Македонија
(Видео) Кекеновски: Ќе побараме уставни промени за укинување на имунитетот на носителите на јавни фунции

„Покрај стратешките определби, ние како коалиција подготвивме и краткорочни приоритети со цел да докажеме дека прво сме сериозна коалиција и второ, сето тоа што ќе го ветиме, ќе го реализираме. Во првите триесет дена од нашиот избор ќе побараме ургентна промена на Уставот, односно уставни промени со коишто ќе го укинеме имунитетот на носителите на јавни фунции. Кога говорам за имунитет, говорам за имунитетот на пратениците, за имунитетот на претседателот на држава, на судиите и обвинителите, на членовите на републичкиот судски совет, советот на јавни обвинители и Уставниот суд. Значи единствено сметаме дека е реално имунитет да има претседателот на државата и посебно сметаме дека нема потреба да се кријат зад имунитет сите носители на јавни фунции, доколку си ја извршуваат функцијата совесно и чесно“, изјави Јове Кекеноски, кандидат на Единствена Македонија.
Тој вели дека ќе се заложи во првите триесет дена за укинување на енормните патни трошоци кои ги добиваат пратениците кои што доаѓаат од внатрешноста и на сите да им се принава патни трошоци во висина на автобуска карта на редовна автобуска линија.
„Понатаму, укинување на функцијата заменик-министер и заменик-претседател на Владата за спроведување на рамковниот договор од причина што рамковниот договор е одамна спроведен, меѓутоа од друга страна и се проширени неговите рамки, па од таму ќе се залагаме за негова ревизија. Трето, распуштање на Уставниот суд и нов состав и избор на нов составен од стаменити и стручни персони кои имаат знаење, капацитет и дигнитет, а не како досега, партиски послушници кои реагираат на повик на оние коишто ги делигирале и коишто им дале поддршка во институциите.
Укинување на одредби од Изборниот законик кои протежираат бипартизам, наместо мулти партизам и секако укинување на одредбите што се однесуваат на техничката Влада на сто дена пред изборите.
И шесто, од овие краткорочни приоритети гарантираме дека најмногу за шеесет дена од од нашиот избор ќе ги изнесеме на површина сите нејаснотии и нелогичности кои се поврзани со носителите на власта како „Рекет 1” и „Рекет 2”, случајот „Империја” и ќе бараме најстроги казни за сите инволвирани страни во овој случај. Ќе ги казниме сите виновници од власта кои му овозможија на поранешниот премиер да побегне од лицето на правдата.
Исто така, во првите шест месеци од изборите ќе направиме генерално прочивствување на судството, Обвинителството и полицијата во смисла да го преиспитаме стручниот капацитет на сите овие носители на јавни функции. Понатаму, да го преиспитаме потеклото на имотот на судиите и обвинителите. Да ги преиспитуваме одлуките што тие ги донеле и секаде онаму каде што ќе се утврдат аномалии би требало да ја завршат својата функција и да сносат соодветна материјална и кривична одговорност. Преиспитување на стекнатиот имот на сите оние коишто биле на власт во последниве дваесет и повеќе години и конфискација на нелегално стекнатиот имот“, вели Кекеновски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Владата блокира уште 173 интернет-страници за онлајн-коцкање, информира Меџити

Владата донесе одлука за блокирање на 173 интернет-страници за онлајн коцкање, кои на нелегален начин нудеа услуги за игри на среќа во нашата земја, изјави вицепремиерот, Изет Меџити.
„Заедно со 53-те страници што беа блокирани минатиот месец, оваа бројка сега изнесува 226. Замислете за помалку од два месеци затворивме 226 страници за нелегално онлајн коцкање – и оваа бројка не е конечна. Само замислете за еден миг колку длабоко и колку далеку има навлезено мафијата на коцкањето во нашите животи и каква штета има предизвикано кај поединци и семејства погодени од оваа епидемија“, рече тој.
Според него, ова е директен удар врз една криминална мрежа која со години била толерирана и заштитена од структури тесно поврзани со претходната власт.
„За жал, една политичка партија која денес се претставува како чувар на правата и достоинствениот живот на Албанците, беше главен спонзор на коцкањето и вклучувајќи се директно во оваа индустрија, ова политичка партија и го даде на коцкарската мафија потребниот политички штит за да расте и се развива без да ја загрози никој. Како последица, нашите населби беа преполнети со казина, а нашите телефони, таблети и компјутери станаа цел на напад од нелегалните платформи за игри на среќа. Тоа што ДУИ му го направи на албанското општество во Северна Македонија е тешка катастрофа – и за ова катастрофа одговорност ќе има“, рече Меџити.
Ако до вчера имавме казина покрај училиштата, покрај домовите, покрај животите на нашите деца, додаде тој, денес воспоставуваме ред, закон и достоинство.
„До вчера ДУИ градеше коцкарски империи врз сиромаштијата и очајот на Албанците. Денес, ВЛЕН ги урива тие империи на криминалот и ја гради иднината“, рече Меџити.
Според него, за само за една година делувањето на игрите на среќа во земјата е намалено за 40%
Македонија
Граѓаните ќе можат од својот дом да симнат и испечатат документи, наместо да одат на шалтер

