Македонија
(Видео) Лазаревски: Мицкоски, покажи доблест, понуди ја својата оставка

Незадоволството од раководството на партијата, од претседателот Мицкоски, е големо. Членовите на ВМРО-ДПМНЕ сè повеќе се охрабруваат да излезат и тоа јавно да го кажат гледајќи дека Мицкоски нема намера да понесе одговорност, изјави Сашо Лазаревски, делегат на конгрес на ВМРО-ДПМНЕ и актуелен советник од ВМРО-ДПМНЕ во Општина Карпош.
„Денес, голем број членови на ВМРО-ДПМНЕ од Општинскиот комитет Карпош одлучивме да ја поддржиме иницијативата поведена од иницијативниот одбор за свикување вонреден конгрес. Можевме и ние понатаму да молчиме и да глумиме дека сè е во ред. Можеме и понатаму да се преправаме дека нема никаков проблем и цветаат рози во партијата. Можеме да глумиме дека сме победиле и да ловиме вештерки и предавници, само за да ги амнестираме раководството и Мицкоски како најодговорни за поразите.
Но, во Карпош тоа не се прави така. Вистината е дека во Карпош освоивме мал број гласови, речиси 5.000 гласа помалку од минатите парламентарни избори. Вистината е дека Мицкоски загуби во неговиот матичен општински комитет. Вистината е дека Мицкоски загуби и во неговиот месен комитет и на неговото избирачко место. Мицкоски загуби меѓу граѓаните што најдобро го познаваат“, вели тој.
Според Лазаревски, за овие порази вината не треба и не смее да се бара во членовите, активистите и месните комитети, како што слушаме повторно дека се обидуваат да манипулираат. Вината за изборниот пораз има точно име, презиме и адреса. Тоа е Христијан Мицкоски и неговото тесно раководството.
„ВМРО-ДПМНЕ не го заслужува ова. Повторното префрлување на вината кон месните комитети е сигурен рецепт за пропаст и нов пораз на наредните локални избори. Одговорност мора да има. Христијан Мицкоски, покажи доблест, достоинство и макар минумум демократски капацитет и понуди ја својата оставка пред делегатите на конгресот, кој те избра. Тоа воопшто не е кукавички чин, напротив, бегањето од одговорност и криењето на проблемите под тепих е ништо друго, освен кукавичлук. ВМРО-ДПМНЕ секогаш ги исполнувала ветувањата шот ги дала пред избори, а ти јавно вети оставка ако не победиме, вети и дека ќе одиш подалеку и ќе се ја преземеш одговорноста ако победиме, а не составиме влада“, вели Лазаревски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стејт департментот: Нема значителни промени во состојбата со човековите права во Северна Македонија

Во најновиот извештај на Стејт департментот на САД за човековите права за 2024 година се наведува дека во Северна Македонија не се забележани значителни промени во состојбата со човековите права.
Документот идентификува повеќе клучни прашања, меѓу кои ограничувања на слободата на изразување и медиумите, насилство и закани врз новинари, зголемено вознемирување на новинарки, стратешки судски тужби против медиумски работници и предизвици за уредничката независност поради политички и бизнис притисоци.
Во извештајот се посочува дека измените на Законот за аудио-визуелни медиумски услуги, кои овозможуваат рекламирање на кампањи со „висок јавен интерес“ платени од владата преку комерцијални радиодифузери, предизвикале загриженост за можен клиентелизам.
Се наведува и дека владата презела веродостојни чекори за заштита на правата на работниците, синдикално организирање и соработка со УНХЦР за бегалци и лица без државјанство.
Целот извештај на ЛИНКОТ.
Македонија
ВМРО-ДПМНЕ: Ако имало нешто противзаконско во Еразмус + како што зборува СДС, бомбастично ќе ги затвореа луѓето додека беа власт

СДС денес повторно вели дека имало спорен момент во раководењето на Националната агенција Еразмус +, односно бил спорен моментот од 2014 година до 2017 година. Да потсетиме, СДС беше на власт 7 години од 2017 година до лани. Доколку имало нешто спорно во Агенцијата Еразмус +, тие не само што ќе ги затвореа луѓето, туку и ќе ги снимаа и омаловажуваа како Гордана и Миле, реагира ВМРО-ДПМНЕ, на прес-конференцијата на Манасков.
„СДС имаше можност 7 години да провери и да расчисти доколку имало некаков криминал. Но, на нив им одговараше Лидија Димова и таквите како неа, а секако тоа му одговарало и на тогашниот претседател Заев, кој можеби со тие пари и си ја има купено јахтата, во која заедно со Филипче уживаат на Егејското море.
Лицемерието на СДС е огромно. Нивните поранешни функционери тонат во криминал и корупција, нема институција во која немаат направено криминал, ама затоа имаат судии и обвинители кои ги штитат. И на ова ќе му дојде крајот“, се додава во реакцијата.
Македонија
Меџити: Охридскиот договор е жив темел на правична и инклузивна држава

Владата е посветена на изградба на правен и институционален систем, кој гарантира реална, а не само формална еднаквост, изјави првиот вицепремиер, Изет Меџити. Тој посочи дека последиците од формалната еднаквост се чувствуваат во земјата наведувајќи го примерот со, како што рече, половичниот Закон за употреба на албанскиот јазик, оспорен пред Уставниот суд, како и укинатиот механизам на балансерот од страна на судот.
Меџити истакна дека Уставниот суд во мултиетничка држава има стратешка мисија да го штити не само уставниот поредок туку и мирот меѓу заедниците, како и да ја гради меѓуетничката доверба преку аргументирани и транспарентни одлуки.
Владата, додаде тој, ја зајакнува употребата на јазиците во согласност со Охридскиот договор и Уставот, спроведува инклузивни политики во образованието и културата, гради мултиетничка државна служба и поддржува реформи во правосудството за независно и непристрасно судство.
Меџити посочи дека во тек е изработка на законот за правична застапеност, а вработувањата и унапредувањата во администрацијата продолжуваат наведувајќи дека оваа година е најуспешната од осамостојувањето на Македонија.
Тој нагласи дека Владата подготвува и закони што ја продлабочуваат локалната демократија, ја зголемуваат отчетноста кон граѓаните и им даваат повеќе надлежности на општините.
„Духот што сакаме да го инсталираме во нашето општество е дух на соживот, меѓусебна почит и заедничка надеж за иднината. Нема вистинска демократија без доверба и нема функционална држава без еднаквост“, рече Меџити додавајќи дека Охридскиот договор треба да се реализира во секојдневни закони, политики и институции, кои му служат на граѓанинот со чесност.