Свет
Отпуштени директорите на американските јавни медиуми

Сојузникот на американскиот претседател Доналд Трамп го смени целото раководство на американските јавни медиуми, како што се „Гласот на Америка“ и Радио Слободна Европа, предизвикувајќи стравување од политизација на информациите на овие медиуми основани за промовирање на идеалите за слобода и демократија во светот.
Директорите на „Гласот на Америка“ (ВОА), Радио Слободна Европа/Радио Слобода, Радио Слободна Азија, „Ал Хура“ и Радио Марти деновиве поднесоа оставки или, пак, се отпуштени од Мајкл Пак, новиот директор на Американската агенција за глобални медиуми (УСАГМ), соопштија пратениците од Конгресот.
Директорката на ВОА, Аманда Бенет, и нејзината заменичка Сенди Сугавара, искусни новинарки, објавија дека поднеле оставка во моментот кога Пак, близок соработник на Стив Банон, поранешен директор на претседателската кампања, се подготвувал да ја преземе функцијата.
Пак ги отпуштил другите директори на медиуми во средата и ги распуштил нивните надзорни одбори. УСАГМ не одговори на барањата на АФП за појаснување.
Агенцијата треба да биде независна, финансирана од сојузни средства и да обезбедува објективни информации за земјите во кои нема независни медиуми.
Неколку демократски пратеници изразија загриженост дека Трамп ја засилува контролата врз тие медиуми. „Мајкл Пак потврди дека неговата политичка мисија е да ја уништи независноста на УСАГМ и да ја ослаби нејзината историска улога“, рече демократскиот сенатор Боб Менендез.
Џенет Стиле, експерт за јавна дипломатија од Универзитетот „Џорџ Вашингтон“, смета дека отпуштањата ги потврдуваат најлошите стравувања од оние што сметаат дека назначувањето на Мајкл Пак е дел од обидот да се претвори УСАГМ во меѓународна пропагандна алатка на администрацијата на Трамп.
Во април Белата куќа ја обвини ВОА за ширење кинеска пропаганда за пандемијата на коронавирусот и им забрани на владините здравствени советници да зборуваат со своите новинари.
„Тој вид флагрантно политичко мешање отсекогаш претставуваше норма во земјите во развој“, рече таа. „Но, не и во САД“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
ОН повика на деескалација на протестите во Лос Анџелес

Обединетите нации ги повикаа сите вклучени во немирите во Лос Анџелес да ја деескалираат ситуацијата откако демонстрантите се судрија со службениците за имиграција поради притворањето на нелегални мигранти.
„Не сакаме понатамошна милитаризација на ова“, изјави портпаролот на ОН, Фархан Хак, во Њујорк, како одговор на германската агенција ДПА.
„И ги охрабруваме страните на локално, државно и федерално ниво да работат на тоа да се случи ова. Се надеваме дека сите страни на терен ќе ја деескалираат ситуацијата“, додаде Хак.
Претседателот Доналд Трамп им нареди на припадниците на Калифорниската Национална гарда да влезат во Лос Анџелес за време на викендот и покрај противењето на гувернерот Гевин Њусом. Им беше наредено да дејствуваат против демонстрантите кои протестираа против рациите на федералните агенти за имиграција насочени кон нелегалните мигранти.
Трамп верува дека ситуацијата во градот на западниот брег на земјата, каде што луѓето масовно протестираат од петокот поради постапките на агентите на Службата за имиграција и царина (ICE), излезе од контрола.
Градската полиција одговори со солзавец и гумени куршуми додека демонстрантите палеа автомобили и фрлаа молотови коктели. Уапсени се неколку десетици луѓе.
Трамп не ја исклучи можноста за распоредување дополнителни трупи, а денес се закани дека неговиот шеф на граничната патрола, Том Хоман, ќе го уапси Њусом за попречување на напорите за спроведување на имиграциските закони.
„Овие луѓе треба да пораснат“, изјави Њусом за NBC News.
„Таквото брборење е заморно. Затоа, Том, уапси ме. Ајде да одиме“, вели тој.
Свет
(Видео) Исчезнати лица, поплавени улици и населби: силно невреме во Букурешт

Силно невреме го погоди Букурешт.
Поројните дождови предизвикаа хаос, десетици улици беа поплавени, дрвја паднаа врз автомобили, а сообраќајот беше блокиран во неколку населби. Поплавен е и трговски центар, а клиентите беа евакуирани, вклучително и оние што беа во киното.
Today, Bucharest transformed into a Venetian scene after the heavy rains pic.twitter.com/wGIeJ3eDgq
— Brave Romania (@brave_romania) June 9, 2025
Неколку летови не можеа да слетаат на главниот аеродром и беа пренасочени, според локални медиуми.
This evening: Berceni, Bucharest, Romania https://t.co/u26lVF0Yeg pic.twitter.com/WO0B4eUmJj
— Weather Monitor (@WeatherMonitors) June 9, 2025
Во близина на Букурешт, две лица беа однесени од пороите во чамец што претходно се превртел.
По едно лице сè уште трае потрагата.
Градскиот транспортен оператор STB издаде предупредување кратко по почетокот на бурата, наведувајќи повеќекратни блокади на трамвајски линии. За неколку минути, неколку линии беа целосно прекинати или пренасочени, а патниците мораа долго да чекаат на станиците, во поројниот дожд.
Неколку автобуски линии беа целосно блокирани од вода, а дрво што падна на електричната мрежа запре одредени линии.
Слична беше ситуацијата и со трамваите, кои не можеа да сообраќаат поради паднати дрвја и гранки.
Неколку населби во Букурешт беа парализирани поради огромната количина вода. И центарот и периферијата ги почувствуваа последиците од невремето. Водата навлезе во подрумите на бројни станбени згради, а беа уништени и дворовите на приватните куќи. Има и извештаи дека водата навлегла во домовите, што бара итна интервенција на пожарникарите.
Свет
Медински: Ако Киев и НАТО се обидат да ги вратат новите руски региони, ќе следи нуклеарна војна

Помошникот на рускиот претседател Владимир Путин, Владимир Медински, денес изјави дека ако Киев и НАТО се обидат да ги вратат новите региони на Руската Федерација, ќе има нуклеарна војна.
Во интервју за Раша тудеј, Медински рече дека може да се случи нуклеарна војна ако конфликтот во Украина престане без да се склучи вистински мир, бидејќи, според него, Киев и НАТО ќе се обидат да ги вратат новите територии на Руската Федерација, пренесува ТАСС.
„Ако го запреме конфликтот по линијата на фронтот и не се договориме за вистински мир, туку само склучиме некаков вид примирје, тогаш ова ќе биде – знаете, имаше спорен регион меѓу Ерменија и Азербејџан, Карабах – тогаш овој регион ќе се претвори во огромен Карабах“, рече Медински, кој е шеф на руската делегација на разговорите со украинската страна.
Тој рече дека Москва не сака да создаде „џиновски Карабах, непризнаен од никого, поради кој може да избувне нуклеарна војна“.
„По некое време, Украина, заедно со НАТО, со своите сојузници, ќе се приклучи на НАТО, ќе се обиде да го врати, а тоа ќе биде крај на планетата, тоа ќе биде нуклеарна војна“, рече Медински.
Тој додаде дека Русија затоа сака да се склучи „целосен мир“.
„Затоа, сакаме да ја запреме војната, да склучиме целосен мир и да ги признаеме новите територии“, рече Медински, зборувајќи за териториите што Русија ги презеде од почетокот на војната во Украина, пренесува Танјуг.