Македонија
Бајрами: Пристигнаа 24 известувања за попречувања и нерегуларности во изборниот процес
До Комисијата за следење евентуални нерегуларности поврзани со извршување кривични дела против изборите и гласањето пристигнале вкупно 24 известувања за настани што се случиле во текот на изборниот процес, вклучитлно и денеска во текот на гласањето.
Јавниот обвинител Џелал Бајрами, инаку претседател на Комисијата, посочи дека од вкупно 24 известувања, 3 се однесуваат на настани во кои лицата ги сликале гласачките ливчиња.
Известувања се пристигнати и на електронската адреса, која Јавното обвинителство ја отвори за на граѓаните да им овозможи директно пријавување сомненија поврзани со изборите и гласањето.
Од нив, 7 се поднесени од исто лице – граѓанска организација, која известува за објави на социјалните мрежи, со кои наводно се прекршува предизборниот молк или се агитира за гласање за одредени политички партии.
Две се од други две лица и се однесуваат на објави на портали и социјални мрежи.
Седум известувања се пристигнати од претставници на политчка партија од Кочани и се однесуваат на наводен поткуп, кој во одделни настани го вршеле лица со цел да се гласа за одредена политичка партија.
Во Основното јавно обвинителство Струмица било доставено известување за лице што на бензиска станица во с. Василево нудело ваучери за гориво за да се гласа за определена политичка партија.
Во струмичкото Обвинителство примени се и известувања за уште два настана од вечерта на 14 јули.
Едниот во с. Добрадинци, каде што околу 21 часот лице нудело пари за да се гласа за определена политичка партија. Вториот настан се случил во с. Дражево, каде што околу 21.50 часот лице вработено во Центарот за социјални работи вршело агитација со закани за да се гласа за определена политичка партија.
Јавен обвинител од Основното јавно обвинителство Струмица бил известен дека инспектор на „Јутјуб“ видел снимка со изборен поткуп и за тоа направил службена белешка. Обвинителот дал насоки за проверка на снимката и утврдување на идентитетот. Едно лице од двајцата дошоло во станица, но по давањето на изказот, подоцна пријавило дека примил закани за што поднел пријава за загрозување на сигурноста.
Ова Обвинителство постапува и по известување за наводен изборен поткуп во кој е инволвиран вршител на функција од една од општините. Дадени се насоки на МВР да се повикаат лицата, пратена е покана за прибирање потребни известувања.
Рано утринава е пријавен настан што се случил во 3.20 часот во ПО Галате, каде што дошол претседателот на Месната заедница од с. Дебреше и пријавил кршење предизборен молк од страна на две лица од село Дебреше. Лицата со автомобил низ селото растурале пропаганден материјал – летоци на една од коалициите. Притоа биле забележани и физички нападнати од друго лице. Од настанатите повреди има едно од лицата што делеле пропаганден материјал и е пренесено на Ургентниот центар – Гостивар. Се работи на расчистување и документирање на случајот.
Од 14 јули има известување во Основното јавно обвинителство Штип за извршен претрес во дом на лице за кое имало сомневање дека поседува дрога. По добиена наредба од судија, при вршење на претресот дрога не била најдена, но е пронајден список од речиси 150 имиња за што постои сомневање дека биле наменети за изборен поткуп. Лицето дало исказ и натаму се преземаат дејства за целосно расчистување на настанот.
На 13 јули во локална продавница во Штип пронајдени се голем број лични документи, кои наводно биле чувани како залог што требало да биде искористен во изборни цели. Од јавниот обвиниетел се дадени насоки да се повикаат лицата – сопственици на личните документи и да се испитаат, како и други дејства во насока на утврдување на фактите во предметот.
Обвинителството во Неготино е известено од ОВР Неготино околу 18 часот за два настана со основи на сомнение дека е сторено кривично дело – повреда на тајноста на гласањето. Првиот настан се случил во Неготино, каде што член на избирачки одбор од просторијата во која се гласа застанал на прозорецот и ставил список со лица што не гласале, а надвор стоело друго лице што го сликало списокот со телефон. Настанот го пријавил член на избирачки одбор од друго изборно место во истото училиште, кој стоел надвор и го видел тоа. Во тек се проверки, а одземен е и телефонот од лицето заради вештачење. Воедно, се вршат и разговори со инволвираните лица.
Другиот настан е во с. Прждево, општина Демир Капија, каде што пред гласачко место член од избирачки одбор добил телефонски повик и на неовластено лице му дало податок дека конкретно лице дошло да гласа, но не гласало. И за овој настан постапката е во тек.
Дежурен јавен обвинител во Основно јавно обвинителство Штип на телефон бил известен за затекнати лица со возило во Штип околу 19 часот, кои со себе носеле 44.000 денари и список на лица, во близина на избирачко место во ОУ „Тошо Арсов“. По насоки на јавниот обвинител лицата, ќе бидат повикани на разговор во МВР за проверување и документирање на случајот.
За овие настани, како и за сите други информации и известувања кои евентуално би пристигнале во обвинителствата, надлежните јавни обвинители, како и Комисијата за следење евентуални изборни нерегуларности, итно и со приоритет во работењето ќе ги преземат сите потребни дејства за расчистување на настаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.