Македонија
Сугарески: Нема намалување на средствата за капитални проекти во Министерството за транспорт и врски
„Нема да има намалување на средствата наменети за капитални инвестиции во ресорот транспорт“, изјави министерот за транспорт и врски, Горан Сугарески, на денешната работна посета на општина Битола, каде што заедно со градоначалничката Наташа Петровска изврши увид во градежните работи за реконструкција и изградба на водоводни и канализациски линии во градот.
Проектот за подобрување на комуналната инфраструктура во Битола е со вредност од над 1 милион евра и опфаќа изградба и реконструкција на водоводи и канализации на улиците Илинденска, Партизанска и АСНОМ.
Министерот Сугарески истакна дека работите на терен напредуваат и се очекува проектот да биде завршен до март в година.
„Тоа што го ветивме пред граѓаните одговорно го исполнуваме. Континуирано и посветено работиме на подобрување на условите за живеење во сите населени места и секој ден сме сè поблиску до остварување на нашата цел за унапредување на целокупната инфраструктура во државата. Реализацијата на капиталните проекти се одвива со добар интензитет и се ноаѓаме среде силна градежна сезона. Проектот за подобрување на комуналната мрежа во Битола е од круцијално значење за жителите на градот, па покрај овој проект, до крајот на мај или почетокот на јуни планираме да објавиме тендер за покривање, санација, реконструкција и дислокација на каналот на сливни води крај стадионот до Буковските гробишта, со што веќе во август би почнале градежните работи.
Во однос на патната инфраструктура, сакам да истакнам дека завршува рехабилитацијата на стариот пат Прилеп – Битола, работиме на изградба на заштитната ограда на обиколницата на Битола, а во тек е изработка на проектна документација за изградба на експресен пат Битола – Меџитлија, која треба да биде завршена до крајот на август. Исто така, до почетокот на јуни ќе бидат објавени тендери за рехабилитација на патните правци Битола – Демир Хисар и Битола – Меџитлија, а преку програмата на ЈП „Македонијапат“ ќе се рехабилитираат уште 5 патишта во Битола, Могила и околината“, изјави министерот за транспорт и врски.
Сугарески додаде дека веќе се реализирани речиси 90 отсто од изградбата на магистралниот гасовод Неготино – Битола, кој се очекува набргу да биде комплетно завршен.
Градоначалничката на општина Битола, Наташа Петровска, нагласи дека Општината има обезбедено средства за непречено изведување на градежните активности и реализација на проектите што се од особено значење за развој на економијата.
„Поддршката на градежните активности значи и поддршка на економијата. Со целокупниот проект, вреден над 1 милион евра, кој вклучува изградба и реконструкција на комуналната линија и коловозот, ќе се создадат подобри услови за живеење на граѓаните, а и значително ќе се олесни сообраќајот. Исто така, сакам да истакнам дека ова е само почеток на силни градежни активности, нè очекуваат голем број проекти, кои ќе се реализираат во текот на оваа година, а за сите нив веќе се обезбедени потребните финансиски средства. Кусо кажано, тоа што го ветивме, го исполнуваме“, изјави градоначалничката на општина Битола, Наташа Петровска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мојсоска: Усеини уништува антифашистичко наследство додека СДС и ДПМНЕ молчат
Од локацијата кај познатата Бела куќа на ул. ,,Димитар Влахов” бр. 9 во Охрид, од каде бескруполозно беше тргната плочата од НОБ, Носителот на ИЕ5 и Генерален секретар на Левица, Јована Мојсоска истакна:
,,Овој културен објект беше уништен од страна на локалниот шериф, Нефи Усеини. Плочата на АСНОМ каде пишува за осудените антифашисти од страна на бугарскиот окупатор, беше тргната пред месец дена. Од градоначалникот Пецаков нема никаква реакција додека се уништува антифашистичкото наследство од страна на поранешниот функционер на ДУИ”.
Мојсоска се наврати кон 2019 година кога беа силни обвинувањата на ВМРО – ДПМНЕ кон Усеини. Според Мојсоска, наспроти тоа, се испоставува дека коалицијата ДПМНЕ – ДУИ сега е уште посилна, благодарение на заедничките бизнис – интереси.
,,Ќе потсетам дека во 2019 година, токму ВМРО-ДПМНЕ обвинуваше дека Усеини го тероризира Охрид. За жал, Охрид го губи својот автентичен изглед, иако за овој објект има Решение за уривање. Институциите молчат, молчи и Министерството за култура кое е раководено од социјал-демократите”, додава Мојсоска за криминалот на поединците и молкот на институциите.
Јована Мојсоска како Носителот на ИЕ5 и Генерален секретар на Левица, порачува:
,,Затоа на 8 мај, да заокружиме број 5, за да ставиме ред во безредието и закон во беззаконието!”
Македонија
ВМРО-ДПМНЕ: ДУИ се обидува да поткупува гласачи дури и во верски објекти, залудни сценарија, секако ќе одат во опозиција
ДУИ се обидува да поткупува гласачи дури и во верски објекти, залудни сценарија, секако ќе одат во опозиција, велат ВМРО-ДПМНЕ преку соопштение.
– Функционери на ДУИ се забележани дури и во места како Виница, Кочани, Берово, Делчево каде во верски објекти со полицајци се обидуваат да поткупуваат гласачи. Со ова се обидуваат да освојат голем резултат, мислејќи дека така ВМРО-ДПМНЕ ќе мора да седне со нив, но се лажат. ДУИ оди во опозиција и со тоа треба да се помират. Залудно е и полнењето кутии. Примерите кои се нотирани во Липково, не им помогнаа во првиот круг, нема ниту сега во вториот. Времето кога го купуваа гласот на народот завршува. Време е Македонија да ја вратиме на народот. Македонија повторно твоја, – додаваат од партијата.
Македонија
СДСМ: Глас ЗА СДСМ на 8 мај е глас за слобода, демократија и европска држава
Гласот ЗА СДСМ на 8 мај е глас за слобода, демократија и европска држава, за чување на темелите на државноста, демократските вредности, внатрешната кохезија, стабилни етнички односи, безбедна и европска иднина на Македонија, велат од СДСМ преку соопштение.
– СДСМ ја врати слободата, ја врати државата на вистинскиот пат. Директна потврда дека со СДСМ се почитуваат демократските и европските вредности е последниот извештај на „Репортери без граници“, според кој Македонија е на 36-тото место и најдобро позиционирана во регионот, по слободата на медиумите. Во 2016 година бевме на дното, рангирани на 118-то место. Тогаш слободно кажаниот збор се казнуваше, медиумите беа цензурирани, граѓаните беа манипулирани. Враќање на режимот на ДПМНЕ во најава, би значела сигурна блокада на Македонија и внатрешни етнички тензии, што би и нанело огромна штета на иднината на државата. Преголема моќ за десничарска партија како ДПМНЕ која воопшто не е променета, ќе претставува сериозна закана од враќање на заробена држава, поделби, уцени и закани. Затоа е важно граѓаните да излезат на 8 ми мај масовно и да гласаат, заедно со СДСМ да не дозволат враќање назад, – додаваат од партијата.