Со гордост сакам да ви соопштам дека вчера, на Комисијата за транспорт и дигитална трансформација, 4 клучни закони кои се однесуваат на дигитализација на државните служби и услугите кон граѓаните, го поминаа првиот собраниски филтер, изјави Тони Јаревски, пратеник на пратеничката група на ВМРО-ДПМНЕ.
Станува збор за Законот за електронски комуникации, Законот за безбедност на мрежи и информациски системи, Законот за архивски материјал, како и Законот за електронски документи и електронска идентификација.
„Со ова, Собранието даде зелено светло за владата да ја направи најтемелната трансформација на односите, односно начинот на кој комуницираат граѓаните и државните органи. Со овие реформи, граѓаните ќе можат од својот дом да симнат и испечатат документи кои ќе имаат правна важност еднаква како оние издадени на шалтер, документи кои ќе содржат QR-код како безбедносен елемент и доказ за автентичност“, рече Јаревски.
Тој додаде дека се воспоставува и целосен инспекциски надзор над дигиталните услуги, со јасно утврдени 22 задолженија на инспекторите кои ќе дејствуваат под капата на новото Министерство за дигитализација односно за дигитална трансформација.
„Предвидените глоби за институциите што нема да ги прифатат дигиталните документи се јасен сигнал дека дигиталната реформа не е опција, туку обврска“, рече Јаревски.
Тој додаде дека ќе следи јавна расправа за овие закони со цел во овој, како што рече, сериозен државен зафат да се вклучи експертската и стручната јавност.
Македонија
Успешно изведени две трансплантации на коска од починат донор на Клиниката за ортопедски болести

На Клиниката за ортопедски болести успешно се изведени две сложени трансплантации на коска од починати донори, со што продолжува примената на современи и високоспецијализирани медицински интервенции во областа на ортопедија и трауматологија во нашата земја, соопштија од Министерството за здравство.
Во првиот случај, е извршена операција на коскена циста кај 45-годишен пациент. Интервенцијата ја спроведе стручен тим, во состав: проф. д-р Милан Самарџиски, доц. д-р Александар Трајановски, д-р Билјана Лазарова, специјализант по ортопедија, анестезиолог д-р Марина Темелковска, инструментарка с. Кристина Реџеп, помошник инструментар д-р Оливера Лазаревска, сестра анестетичар Гордана Захариева и болничарка Снежана Тодоровска.
Втората трансплантација беше изведена кај 65-годишна пациентка со дијагностициран гигантоцелуларен тумор на дисталниот дел од радиусот на десната подлактица. По претходно направена биопсија е заменето туморското ткиво со здраво коскено ткиво од донор. Интервенцијата ја водеше специјалист ортопед и супспецијалист трауматолог д-р Резеарт Далипи, заедно со тимот: д-р Маја Неделковска, специјалист ортопед, д-р Симона Карапанџевска, специјализант по ортопедија, д-р Искра Шојлевска–Јовановска, специјализант по ортопедија, анестезиолог д-р Јадранка Зафировска, анестетичар Мерита Рамадани, инструментарка Оливера Лазаревска, помошна инструментарка Сања Тодоровска, радиолошки техничар Силвана Стојковска и болничар Сејнур Идриз.
Двете интервенции се реализирани во соработка со д-р Милена Богојевска Доксевска, болнички координатор за ортопедија и одговорна за ткивната банка.
„Огромна благодарност до сите членови на тимовите вклучени во трансплантациите, како и до семејствата на донорите. Зајакнување на знаењата и вештините, следење на современите европски трендови и воведување нови методи во трансплантологијата, се нашиот постојан императив“, истакна проф. д-р Билјана Кузмановска, национален координатор за трансплантација.