Економија
(Видео) Живковиќ: Злоупотребите на работниците нема да се толерираат

„Го дочекавме празникот на трудот, Први мај, во услови како никогаш досега. Целиот свет се бори со невидливиот непријател наречен Ковид-19. Прекинати се работните процеси на голем број на фирми – милиони работнички и работници ширум светот седат дома и се придржуваат на правилата за социјално дистанцирање“, изјави Милан Живковиќ, претседател на Комисија за труд и социјална политика на СДСМ.
Според него, како држава реагиравме брзо, а институциите одлучно и дисциплинирано се носат со одговорноста за справување со ризиците кои ги носи Ковид-19.
„И кај нас дел од преземените мерки беа во насока на прекинување на работните процеси – во некои сектори тоа значеше целосен прекин на функционирањето а во некои само парцијално. Некои од компаниите го трансформираа начинот на работење и воведоа „работа од дома“ – некои од компаниите отпочнаа проекти за реновирање на своите капацитети или пак за трансформација на постоечкото производство во она што е сега есенцијално за пазарот во моменти на криза – а некои од компаниите покажуваат и раст во своите приходи.
Граѓанките и граѓаните со почитување на мерките за социјално дистанцирање се солидаризираа со сите оние кои се во првите линии на борба со вирусот. Многу фирми од технолошкиот сектор изнајдоа креативни начини како да изработат заштитна опрема за нашите здравствени работнички и работници и многумина од нив тоа го направија бесплатно. Голем број на фирми и индивидуи донираа храна за најзагрозените семејства. Државата се погрижи секторите кои беа најмногу погодени да добијат соодветна помош со која ќе се задржат работните места а компаниите ќе успеат да се вратат во нормала со повторното заживување на економијата. Се подржаа и лицата со нетипичните форми на вработување (уметниците од независната сцена, спортистите) а одлучно се пристапи и со обезбедување на финансиска поддршка во висина на минимална плата во секторите кои беа најпогодени од кризата“, истакна тој.
Според него, целта е сите работодавачи да успеат да ги задржат сите работнички и работници и покрај отежнатите услови на функционирање. Во јавноста познати се многубројни примери на работодавачи кои и со приходи од нула денари во овој период, објавуваат дека нема да го намалат бројот на вработените – и тоа е за почит. Успешните работодавачи знаат дека работничките и работниците се тие кои се лицето на фирмите – успешните работодавачи знаат дека работничките и работниците се тие кои се двигателите на напредокот во фирмите – успешните работодавачи знаат дека само со заемна поддршка може да има одржлив развој во фирмите. Добрите и прогресивните работодавачи свесни се дека без разлика дали ќе добијат помош од државата, фирмите треба да им останат верни на своите работнички и работници и во услови на криза. А државата дополнително ќе им помогне на оние кои вложуваат во човечките ресурси во своите фирми.
„Но, тоа не значи дека нема да има работодавачи кои ќе се обидат да ги злоупотребат мерките за финансиска поддршка на фирмите вклучувајќи го и делот за евентуалното намалување на бројот на вработените. Синдикатите и здруженијата на граѓани кои се борат за работничките права веќе ја посочија опасноста од можни негативни ефекти од овие одредби – од прекинување на договори за вработување на неопределно време до присилно префрлање на договори за вработување со неполно работно време. Тука сме да им кажеме на сите дека злоупотребите нема да се толерираат! Заедно ќе застанеме против искористувањето на трудот и заедно ќе се бориме против нехуманиот однос на мал број на работодавачи кои се лош пример за сите оние кои ја покажуваат солидарноста во овие тешки времиња. Нема да дозволиме отпуштања за фирмите да ги намалат трошоците – нема да дозволиме отпуштања за фирмите да го зголемат профитот.Во овие тешки денови, сакаме да ви се заблагодариме за напорите што ги правите, за истрајноста што ја покажувате и за солидарноста која ве краси. Да продолжиме заеднички да се справуваме со кризата што го опфати целиот свет и сигурно ќе ја извојуваме најголемата победа со тоа што ќе ги задржиме работните места на сите“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
МЗШВ: Во четвртиот квартал од 2025 година ќе биде објавен јавниот повик за претприемачите во прехранбената индустрија

