Венко Филипче и Ден Дончев, едни од најблиските луѓе и соработници на Зоран Заев, се замешани во безброј скандали и афери, но еден од најкоруптивните случаи на оваа Влада, што ги поврзува и двајцата, е случајот „Рекет 2“, преку кој изнудувале пари од фирмата „Дијамед“, посочи на денешната прес-конференција портпаролот на ВМРО-ДПМНЕ, Димче Арсовски.

„Ден Дончев рекетирал 824.000 евра од фирмата ‘Дијамед’. Замислете, Дончев, рекетирал од фирмата ‘Дијамед’, само за да им ги врши навремено исплатите што законски следуваат за оваа фирма, која се занимава со дијализа“, нагласи Арсовски.

Портпаролот посочи дека човекот што ги зел парите од фирмата „Дијамед“ и ги разнесувал бил истиот што веќе е осуден во случајот „Рекет 1“, каде што ги зема парите во торбата „луј витон“.

„Очигледно, главата на октоподот, Зоран Заев, користел еден ист човек за собирање на рекетот од бизнисмените. Дончев и Филипче се обидоа насилно да спречат продажба на фирмата ‘Дијамед’ на странска компанија бидејќи биле свесни дека нема да може понатаму да рекетираат компанија од ЕУ и ќе бидат разоткриени, а по тоа и ќе одговараат“, истакна Арсовски.

Тој врз основа на изнесеното заклучи дека коруптивноста и криминалот се главната работа што ја извршуваат функционерите на СДСМ.

„Три години ништо друго не прават, единствено се занимаат со криминал и корупција, но не да спречат, туку самите да реализираат“, рече портпаролот на ВМРО-ДПМНЕ и порача дека за таквиот криминал, ќе има одговорност веднаш штом Заев си замине и ги ослободи канџите од правосудството.