Пред нас е најголемиот предизвик во борбата со коронавирусот во кој се очекува достигнување на пикот на бројот на заразени, посочи во денешното обраќање лидерот на СДСМ, Зоран Заев.

Како што вели тој, во овие моменти потребна е многу голема лична одговорност на секој од нас и максимална посветеност во заштита на здравјето на сите околу нас.

„Донесени се нови, заострени мерки од страна на Владата и исклучително е важно нивно целосно почитување. Само така секој човек, секој поединец, секој од нас ќе придонесе во заедничката борба. Да сториме сè преку целосно почитување на мерките и препораките да го спречиме ширењето на вирусот“, порача Заев.

Тој се осврна и на тоа дека кај граѓаните постои загриженост за економијата, за работните места и за месечните приходи.

„Државата е тука и таа ќе ви помогне. Веќе се објавени пакети со сериозни економски мерки, државата спасува над 250 илјади работни места, им помагаме на работниците, на граѓаните, да им обезбедиме приход да ја пребродат кризата. Државата дава 14.500 денари плата за секој работник во фирмите коишто се погодени со кризата. Во овие тешки времиња обезбедивме првична поддршка од 200 милиони евра, им помагаме на 35 илјади фирми да ги ублажат последиците од економската криза. За граѓаните обезбедуваме сериозни финансиски олеснувања, се одложува наплатата на кредити, се стопираат извршителите“, истакна лидерот на СДСМ.

На крајот тој ги повика граѓаните да ги почитуваат мерките, да седат дома, да мијат раце и да држат растојание.

„За животот се работи. Во оваа борба со коронавирусот можеме да победиме, со заеднички сили, со заеднички придонес на секој од нас. Знаеме дека нема да биде лесно, но заедно сме во ова и заедно ќе победиме“, посочи Заев.