Свет
Наталитетот во Унгарија зголемен 5,5 отсто по донесувањето просемејни политики
Унгарија бележи раст од 5,5 отсто на наталитетот од минатата година кога земјата воведе просемејни политики, пренесува „Брејтбарт“.
Државниот секретар за семејство и млади, Каталин Новак, во четвртокот на „Твитер“ објави дека Унгарија бележи пораст и во бројот на новородени и раст од 5,7 отсто на стапката на плодност во првите четири месеци од годинава во однос на истиот период во 2019 година .
„Повторно добра вест!“, изјави таа додавајќи дека годинава е зголемен и бројот на регистрирани бракови за еден и пол пати во однос на претходната година.
Good news again! Compared to last year's same period, in the first 4 months of 2020:
– Birth rate increased by 5,5%
– Fertility rate increased by 5,7%
– One and a half times more marriages were concluded#FamilyFirst #FamilyFriendly— Katalin Novák (@KatalinNovakMP) June 11, 2020
Извештајот доаѓа откако Унгарија минатата година донесе закони што го поддржуваат семејството вклучувајќи и акциски план за заштита на семејството, со кои се зголемија трошоците на владата за семејствата за 224 милијарди унгарски форинти (619 милиони евра).
Унгарија е подготвена да понуди бесплатно вештачко оплодување за паровите што сакаат деца, со цел да ја зголеми националната стапка на наталитет на 2,1 деца до 2030 година.
„Европа е на крстопат. Западна Европа се обидува да го реши проблемот со демографијата со едноставни решенија, кои нудат само краткорочен успех, но кои ќе донесат катастрофални последици на долг рок. Нам не ни требаат бројки, туку деца во Унгарија. Не сакаме да го одржиме економскиот систем, туку Унгарија, унгарската нација и унгарската историја. Сакаме да го охрабриме продолжувањето на нашите семејства за неколку генерации“, изјави портпаролот на владата минатата година.
Премиерот на Унгарија, Виктор Орбан, е главен поборник на просемејните политики за зголемување на наталитетот на неговата земја наспроти масовната миграција.
„Демографската криза мора да се реши со моќни напори на државата, мора да креираме политики фокусирани на демографијата. Кога зборуваме за семејства и семејни субвенции, ние ги поддржуваме традиционалните семејства“, рече тој во септември минатата година.
Унгарската влада објави мерки според кои ќе им понуди до 27.000 евра на брачните двојки што имаат три деца. Меѓу многуте просемејни политики е и владиниот грант од 10 милиони форинти (27.000 евра), кој првично е планиран како заем, но може да биде целосно простен кога двојката ќе добие најмалку три деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Детали од пропаднатиот мировен договор меѓу Русија и Украина: „Киев да гарантира трајна неутралност, а Москва да не напаѓа“
Русија и Украина беа блиску до постигнување мировен договор во пролетта 2022 година, според кој Киев бил подготвен да се посвети на неутралност, пренесува „Велт“ повикувајќи се на нацрт-договорот.
Повикувајќи се на документ од 17 страници од 15 април 2022 година, германскиот весник наведува дека Москва и Киев постигнале начелен договор и дека преостанатите разлики ќе бидат „измазнети“ на самитот меѓу претседателите на Русија и Украина, Владимир Путин и Володимир Зеленски.
Според „Велт“, Украина тогаш се обврзала на „постојана неутралност“ без присуство на странско оружје или војници, како и да не „прима, произведува или стекнува“ нуклеарно оружје. Киев, наводно, гарантирал и дека нема да одржува воени вежби со други земји.
За возврат, Русија се обврза да не ја напаѓа Украина, а Киев можеше да добие безбедносни гаранции од САД, Велика Британија, Франција и Кина. Доколку Украина биде нападната, нејзините гаранти ќе го поддржат нејзиното право на самоодбрана во рок од три дена, со ратификација на соодветните договори од секоја држава учесничка, што ќе ги направи правно обврзувачки.
