ фондови

Во рамките на официјалната посета на Република Италија од делегација на Националната агенција за европски образовни програми и мобилност, предводена од Петар Богојески, во Рим беше потпишан Меморандум за соработка помеѓу македонската и италијанската Национална агенција, предводена од Федерика Целестини Кампанари.
Овој стратешки документ претставува темел за унапредување на билатералната соработка во областите на образованието, науката, младите, спортот и културата, со што се отвораат нови перспективи за директна поддршка на македонските универзитети, училишта, младински организации и компании преку европски фондови од Брисел, чии финансиски капацитети се значително повисоки од оние кои се достапни преку националните програми.
Потпишувањето на ваков документ со една од основачките и водечки земји-членки на Европската Унија, Италија, претставува чин од особена важност за Република Македонија. Истовремено, тоа е јасен сигнал за проширување на европската солидарност и зацврстување на меѓусебната доверба и партнерство на полето на образовниот и научниот развој.
Со овој договор, корисниците од Република Македонија ќе добијат непосреден пристап до институционални мрежи, програми и партнери од Италија, со можност за заедничка реализација на проекти и иницијативи од европски ранг.
Ова партнерство претставува уште еден чекор напред во заложбите на Националната агенција за создавање нови можности за македонските граѓани, во духот на европските вредности, меѓународната соработка и одржливиот развој.
Националната агенција изразува длабока благодарност до италијанските домаќини за топлиот прием и за визионерскиот пристап кон заедничката европска иднина на нашите млади генерации.
Македонија
Ѓорѓиевски: Награди за талентираните ученици

„Кисела Вода изобилува со талентирани ученици, на што сме исклучително горди! За таа цел, објавен е јавниот повик за доделување на награди на талентирани ученици и спортисти од основните училишта на територијата на Кисела Вода, што претставува еден стимул за нивното понатамошно градење како личности“, велат од Општината.
„Имено, се работи за Јавен повик за пријавување на најдобрите основци кои, постигнале одлични резултати на натпреварите во образованието, културата, науката и спортот кои ќе добијат финансиска поддршка, а мешовити комисии составени од претставници на Советите на родителите, наставничките совети, општинската администрација итн, ќе се погрижат за објективен и транспарентен избор на најдобрите, согласно Правилниците донесени од страна на Советот на општината, за таа намена.
Огласот е објавен на веб страната на општината и ќе трае пет дена од денот на објавувањето, а покрај објавата на општинската веб-страна и социјалните медиуми, истиот ќе биде објавен и на огласните табли на сите воспитно-образовни установи во општината.
Ги повикуваме сите заинтересирани кандидати кои ги исполнуваат условите наведени во огласот, да не се колебаат и да земат учество во изборот“, се додава во соопштението на Општината.
Јавниот оглас и потребните документи за апликација може да ги најдете на следниот линк