Македонија
Чулев со велосипедската полиција во обиколка на Охрид

Министерот за внатрешни работи Наќе Чулев денеска оствари работна посета на СВР Охрид, а воедно ја посети и Полициската станица за безбедност на патниот сообраќајот, како и езерската полиција. Во рамките на средбата со раководството на СВР Охрид, министерот Чулев беше информиран за актуелната безбедносна состојба на подрачјето на овој сектор за внатрешни работи, која е на високо ниво, а за пофалба е фактот што во изминатиот период од страна на криминалистичката полиција во Охрид расветлени се 30 тешки кражби во викенд куќи во туристичките наслеби Лагадин и Елешец. Исто така, во фокусот на денешниот состанок во СВР Охрид беа парламетнарните избори кои ќе се одржат на 15-ти јули.
Министерот Чулев нагласи дека цврсто стои зад определбата истите да се спроведат со највисоко ниво на професионалност и неселективност од страна на полициските службеници и апелираше тие да постапуваат со еднаков пристап кон секој што ќе ги прекрши законските одредби, независно од неговата етничка или политичка определба. Од страна на раководството на секторот за внатрешни работи министерот Чулев беше запознат дека мапирани се критичните точки каде во изминатите изборни циклуси биле евидентирани изборни нерегуларности и истите ќе бидат покриени со зголемени полициски сили.
Покрај ова, министерот Чулев во текот на работната посета на СВР Охрид, учествуваше и во превентивната акција заедно велосипедската полициска патрола при што за граѓаните се делеа маски во централното градско подрачје, а во текот на вчерашната вечер беше дел иста таква активност која се спроведе во соработка со Советите на родители од неколку образовни центри во градот при што посети повеќе угостителски објекти во градот каде се собираат млади луѓе и им укажа на потребата од почитување на мерките и одлуките донесени од владата, а кои се насочени кон заштита на здравјето на граѓаните.
На средбата, пак, со челните луѓе на Полициската станица за безбедност на патниот сообраќај министерот Чулев беше информиран дека во изминатиот период забележано е значителено намалување на бројот на сообраќајни незгоди на подрачјето на СВР Охрид.
Полициските службеници од езерската полиција, реферираа за активностите кои тие ги преземаат, а се насочени кон сузбивање на прекуграничниот криминалитет по езерски пат и заштита на рибниот фонд во услови кога Охридското езеро сеуште нема концесионер. На сите овие средби и состаноци министерот Чулев потенцираше дека кадровската и материјална опременост е исклучително значајна за функционирање на министерството за внатрешни работи и во таа насока во следниот период ќе се преземат активности со кои кадровски ќе се екипираат организациските единици каде е потребно тоа, но и на располагање на полициските службеници ќе им стави неопходната опрема со која ефикасно ќе ги извршуваат работните задачи и ќе ја подигнат ефикасноста на Министерството за внатрешни работи. “Европските интеграции на нашата држава наложуваат првенствено кадарот во министерството за внатрешни работи да биде стручен и компетентен, а потоа да ги има сите неопходни материјално – технички средства. Во таа насока во следниот период ќе работиме на алоцирање на финансиските средства на министерството за внатрешни работи во оние сегменти каде има најголема потреба од тоа“, заклучи Чулев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Злато во багаж и ботокс во торба запленети на граница

