Македонија
Спасовски: Да си ја сочуваме државата од режимот кој се грапчи да дојде на власт

Носителот на листа во ИЕ 2, Оливер Спасовски денеска е на средби со жители во скопската општина Гази Баба.
„Ние сме на потег, да си ја сочуваме сигурноста и да продолжиме со развојна економија и напред. Само 3 години после режим, успеавме државата да ја направиме членка на НАТО. Мандатот за напред го бараме за да ја реализираме и втората државна стратешка цел што е отпочната – преговорите со ЕУ. Решававме стратешки прашања и ја покренавме економијата со повисоки плати, пензии, социјалана помош, финансиска поддршка за младите. Новиот мандат го бараме за уште повеќе пари кај граѓаните, нови покачувања на платите, пензиите, приходите кај граѓаните, по сите основи, со новата развојна економија. Но мора да си ја сочуваме државата од режимот кој гледате се грапчи да дојде на власт. Тие не ставаат во ќесите на луѓето, тие им вадат, дури и на сила, тие знаат да ставаат само во свои џебови. А тоа што владеат монструозно, со закани и по живот, да не зборуваме. Да не си ја пуштиме државата и сигурноста по вода, да излеземе и да гласаме на 15 јули, повика Спасовски.
„Времињата се специфични, но гласањето е безбедно. Мора да излеземе на гласање како што мора да одиме во продавница и на пазар. Зошто одиме? Затоа што не можеме без храна. Е па не можеме и без институции. Кој ќе носи одлуки за да се сочува јавното здравје – режимот? Кој ќе носи одлуки за домашни платежни картички и поддршка на семејните буџети и бизнисите – режимот? Обновен режим е голема опасност. Не им е грижа ни за здравје, ни за државни интереси, ни за егзистенцијата на луѓето. Само да го обноват режимот за да крадат во дестабилизација. Голема опасност е тоа. Никаква обнова нема, само Груевски е обновен во Мицкоски. Да си излеземе на гласање, донесени се сите заштитни протоколи и да си продолжиме по правиот пат зашто сигурноста на нашите деца и на нашата држава е во прашање. Гласаме за број 3 на 15 јули, за Сигурност и ќе има и повеќе и подобро за сите граѓани“, порача Спасовски на средбите во Гази Баба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски – Кос: реформите поврзани со евроинтеграциите остануваат високо на домашната политичка агенда

Во рамки на дводневната работна посета на Брисел, министерот за надворешни работи и надворешна трговија, Тимчо Муцунски, денеска оствари средба со еврокомесарката за проширување на Европската Унија, Марта Кос.
Соговорниците ја нагласија силната поддршка за проширувањето на Унијата, и од страна на земјите членки и од страна на граѓаните на Северна Македонија – што го потврдуваат и наодите од последниот „Евробарометар“.
На средбата беше поздравен реформскиот пристап на Владата, особено исполнувањето на обврските од реформскиот процес и имплементацијата на Планот за раст. Муцунски нагласи дека реформите поврзани со евроинтеграциите остануваат високо на домашната политичка агенда, со силен фокус на владеењето на правото и борбата против корупцијата.
Изрази благодарност за личниот ангажман на еврокомесарката Кос во пристапниот процес, особено во контекст на нејзиното учество и поддршка на Самитот за Планот за раст, што неодамна се одржа во Скопје.
Соговорниците разменија мислења и за неодамнешното приклучување на државата кон СЕПА, како и за иницијативата за постепено укинување на роаминг трошоците помеѓу земјите од Западен Балкан и Европската Унија. Одлуката за оваа иницијатива се очекува на почетокот на 2026 година, како дел од бенефитите на постепената интеграција во Унијата.
На средбата се дискутираше и за актуелните регионални и глобални случувања, при што беше потврдена заедничката поддршка за Украина и заложбата за што побрзо постигнување на праведен и одржлив мир.
Македонија
Meџити: Мајка Тереза е една од најсветлите личности на човештвото

Првиот заменик-претседател на Владата и министер за животна средина и просторно планирање, Изет Меџити, заедно со делегации од Владата, Собранието и општините положи венец со свежо цвеќе на спомен-плочата во центарот на Скопје, посветена на албанската нобеловка Гонџе Бојаџиу – Мајка Тереза, по повод 115-годишнината од нејзиното раѓање.
По церемонијата, Меџити изјави дека на 115-годишнината од раѓањето на Мајка Тереза – Гонџе Бојаџиу, родена во Скопје, се сеќаваме на една од најсветлите фигури на човештвото – мисионерката на љубовта и добитничка на Нобеловата награда за мир.
„Таа нѐ научи дека величината не се мери со функции и моќ, туку со служење, посветеност и љубов кон другиот. Нејзината порака останува водилка за нашата политика и општество, да работиме за мир, правда и солидарност, без да заборавиме никого. Мајка Тереза ни остави света порака дека љубовта се мери преку делата што ги правиме“, изјави Меџити.
Тој вети дека се гради иднина во која Скопје повторно ќе биде препознаено во светски рамки како центар на висока култура, развиено образование, наука и технологија, со перспектива за младите и хуманизам.
Македонија
ДОМ: Самоуништување на природата, Дошница жртва на владината неодговорност

Зелената партија ДОМ остро реагира на одлуката на Министерството за животна средина да не ја стави реката Дошница под привремена заштита, иако врз нејзиниот слив се планира изградба на две мали хидроцентрали кои ќе ја доведат клисурата до еколошки колапс.
ДОМ ја оценува оваа институционална пасивност како политичка одлука за самоуништување на природните богатства и суров удар врз иднината на нашите граѓани и граѓанки.
„Министерството ги прикрива своите намери зад изговори дека „предлогот не е формално доставен“. Ова е безобразно игнорирање на алармот што дојде од експерти, биолози и невладини организации уште пред еден месец, кога побараа мораториум се’ додека не се заврши Студијата за валоризација на природните вредности. Сезонското пресушување на реката Дошница и најавеното дополнително исушување се директна последица од оваа неодговорност.
Веднаш да се воведе мораториум на сите активности поврзани со концесијата, да се затвори пристапот до локациите и да се прогласи привремена заштита на текот и околниот предел, во корист на идното заштитено подрачје „Демиркаписка клисура“. Без тоа, ендемичните видови, македонските риби и планинските инсекти се на пат кон неповратна деградација“.
Бараат итна изработка и усвојување на елаборат за мониторинг на биолошката разновидност и еколошкиот проток во Дошница, со јавни дебати и независни експерти.
Министерството, како што додаваат, да испрати јасна порака до концесионерот: без зелено светло за заштита, нема ни нови брани.
„Зелената партија ДОМ нема да молчи пред ова политичко насилство над природата. Ако не прекине оваа тенденциозна институционална воздржаност, ќе покренеме граѓански и правни активности за да ја спасиме Дошница од катастрофа. Природата не чека, ниту ние ќе го дозволиме нејзиното уништување.