Македонија
Дескоска испрати писмо до судовите со инструкции како ќе се работи за време на вонредната состојба во земјата
Почитувани судии и јавни обвинители, адвокати, вработени и други претставници на правосудниот сектор, во овие исклучително тешки времиња за граѓаните дозволете најпрвин да ви посакам на сите добро здравје и надеж за брзо нормализирање и справување со оваа состојба. Воедно, би сакала да ви го честитам и Денот на македонското правосудство и да посакам успешна имплементација на реформите во правосудството, се вели во писмото што министерката за правда, Рената Дескоска, го испрати до правосудниот сектор.
Таа ги информира дека со утврдувањето постоење вонредна состојба во земјата се јавила потреба од донесување уредба со законска сила за роковите во судските постапки за време на вонредната состојба и постапувањата на судовите и јавните обвинителства.
„Оваа уредба се донесе за заштита на здравјето на сите учесници во постапките пред судовите и обвинителствата, без да биде нарушено правилното спроведување на правдата. Во неа е уредено не само прашањето за запирање на течењето на роковите туку и се овозможува одржување расправи и сите дејства на постапките преку интернет со употреба на електронски средства.
Законските и преклузивните рокови за поднесување тужба во парнична постапка, приватна тужба во кривична постапка, предлог за кривично гонење, предлог за поведување вонпарнична постапка, поднесување барање за присилно извршување, постапка за обезбедување на побарувањата, тужба за поведување управен спор, иницирање постапка пред Уставниот суд или иницирање и поведување друга судска постапка, престануваат да течат во моментот на стапување во сила на оваа уредба сè до престанување на вонредната состојба. Роковите за застарување за кривично гонење, поведување и водење прекршочна постапка, за извршување на кривичните и прекршочните санкции престануваат да течат од денот на стапување во сила на оваа уредба, па сè до завршување на вонредната состојба. Во кривичните и прекршочните постапки роковите за изјавување жалба или приговор на одлуките со кои постапката завршува, како и за изјавување на вонредните правни лекови, престануваат да течат од денот на стапување во сила на оваа уредба, па сè до завршување на вонредната состојба“, вели Дескоска.
Исто така, се наведува дека издавањето на упатните акти за изречена казна затвор до три години се одложува до 1 септември 2020 година, освен за предмети каде што постои опасност за застарување на извршувањето на казната. На судиите поротници, на кои мандатот им истекува за време на траењето на вонредната состојба, по сила на оваа уредба мандатот им се продолжува сè до завршување на постапката по судскиот предмет. Доколку некој суд или негово одделение, поради преземени мерки за спречување на ширење на вирусот Ковид-19 (изолација на судии и сл.), не може да постапува по итни предмети, се предвидува дека Судскиот совет ќе определи да постапува друг стварно надлежен суд од ист степен.
Судскиот совет може да донесе одлука и да пропише начин за одржување расправи и преземање на сите други дејства на постапката со користење електронски технички средства, кои обезбедуваат двонасочна комуникација, без заедничко физичко присуство на учесниците во постапката.
„На крајот, апелираме сите судови и јавни обвинителства да се придржуваат на одлуките на Судскиот совет на Република Северна Македонија за постапување на судовите во Република Северна Македонија во услови на зголемена опасност од вирусот Ковид-19 и на задолжителните упатства на Јавното обвинителство на Република Северна Македонија донесени во врска со вирусот Ковид-19, како и на препораките на Министерството за здравство. На сите ви посакувам, пред сè, добро здравје. Заедно и солидарно да ги надминеме опасностите од епидемијата и така со заеднички сили да ги почнеме преговорите со ЕУ. Од сега натаму од сите нас зависи“, се додава во писмото на Дескоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Отфрлени се тужбите на „Европскиот фронт“ од Уставниот суд, ќе има прегласување
До доцна во ноќта Уставниот суд расправаше по тужбите на одлуките на Државната изборна комисија – ДИК за неколку избирачки места поднесени од коалицијата „Европски фронт“. Од судот соопштија за шест одлуки според кои тужбите се отфрлени како неосновани, а тоа значи, согласно одлуките на ДИК, дека ќе има прегласување на конкретни избирачки места.
„Европскиот фронт“ имаше поднесено седум тужби на одлуките на ДИК, а Управниот суд беше ограничен со роковите за нивно решавање.
Со одлуките на Управниот суд се потврдуваат решенијата на ДИК за прегласување во шест избирачки места во петтата изборна единица и едно во шестата изборна единица.
Според Изборниот законик, доколку одлуката за прегласување на едно избирачко место може да влијае на конечните резулатите од изборите, ДИК ќе организира повторно гласање 14 дена од одржувањето на изборите, односно на 22 мај.
Македонија
Фирма од Чаир монтира небезбедно панорамско тркало во Карпош, обвини Град Скопје
Град Скопје информира дека правното лице Дизниленд реквизити, фирма од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, велат од таму.
Македонија
Вработен во МВР фатен со мито од 12.500 евра
Вработен во Министерството за внатрешни работи е фатен со мито од 12.500 евра, соопшти министерот Панче Тошковски. Како што вели тој, лицето И.М. било вработено како виш аналитичар во СВР Скопје. Осомничениот е лишен од слобода под сомневање за сторени кривични дела измама предвидени по чл. 247 од КЗ.
„Од страна на Одделот за внатрешна контрола, криминалистички истраги и професионални стандарди во координација со Одделот за криминалистичка полиција се постапуваше по пријава од три оштетени лица и на ден 17.05.2024 година наведеното лице е фатено на лице место во моментот на примопредавање на 12.500 евра, претходно криминалистички обработени кои ги прибавила за наводно посредување за добивање на социјални станови од Б категорија. Во врска со кривичното дело извршен е претрес во службените простории кои ги користела пријавената при што е пронајдена пообемна сомнителна документација која е поврзана со кривичното дело во вид на разни документи за кои постои сомневање дека се фалсификувани, разни договори за позајмици, договори за посредување за доделување на социјални станови, имотни листови, како и тефтер со ракопис во кој е водена евиденција за лица за кои биле вршени определени работи“, соопшти Тошковски.
При извршен претрес во дом и други простории кои ги користи лицето И.М. лоцирани во Општина Сарај, беше пронајдено и огнено оружје со шест парчиња муниција кое оружје и муниција најверојатно ги поседува без дозвола, за што известено е и Одделението за недозволена трговија со оружје при СВР Скопје заради преземање на дополнителни мерки.
Министерот додава дека МВР и понатаму продолжува со преземање на мерки и активности насочени кон испитување на евентуална поврзаност на наведеното лице со други високи полициски службеници.