Регион
На продажба земјиште со минско поле во Босна
Стечајниот управник во фирмата „ГИК Брод“ од Брод во Босна распишал лицитација за продажба на повеќе 100.000 квадрати земјиште на локалитетот Барица во оваа локална заедница, пренесува „Спутник“.
Почетната цена од квадратен метар е многу поволни 0,42 конвертабилни марки, со тоа што заинтересираните купувачи треба да имаат предвид дека соседните парцели се минирани, како и дека постои голема веројатност на дел од земјиштето што се продава да има минско поле.
„Предмет на наддавање е неплодно земјиште со вкупна површина од 105.446 квадратни метри. Дел од земјиштето е непристапен во моментот поради сомневање за евентурално постоење неексплодирани убиствени средства“, се вели во јавниот повик.
Понудите треба да се испратат до 1 септември, а, како што се наведува во огласот, имотот може да се разгледа секој работен ден.
Стечајната управничка Снежана Поповиќ појаснува за порталот „Капитал“ дека претставници на Цивилната заштита од Брод ја известиле за опасностите на локалитетот на кое е земјиштето што се продава поради што решила за тоа да ги извести потенцијалните купувачи.
„Во Цивилната заштита се сигурни дека на соседните парцели има убиствени средства што не се отстранети, а постои сомнеж дека ист е случајот и со нашата парцела. Заради безбедност, таа информација ја вклучив и во огласот“, објаснува таа.
Според Поповиќ, од Цивилната заштита добила скици на кои се вцртани сомнителните површини.
Ова не е прв обид за продажба на земјиштето на фирмата што е во стечај од 2015 година. На лицитацијата во декември минатата година немало заинтересирани купувачи, но тогаш немало и никакво предупредување за минското поле.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.