Поддршката од Светската банка за справување со последиците предизвикани од Ковид -19, ќе изнесува околу 140 милиони евра. Дел од средствата ќе се намени за нов проект – проект за брзо дејствување против Ковид-19 во износ од речиси 90 милиони евра, а преостанатите 50 милиони евра за мерката „финансиска поддршка од 14.500 денари за вработен“ за работодавци и самостојни вршители на дејност. Ова беше дискутирано во рамките на виртуелните пролетни средби на ММФ и Светската банка на состанокот на потпретседателот за Европа и Централна Азија на Светската банка, Сирил Милер, со вицепремиерката и министерката за одбрана, Радмила Шекеринска, вицепремиерката за економија, Мила Царовска, гувернерката на Народната банка, Анита Ангеловска-Бежоска, и министерката за финансии, Нина Ангеловска.

На состанокот учествуваше и наследничката на Милер, Ана Бјерд, која од 1 мај ќе ја преземе функцијата по завршувањето на неговиот мандат.

Во дискусијата детаљно беа презентирани ефектите од глобалната корона-криза врз мкедонската економија, а беа разгледани и економските мерки за справување со шокот од пандемијата. Од Светската банка позитивно ги оценуваат мерките што во рамките на своите надлежности ги преземаат Владата и Народната банка за кои се смета дека се навремени и таргетирани.

Акцент беше ставен и на стабилноста на финансискиот систем, при што и овој пат беше нагласено дека мора и натаму таа да биде приоритет. Во тој контекст одделно се разговараше за активностите и мерките на Народната банка, кои се однесуваат на стабилноста на банкарскиот систем, која е клучна за одржување и јакнење на севкупната финансиска стабилност. Досега преземените мерки се сметаат за дополнителна гаранција дека стабилноста ќе биде одржана, а особено важно е и што системот има капацитет да се справи со шокот, што се должи и на прудентната регулатива, во голема мера усогласена и со европските регулативи.

Соодветниот одговор на носителите на политиките во однос на предизвиците што ги задава корона-кризата се значаен сигнал за поддршката што Светската банка ја дава за Северна Македонија. Со 50 милиони евра од Светската банка, ќе се поддржи мерката со која ќе се даде финансиска поддршка од 14.500 денари за вработен за исплата на плати во април и мај. Аплицирањето за оваа мерка почнува од почетокот на мај. Освен финансиски, Светската банка учествуваше и советодавно во мерката, а препораките што се базираа на технички анализи, искуства од претходни големи кризи, но и мислења собрани преку консултации со приватниот сектор, вклучително и во Северна Македонија, беа вклучени во главната рамка усвоена од страна на Владата.

Новиот проект за брзо дејствување против последиците од Ковид-19, во износ од 90 милиони евра, се состои од две компоненти. Првата компонента за итен одговор се однесува на зајакнување на здравствените капацитети со обезбедување зголемување на капцитетите за тестирање, техничка експертиза, лабораториска опрема, заштитна опрема, медицински помошни материјали и опрема, реновирање здравствени установи, развој на системи за да се обезбеди навремено откривање случаи и следење контакт во согласност со упатствата на Светската здравствена организација, како и финансирање на придонесот за здравствено осигурување за ранливи корисници. Втората компонента за поддршка на домаќинствата се однесува на обезбедување поддршка за трансфери за ранливи домаќинства погодени од последиците од Ковид -19 и паричен надомест за оние што ги изгубиле работните места како резултат на кризата.

На средбата беа разгледани и проекциите од последниот Регионален економски извештај на Светската банка во согласност со кој се предвидува забавување на економиите на Западен Балкан меѓу -3 и -5,6 отсто. Според Светската банка, Северна Македонија ќе има најмало забавување на економијата помеѓу -1,4 и -3,2 отсто.