Свет
Секој нелегален мигрант во карантин ја чини Италија над 4.000 евра месечно
Илегалните мигранти, кои беа ставени во карантин на бродот „Моби Заза“ откако стигнаа во Италија како мерка за спречување на ширењето на коронавирусот, се проценува дека ги чинат италијанските даночни плаќачи повеќе од 4.000 евра месечно по човек, пренесува „Ил џорнале“.
На траектот, кој треба да биде закотвен на три до пет километри од брегот од сицилијанскиот град Порто Емпедокле, има околу 250 лица, вклучувајќи 35-член медицински персонал за да им помогне на мигрантите кои ќе бидат ставени во карантин за да се потврди дека не се заразени од вирусот.
Алесандро Пагано, член на „Лига“ на Матео Салвини, откри дека владата ѝ дала повеќе од милион евра на компанијата „Моби Лајн“ за изнајмување на траектот од нив.
„Компанијата ‘Моби Лајн’ ќе добие помеѓу 900 илјади и 1,2 милиони евра: значи околу 4.210 евра месечно по мигрант“, рече тој.
„Тука не зборуваме за бротче, туку за брод опремен со ресторан за самопослужување, пицерија, сладоледџилница, паб со специјален асортиман на вино, простории за игра и видеосала, двокреветни и четворокреветни кабини, па дури и луксузни апартмани. Сето ова додека италијанските семејства и бизниси се на колена поради сериозната економска криза предизвикана од пандемијата на Ковид-19“, додаде Пагано.
Италија забележа нов мирантски бран во последните неколку недели и покрај мерките за изолација поради коронавирусот кои ги донесе владата на премиерот Џузепе Конте.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Словачка ја разгледува Полска како нова рута за увоз на гас
Словачкиот претседател, Петер Пелегрини, ја поздрави можноста земјата да увезува гас преку Полска, како алтернатива на рускиот природен гас.
По средбата со полскиот колега Карол Навроцки, Пелегрини истакна дека поврзувањето на гасните мрежи би овозможило диверзификација на енергетскиот увоз, доколку цените и транзитните такси бидат разумни.
Навроцки најави дека Полска има план да стане регионален центар за снабдување со американски течен гас. Двајцата лидери ја истакнаа важноста од инфраструктурното поврзување и имаат усогласени ставови за миграцијата и безбедноста во рамките на НАТО.
Свет
Мексико: Сопругата на убиениот градоначалник ја презема неговата функција
Сопругата на градоначалникот кој беше брутално убиен за време на прославите на Денот на мртвите во мексиканската држава Мичоакан, која е погодена од насилство, ја презеде функцијата на својот сопруг, ветувајќи дека ќе продолжи со неговата борба против организираниот криминал, објави Ројтерс, цитиран од БТА.
Гресија Кирос положи заклетва како градоначалник на Уруапан, познат како престолнина на авокадото во Мексико, откако државниот конгрес едногласно го одобри потегот.
„Денес доаѓам со скршено срце затоа што ми го одзедоа партнерот во животот, таткото на моите деца, но и со храброста со која тој се спротивстави да се бори“, рече Кирос за време на положувањето заклетва.
„Тие нема да ме замолчат… Ќе ги следам неговите стапки“, додаде таа, држејќи ја шапката на нејзиниот покоен сопруг како симбол на нивното движење.
Вооружен човек со качулка го застрела и уби 40-годишниот Мансо додека присуствуваше на фестивал со свеќи, во напад што предизвика национален бес, делумно поради неговите отворени критики кон федералната влада дека не презема доволно мерки за борба против организираниот криминал.
Свет
Русија тврди дека украински војници се предале во Покровск
Рускиотo Министерство за одбрана соопшти дека украински војници од 68. ловечка бригада се предале во Покровск, откако биле опколени и, како што тврди Москва, напуштени од своите команданти, пренесе „ТАСС“.
Во соопштението се наведува дека припадниците доброволно се предале поради интензивен артилериски оган. Русија објави и сведоштва на заробени војници, кои велат дека биле без храна и лекови, а еден од нив изјавил дека се предал од очај.

