Кинескиот претседател, Шји Џинпинг, за прв пат јавно проговори за ескалацијата на трговската војна со САД, велејќи дека Кина не се плаши и нема да попушти пред неправедната репресија. Неговите зборови доаѓаат во време кога меѓународните пазари се под притисок, а стравувањата од глобална рецесија се сè поизразени.

„Нема победници во трговската војна, а спротивставувањето на целиот свет води само до изолација“, рече Шји за време на состанокот со шпанскиот премиер Педро Санчез во Пекинг.

Кси истакна дека економскиот развој на Кина повеќе од седум децении почива на самодоверба и напорна работа, а не на странска помош. Тој додаде дека Кина, без оглед на надворешните притисоци, останува решена да се фокусира на сопствениот развој.

„Без разлика како се менува надворешното опкружување, Кина ќе остане самостојна, концентрирана и фокусирана на добро управување со сопствените работи“, рече тој.

Шји ја искористи средбата со Санчез за да испрати јасна политичка порака до Европската унија. Кинескиот претседател го повика Брисел да се спротивстави на, како што рече, едностраното малтретирање на Пекинг, што е очигледна референца на високите царини што американскиот претседател Доналд Трамп ги наметна на кинески стоки.

„Претседателот Шји Џинпинг ја повика Европската унија да се спротивстави на едностраното насилство со Кина“, објавија утринава кинеските државни медиуми.

Администрацијата на Трамп неодамна ги зголеми царините за кинеските производи на ниво од 145 отсто, што предизвика остри реакции во Пекинг и дополнително го комплицираше глобалниот трговски тек. Кинеските власти веќе најавија борба до крај, а сега Шји за прв пат лично го кажа ставот на Пекинг.

Трамп завчера објави дека за 90 дена ги замрзнува новите царини против сите трговски партнери освен Кина. Европската унија реагираше со паузирање на сопствените најавени контрамерки за 90 дена, што отвори можност за намалување на ескалацијата меѓу Брисел и Вашингтон, но истовремено ја нагласи се поинтензивната трговска војна меѓу САД и Кина.

Општина Центар започна со реконструкција на улицата „Дебарца”, на потегот од улицата „Ленинова” до студентскиот дом „Кузман Јосифовски – Питу“. Се реконструира делница во должина од 220 метри, со целосна санација на коловозната површина од 1.700 квадратни метри, како и обновување на тротоарот од едната страна со површина од 1.000 метри квадратни, извести општина Центар.

„Продолжуваме со реконструкција и санирање на повеќе улици во општината согласно зацртаната програма. Приоритет ни е модерна и квалитетно изведена патна инфраструктура за побезбеден и полесен сообраќај”, изјави градоначалникот Горан Герасимовски.

Овој дел од улицата е во амортизирана и дотраена состојба, со сериозни оштетувања што го отежнуваат нормалното одвивање на сообраќајот. Со реконструкцијата значително ќе се подобрат условите за движење и безбедноста, а ќе се придонесе и за поквалитетно урбано уредување на просторот.

Средствата за реализација се дел од поддршката што Општина Центар ја доби од претходната Влада, во износ од 40 милиони денари, наменети за реконструкција на улиците „Светозар Марковиќ“ и „Дебарца“. Според предвидената динамика, се очекува работите да завршат за два месеци, соопштуваат од општина Центар.

„Приоритет број еден на Владата, е здрава и чиста животна средина. За таа цел обезбедени се средства во буџет во вредност од 3,7 милиони евра за еколошки проекти преку Програмата за инвестирање во животната средина за 2025 година на Министерството за животна средина и просторно планирање“, соопшти Владата.

„Предвидени се 100 милиони денари за изградба и техничка документација за канализациони системи и системи за пречистување на отпадни води, 100 милиони денари за изградба и надградба на водоводни системи, 10 милиони денари за образовни, истражувачки и развојни проекти, како и 19 милиони денари за активности за подигање на јавната свест, едукација и обуки поврзани со животната средина.

Преку поттикнување и финансирање на проекти кои значат заштита и унапредување и одржливо управување ќе придонесеме до почиста животна средина, која е фактор број еден за поквалитетен живот и здравје на сите граѓани.

Ги повикуваме сите општини, здруженија, граѓански организации, научно-образовните институции активно да се вклучат, а рокот на аплицирање трае три недели. Информациите можат да се најдат на официјалната страна на Министерството за животна средина и просторно планирање.

Загадувањето на животната средина е проблем кој ги засега сите граѓани подеднакво и затоа потребно е време за целосно решавање на овој проблем. Затоа преку инвестирање во еколошки проекти ќе обезбедиме почиста животна средина.

Чиста животна средина и здравјето на граѓаните остануваат наша заложба. Проблемите на граѓаните се и наши проблеми, затоа потребно е итно и системско решение“, се додава во соопштението на Владата.