„Велт“ наведува и дека договорот го исклучил рускиот полуостров Крим, како и делови од Донбас од какви било безбедносни гаранции дадени на Украина.
Сепак, не е јасно кои делови на Донбас беа опфатени со клаузулата. Весникот наведува дека иако Русија сакала да се утврдат точните граници на самитот Путин-Зеленски, Киев одбил, инсистирајќи дека тие се засновани на украинско толкување.
Во исто време, Москва наводно сигнализирала дека е подготвена да ги повлече своите војници од украинска територија, но не и од Крим и Донбас. И тоа требаше да разговараат Путин и Зеленски.
Двете страни, исто така, наводно имале големи несогласувања околу големината на украинската војска, бидејќи Киев сакал да задржи многу повеќе војници отколку што Москва била подготвена да дозволи.
„Велт“ објави дека Москва бара рускиот да стане втор официјален јазик во Украина. Русија, наводно, побарала укинување на сите меѓусебни санкции и отфрлање на тужбите, истовремено повикувајќи го Киев да го забрани нацизмот и „агресивниот национализам“. Украина ги одби тие барања, пишува весникот.
Коментирајќи го сега пропаднатиот договор, еден украински преговарач за „Велт“ изјави: „Тоа беше најдобриот договор што можевме да го постигнеме“. Преговарачот исто така изјави дека Киев бил во посилна преговарачка позиција во 2022 година отколку сега.
Руските власти претходно потврдија дека Украина и Русија се блиску до мировен договор, но тврдеа дека напредокот е закочен од тогашниот британски премиер Борис Џонсон, кој наводно го советувал Киев да продолжи со борбите. Џонсон ги отфрли обвинувањата.
Свет
„Смрт за Америка и Израел“: Хутите тврдат дека собориле американски борбен дрон
Јеменската милитантна група Хути соопшти дека соборила американско борбено беспилотно летало MQ-9 Reaper и објави видео на кои се прикажани делови од дронот.
Хутите тврдат дека го собориле дронот со проектил земја-воздух, дел од новата серија напади на бунтовниците оваа недела, по релативно затишје во војната меѓу Израел и Хамас во Појасот Газа.
Пентагон, Централната команда на САД и американските воздухопловни сили не ја коментираа изјавата на милитантите, но Си-Би-Ес Њуз цитираше неименуван американски функционер кој потврдил дека дронот се урнал во Јемен.
Видеото објавено од Хутите вклучува ракета која е лансирана кон беспилотно летало, а во позадина се слуша како човек го рецитира слоганот на групата по ударот на авионот: „Господ е најголем, смрт за Америка, смрт за Израел, проклетство на Евреи, победа на исламот“.
На видеото се прикажани и неколку главни делови од дронот, вклучувајќи го и логото на General Atomics, која го произведува авионот, како и серискиот број.
Свет
Апокалипса во Кина: силно торнадо руши се’ пред себе, 5 загинати и многу повредени
Најмалку пет лица загинаа, а 33 се повредени во силно торнадо што денеска го погоди јужниот кинески град Гуангжу, јави кинескиот јавен сервис CGTN.
Сеизмолошкиот институт соопшти дека торнадото било на ниво 3, што е две нивоа под највисокото, а увидот за материјалната штета е во тек, објави државната новинска агенција Ксинхуа.
Метеоролошката станица во селото Лијангтиан во округот Бајин, на околу три километри од местото каде што потекнува торнадото, попладнево забележа максимален удар на ветер од 20,6 метри во секунда.
Претходно во текот на денот, градските власти издадоа предупредувања за можна појава на грмотевици, дожд, град и торнада во многу окрузи.
Ова доаѓа додека провинцијата Гуангдонг се бори со рекордни поплави предизвикани од обилните дождови, кои однесоа најмалку четири животи и раселени десетици илјади луѓе низ неколку градови.
Најмалку 10 лица се водат како исчезнати.