Министерството за земјоделство, шумарство и водостопанство ја информира јавноста дека во четвртиот квартал од оваа година ќе биде објавен Јавниот повик 02/2025 за користење на средства од ИПАРД Програмата 2021-2027, мерка 3 – „Инвестиции во основни средства за преработка и маркетинг на земјоделски и рибни производи”.
Оваа мерка претставува исклучителна можност за македонските претприемачи во прехранбената индустрија да ги унапредат своите капацитети и да станат поконкурентни на домашниот и меѓународниот пазар.
Мерката 3 – „Инвестиции во основни средства за преработка и маркетинг на земјоделски и рибни производи”од ИПАРД Програмата овозможува финансиска поддршка за модернизација на преработувачките капацитети, инвестиции за преработка и маркетинг на земјоделски и рибни производи, како и усогласување со европските стандарди. Преку оваа мерка се поддржува зголемувањето на конкурентноста на земјоделското производство и земјоделско-прехранбениот сектор во целина.
Средствата за оваа мерка се обезбедени преку Инструментот за претпристапна помош за рурален развој на Европската Унија (ИПАРД Програмата за периодот 2021 – 2027 година).
Министерството ги повикува сите заинтересирани да започнат со навремена подготовка на потребната документација и да ги следат официјалните објави на Агенцијата за финансиска поддршка во земјоделството и руралниот развој.
Економија
Издадени првите лиценци за батериски систем за складирање на електрична енергија од обновливи извори

Регулаторната комисија за енергетика, водни услуги и услуги за управување со комунален отпад (РКЕ) ги издаде првите лиценци за батериски систем за складирање на електрична енергија од обновливи извори на компанијата ЕНЕРГО СОЛАР СИСТЕМИ.
Станува збор за два батериски системи со вкупна инсталирана моќност од 2 600 kW, што се инсталирани во склоп на две различни фотонапонски електроцентрали кои се веќе изградени и во функција.
„Издавањето на овие лиценци во кои се вклучени батериски системи за складирање на електрична енергија, всушност го означува почетокот на еден нов инвестициски циклус во енергетиката. Воведувањето на батериите во пракса значи забрзана енергетска транзиција преку создавање на одржлив, ефикасен и еколошки енергетски систем во земјава. Во РКЕ очекуваме голем број сопственици на ФЕЦ да поднесат барање за инсталирање на “сториџи“, но исто така очекуваме интерес да појават и компании кои би биле самостојни оператори на складишта само со батериски системи. Употребата на батериите ќе придонесе за сигурно и доверливо функционирање на системите, а едновремено и за економски посигурен и поефикасен енергетски пазар. Истите можат да даваат услуги на операторот на електропреносниот систем за балансирање на истиот, како и одржување на одредени параметри на мрежата во пропишани граници. Складирањето на енергија во периоди кога има вишок и нејзино користење во периоди кога потребите од електричната енергија се зголемуваат се очекува дека ќе влијае и врз намалување на вкупните трошоци во системот.“ посочи Марко Бислимоски, претседател на РКЕ.
Условите, постапката и потребната документација за добивање на лиценца за складирање на електрична енергија се уредена во Законот за енергетика и Правилникот за лиценци, .
Економија
Владата усвои измени: Се укинува ослободувањето од ДДВ за онлајн пратки во вредност до 22 евра

Со цел зајакнување на домашната економија, поддршка на локалните компании и создавање нови работни места, Владата усвои измени и дополнувања на Законот за данок на додадена вредност, со кои се укинува ослободувањето од ДДВ за онлајн пратки во вредност до 22 евра. Законските измени веќе се во собраниска процедура, а нивното спроведување се очекува да има директни позитивни ефекти врз економијата и работењето на домашните компании.
Со оваа мерка, околу 4 милиони денари месечно, колку што во одредени периоди изнесува прометот кон странските онлајн платформи, ќе се пренасочат кон домашното стопанство. Овие средства ќе придонесат за развој на локалните компании, отворање нови работни места и исплата на повисоки плати на вработените.
Ова претставува значаен чекор во заштита и поддршка на домашната економија, особено во услови на зголемена глобализација и дигитална трговија.
Дополнително, измените ќе помогнат во намалување на сивата економија, имајќи предвид дека досегашниот систем овозможуваше злоупотреби – односно увоз на стоки ослободени од данок кои понатаму се продаваат на домашниот пазар.
Со оваа измена, државата испраќа јасен сигнал на поддршка за домашните компании кои создаваат додадена вредност и вработуваат граѓани во земјата, велат од Министерството за финансии.