Дел од онколошките пациенти повторно останаа без лекови. Oколу еден месец нема биолошка терапија за рак на дојка, а деновиве снемало и за меланом и карцином на бели дробови.

Ана Марјановиќ од Здружението Хема – Онко рече дека причината зошто болните се оставени без терапија се должи на доцнењето со тендерските процедури за годишната набавка и административните кочења.

Од Клиниката, пак, информираа дека процедурата за годишната набавка на терапија е во тек и кон крајот на наредната недела или веднаш после Велигден ќе се потпишат договорите со добавувачите за да почнат да ги носат лековите кои недостигаат.

Утрово стигна реакција од опозициската СДСМ која повика на одговорност.

„Пациентите на Клиниката за онкологија повторно се соочуваат со недостаток на клучни лекови, од кои директно зависи нивниот живот. Иако Клековски јавно ветуваше дека нема да се случи повторно да нема лекови, оваа недела недостасува биолошкиот лек Palbosiklib, недостиг има и на лекот Bevacizumab (Авастин) – терапија што ја примаат голем број пациенти два пати месечно, терапија од која зависи нивниот живот. Кој е сега изговорот на Клековски и на Таравари? Кој ќе понесе одговорност?“, велат од СДСМ.

Се додава дека наместо конкретни решенија и навремена набавка, институциите под раководство на ВМРО-ДПМНЕ се неспособни да обезбедат навреме лекови, луѓето со месеци чекаат на терапија. Недозволиво е, се додава, во 21 век да нема континуирана достапност на основна терапија за најтешките болни.

РЦУК Битола, известува дека поради настанатото свлечиште на патот што ги поврзува село Долно Дивјаци, Општина Крушево и село Кочишта Општина, Демир Хисар состојбата на патот оневозможува безбеден сообраќај.

Поради тоа привремено, се до решавање на настаниот проблем, за сите категории на возила се забранува движење на дел од истиот патен правец.

Забраната на сообраќајот е објавена преку средствата за јавно информирање и е означена со сообраќајна сигнализација.

РЦУК Битола, исто така, известува дека преку број за итни повици 112 добиена е пријава за срушен ѕид од куќа на улицата Стево Патако бр.5, кој го попречува нормално одвивање на сообраќајот. За настанатата состојба известени се СВР Битола за понатамошно постапување (поставување на соодветна сообраќајна сигнализација и пренасочување на сообраќајот).

Исчезнатото повозрасно лице од село Степанци во Општина Штип продолжува, кое е пријавено за исчезнато на 07.04.2025 година во 16:20 часот преку Единствениот повикувачки број за итни случаи 112, се уште не е пронајдено. Известени се МВР Штип и Локална самоуправа Штип, а и други институции и служби, здруженија и граѓани коишто можат да помогнат, информираше Регионалниот ЦУК Штип до Секторот за операции и координација во ЦУК.

Во текот на вчерашниот ден потрагата по исчезнатото лице се одвиваше во реонот на село Степанци. За денеска ќе нема организирана потрага, освен од страна на неговите поблиски роднини и пријатели. Но, за утре, ќе се организира потрага на поголем реон. Планирано е да бидат вклучени од страна на МВР 10 полицајци, потоа 10 извидници – членови на Извиднички одред „ЕКВИНОКС – Штип“, ловци – членови на ЛЗ „Ловец“ од Штип, доброволци – вработени од РЦУК Штип, лица од локално население од блиските села околу Степанци, а и роднини на исчезнатото лице.

Инаку, лицето последен пат било видено во саботата на 05.04.2025 година.