Царинската управа информира дека при контроли на неколку гранични премини се спречени обиди за криумчарење различни производи, меѓу кои златен накит, ботулински токсин, суплементи, цигари и обувки со заштитен знак.
На граничниот премин Богородица, мобилен царински тим заплени златен накит тежок 304 грама и вреден околу 1,3 милиони денари. Две патнички со македонско државјанство, кои патувале на релација Турција – Македонија, се сомничат за криумчарење, а против нив ќе бидат поднесени кривични пријави.
На Деве Баир, цариници открија 210 вијали ботулински токсин (DYSPORT и MASPORT 500) во патна торба на патник кој пристигнал со автобус од Истанбул. Супстанцата, која е под строг режим на увоз, била запленета, а лицето ќе биде кривично пријавено.
На Меѓународниот Аеродром Скопје, кај холандски државјанин се пронајдени 2.580 капсули суплементи „Afye“, скриени во куфер. Лицето се обидело да ја избегне контролата користејќи го зелениот канал.
При контрола на камион на Табановце, биле откриени 144 делови за земјоделски машини скриени во торби во кабината.
На Богородица, во фабричка празнина под приколката на празен камион-кипер биле пронајдени 21 штека цигари.
На преминот Дојран, запленети се 128 пара обувки со ознаки на заштитени трговски марки, пронајдени во товарно моторно возило натоварено со стока од Турција наменета за увозник од Косово.
На Аеродром Скопје, при контрола на пратка од Дубаи, биле откриени 74 ремчиња за смарт часовници кои не биле пријавени во царинската документација. Стоката е запленета, а ќе биде поведена соодветна постапка против увозникот.
Македонија
Синдикатот на новинарите бара зголемување на минималната плата: социјалниот статус на медиумските работници во земјата е на многу ниско ниво

Самостојниот синдикат на новинари и медиумски работници во време на општата дебата за висината на минималната плата недвосмислено е за зголемување на минималната плата. Ставот на ССНМ, како што појаснуваат, кореспондира со актуелните барања на дел од синдикатите и вели дека покачувањето е повеќе од ургентно. Корекцијата, како што напоменуваат е неопходна поради тоа што моменталната висина на минималната плата е недостојна за пристоен живот на работниците, меѓу кои и на новинарите и медиумските работници, чии интереси ги застапува ССНМ.
„Владата и синдикатите преговараат за финансиска иднина на работниците, иднина во која новинарите и медиумските работници не смеат да бидат одминати. Последната опсежна анкета на ССНМ објавена во јануари 2024 покажа дека во медиумите повеќе од 50 проценти од вработените имаат
примања под просечните, а голем дел од вработените се зависни од висината на минималната плата пропишана со закон. Со оглед дека платите во медиумскиот сектор речиси и да не поместени од мртва точка во изминатите две години може слободно да се каже дека три четвртини од ангажираните во медиумите сега се под просечната плата, а се повеќе се зголемува бројот на оние кои се на минимална плата. Поради фактот дека голем дел од вработените во медиумите се директно поврзани со висината на минималната плата, ние како легитимен претставник на работничките права на новинарите и медиумските работници, бараме што е можно побрзо нејзино покачување.
Социјалниот статус на новинарите и медиумските работници во земјата е на многу ниско ниво, а праксата досега покажала дека тој директно влијае врз степенот на мотивација, професионалност и посветеност што не смее да биде под знак прашање за тие што водат сметка за јавниот интерес во државата. Притоа нагласуваме дека во оваа професија неретко се случува луѓето да бидат истовремено ангажирани на повеќе работни места, за што најексплицитен пример се локалните медиуми, во кои вработените често се ангажирани и на по три работни позиции, најчесто на минималец, кој е, како што истакнавме, под секое ниво за достоинствен живот“.
Синдикатот на новинарите и медиумските работници кој претставува голем дел од вработените во овој сектор, бара и очекува од Владата и работодавците решение кое е во согласност со потребите на членството, што би значело висина на минималната плата на ниво на платите на колегите од земјите од регионот.
Пристојни плати на новинарите и медиумските работници значат и професионално новинарство, независно од центрите на моќ, и чувар на јавниот интерес и слободата на медиумите и изразувањето, велат од ССНМ.
Македонија
Во Рашче има приведени поради пукање на свадба

Две лица беа приведени вчера во скопското село Рашче поради пукање на семејна веселба.
„Околу 22 часот во СВР Скопје е пријавено дека се слушаат истрели во селото, по што веднаш се преземени соодветни мерки и активности и утврдено е дека Е.К. и Б.К. со гасни пиштоли пукале на свадба“, соопшти МВР.
Тие се приведени во полициска станица и по целосно документирање на случајот ќе бидат поднесени соодветни поднесоци.