Македонија
Украинска амбасада: Русија ја занемарува улогата на Украинците во борбата против фашизмот
На 8 и 9 мај, Украина заедно со целиот свет го одбележува Денот на Сеќавањето и Помирувањето во знак на оддавање почит на жртвите во Втората светска војна и Денот на Победата над Нацизмот во Втората светска војна, се наведува во соопштение на украинската амбасада во земјава.
„Во овие денови ние им оддаваме почит на жртвите на војната, го осудуваме нацизмот, тоталитаризмот и агресијата, ги поддржуваме идеалите на мир, хуманизам, демократија и Европско единство. Ние го почитуваме споменот на повеќе од 80 милиони луѓе, чии животи беа одземени како резултат на глобално насилство. Се сеќаваме на луѓето од сите раси и нации, мажи и жени, војници и цивили, мали деца и стари лица – сите оние кои умреа и преживеаја и минуваа низ сите кругови на пеколот на Втората светска војна“, стои во соопштението.
Во него се нагласува и придонесот на Украинците во победата над фашизмот, со цел како што се вели, да се побијат бројните историски фалсификации и политички манипулации што ги формира Руската Федерација за да ја оправда агресивната политика против Украина.
„Денес, во обид да го експроприра поголемиот дел од придонесот во победата над фашизмот, Русија ја продолжува советската пропагандна стратегија за намалување на улогата на западните сојузници. Уште подрско таа ја игнорира улогата на другите народи на СССР, пред се Украинците, чиј придонес автоматски ѝ се припишува на Русија“, велат од украинската амбасада.
Од таму посочуваат дека денес Кремљ води агресивна неофашистичка политика.
„Хипертрофираниот ‘антифашизам’ на Русија е само прикривање на неофашистичката агресивна политика, вооружената војна против Украина и хибридната војна против Европа и целиот демократски свет, која не е секогаш виртуелна“.
Од амбасадата порачуваат дека Украина останува верна на традициите и принципите на антифашизмот и нејзиниот избор на демократскиот и Европски пат за развој.
„Вооружената агресија на Русија што започна во 2014 година беше казна врз Украина за изборот на Европскиот и Евроатлантскиот пат направен на Мајдан. Окупацијата на Крим и одредените области на Донбас – е само дел од планираните ‘Блицкриг’ и ‘Аншлус’ на Украина, кои не успеаја“, се порачува во соопштението во кое се заклучува дека заштитувајќи се со антифашистичка реторика, Русија всушност води агресивна неофашистичка политика во Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
На свечена церемонија, утре Пендаровски ќе и’ ја предаде функцијата на Силјановска-Давкова
Во Кабинетот на претседателот, утре – 12 мај ќе се одржи официјална церемонија на примопредавање на функцијата Претседател со највисоки државни и воени почести.
По свечената церемонија новоизбраната претседателка Гордана Силјановска Давкова и претседателот Стево Пендаровски предвидено е да остварат тет-а-тет средба.
Државната изборна комисија денеска и’ го издаде уверението за избран претседател на Гордана Силјановска-Давкова. ДИК ќе треба да достави извештајот до Собранието за да биде закажана седница за утрешната инаугурација на Силјановска Давкова. Потоа таа пред пратениците ќе треба да даде свечена изјава по која ќе почне нејзиниот мандат.
Мандатот на Пендаровски истекува утре.
Македонија
Aхмети тврди дека со челниците на „Вреди“ во јануари потпишале декларација дека ќе владеат само со партии што поддржуваат уставни измени
ДУИ тврди дека и првите луѓе на коалицијата „Вреди“ (Влен), со кои ВМРО-ДПМНЕ договара коалицирање во новата Влада, се потписници на декларација во која уверуваат дека ќе владеат заедно само со оние политички партии кои се согласуваат да ги поддржат уставните измени.
Лидерот на ДУИ, Али Ахмети на денешниот собир на претставниците и членството на коалицијата рече дека декларацијата била потпишана во јануари годинава.
Во неа, се наведува дека почетокот на преговорите со Европската Унија (ЕУ) носи стратешки и значајни придобивки за нашата земја, а потписниците со обединет глас се придружуваат да одговорат на итната потреба за решавање и стабилност во земјата.
„За овие цели ние како политички партии изјавуваме: ‘Ние, долупотпишаните политички партии, имајќи ја предвид состобата во која се наоѓа државата и должноста што jа имаме кон граѓаните, чувствуваме обврска да изјавиме дека сме целосно решени, сега и во иднина да соработуваме и да владееме заедно само со оние политички партии кои се согласуваат да ги поддржат уставните измени како услов за продолжуванье на процесот на интеграција на земјата во ЕУ. Потписи на партиски претставници (наредени по азбучен ред): Арбен Таравари, Африм Гаши, Али Ахмети, Билал Касами и Изет Меџити“, стои во документот што го прочита Ахмети.
Претпладнево се случи првата рунда на преговори помеѓу ВМРО-ДПМНЕ и Влен, по којашто партиите соопштија дека ги договориле општите начела за идната Влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото.
Од тука додадоа дека двете страни ќе формираат работни групи, на кое ниво ќе продолжат разговорите за коалицирање.
Во изборната кампања, ВМРО-ДПМНЕ и „Вреди“ излегоа со различни ставови за уставните измени, но во повеќе наврати беше потенцирано дека разговорите на таа тема ќе бидат ставени на маса по завршувањето на изборите.
Македонија
„Договорени се општите начела за идната Влада“ – заврши средбата на ВМРО-ДПМНЕ со Влен
Денеска беше остварена средба помеѓу ВМРО-ДПМНЕ и ВЛЕН. Од страна на ВМРО-ДПМНЕ беа присутни претседателот Христијан Мицкоски, потпретседателите Александар Николоски, Владо Мисајловски, Тимчо Муцунски и Гордана Кочоска Димитриеска, како и шефот на кабинет на претседателот Владимир Нелоски, од страна не ВЛЕН беа присутни Арбен Таравари, Изет Меџити, Биљал Касами и Африм Гаши.
„Договорени се општите начела на соработка за идната влада, која ќе се базира на три постулати: евроинтеграции, забрзан економски развој, борба против криминалот и корупцијата и владеење на правото“, објави ВМРО-ДПМНЕ по средбата.
Заклучено е дека двете страни ќе формираат работни групи, на кое ниво ќе продолжат разговорите до нивно финализирање.