Свет
Пиромани се обиделе да запалат катедрала во Франција
Неидентификувани пиромани поставиле голема канта за отпадоци наспроти страничната врата на катедралата „Сен Пјер“ во Рен кон крајот на минатата недела и ја запалиле содржината во очигледен обид да ја запалат црквата, пренесува „Оест Франс“.
Пожарникарите од Рен пристигнале навреме за да го изгаснат пожарот, за кој веруваат дека бил намерно подметнат. Инцидентот се случил во текот на ноќта меѓу 11 и 12 јуни.
Сопственикот на еден ресторан во соседството го забележал и го пријавил пожарот околу 2 часот по полноќ.
„Почна да мириса на изгорено, па отидов да видам дали мирисот доаѓа од нашите кујни. Се качив на вториот кат и го отворив прозорецот што гледа кон црквата. Мирисот беше сè посилен и ги видов соседите како трчаат со кофи вода. Ми рекоа дека катедралата е во пламен“, вели тој.
Благодарение на брзата интервенција на пожарникарите, пожарот бил ставен под контрола пред да предизвика сериозна штета во црквата. Судската полиција ја презеде истрагата за подметнувањето на пожарот.
„Немаше упад во зградата, но вратата беше оштетена и делумно беше уништена од пламенот, а од чадот се поцрнети и плочникот и скалите пред црквата“, рече отец Ерван Делахеј, пасторот од катедралата.
Регионалната дирекција за култура (ДРАК) ги повика локалните занаетчии да извршат привремена поправка.
Во април 2019 година париската катедрала Нотр Дам се запали и претрпе огромна штета. Инспекторите не веруваат дека пожарот бил намерно подметнат, но непосредно пред пожарот во Нотр Дам, десетина католички цркви беа осквернавени низ Франција за само една недела.
За време на таа недела во март 2019 година, пироманите ја запалија црквата Сен Сулпис – една од најголемите и најважни цркви во Париз. Трошоците за реставрација на црквата од пожарот беа проценети на неколку стотици милиони евра.
Во Ним, во близина на границата со Шпанија, црквата Нотр-Дам де Енфант беше осквернавена на особено грозен начин- провалниците нацртале крст со човечки измет, ги ограбиле главниот олтар и табернакулот и ги украле осветените поскури, кои биле откриени подоцна меѓу купиштата ѓубре.
Во црквата Нотр Дам во Дижон, во Бургундија, беше оштетен високиот олтар, а вандалите ги извадиле осветените поскури од табернакулот, ги расфрлале на земја и ги изгазиле.
Група млади луѓе ја осквернавија селската црква Лаваур, во јужниот оддел на Тарн, извртувајќи ја едната рака на скулптурата на распнатиот Христос за да се чини дека тој прави непристоен гест. Иако медиумите се двоумеа да му припишат одредено религиско или културно потекло на сквернавењето, инцидентите имаа јасен антихристијански карактер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украинците објавија снимка: Го уништивме рускиот систем Бук, не можеа да го изгаснат пожарот
Украинските сили за специјални операции тврдат дека го уништиле лансерот на рускиот противвоздушен ракетен систем Бук на линијата на фронтот во регионот Суми.
Според извештаите, операторите во украинската единица забележале руски противвоздушен ракетен систем Бук-М1 додека изведувале борбени операции на фронтот.
Операторите потоа користеле нападни беспилотни летала за да ја нападнат целта. Русите неуспешно се обиделе да го изгаснат пожарот и да ја спасат својата опрема, тврдат Украинците. Тие споделија и видео на кое се гледа експлозијата и последователниот пожар.
Украинците наведуваат дека лансерот со шест проектили бил уништен со прецизен удар. Инаку, Украинците во вторникот пријавија и уништување на два Бука на истиот дел од бојното поле.
Свет
Турција ја прекина целата трговија со Израел
Турција од вчера го прекинува целиот извоз и увоз со Израел, соопшти турското Министерство за трговија, наведувајќи ја како причина „влошената хуманитарна трагедија“ на палестинските територии.
„Суспендирани се извозни и увозни трансакции поврзани со Израел и тоа се однесува на сите видови производи“, соопшти турското Министерство за трговија.
„Турција строго и решително ќе ги спроведе овие нови мерки додека израелската влада не дозволи непречен и доволен проток на хуманитарна помош во Газа“, се додава во соопштението.
Израелскиот министер за надворешни работи Израел Кац изјави претходно вчера дека турскиот претседател Реџеп Таип Ердоган „ги прекршил договорите (меѓу Израел и Турција) блокирајќи го израелскиот увоз и извоз на пристаништата.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.