Свет
Андреј Луговој: Навални можел да биде изложен на новичок само во Германија
Рускиот опозициски блогер Алексеј Навални можел да биде изложен на нервниот агенс новичок само во берлинската клиника „Шарите“, каде што се наоѓа на лекување, а обвинувањата за вмешаност на Русија се надвор од здравиот разум, изјави Андреј Луговој, член на Комитетот за безбедност и антикорупција на Долниот парламентарен дом на руската Државна дума, пренесува ТАСС.
„Откако пронајдоа нешто поврзано со новичок, најверојатно тој бил изложен на тоа во оваа клиника. Медицинска сестра или лекар можеле да го сторат тоа ако сакале некако да го изложат Навални на токсичен агенс. Сигурен сум, во суштина, дека ова навистина се случило“, изјави Луговој за ТАСС.
Според него, апсолутно е нелогично да се тврди дека Навални бил отруен во Русија.
„Ја проценувам веројатноста за такво сценарио како непостоечка од гледна точка на здравиот разум – апсолутно е нелогично да се отруе човек, а потоа да се испрати во Германија за да можат да откријат дека е отруен. Ако тоа се стори на државно ниво, ќе се најде начин да се избегне и да се објасни“, рече Луговој.
Тој ја опиша ситуацијата како уште една провокација од надворешните сили и брилијантна приказна за дискредитација на германско-руските односи. Луговој не исклучи дека Берлин можеби бил доведен во заблуда за труењето на Навални.
„Како прво, ние мора да бараме од Германија да ги сподели сите документи што ги има за овој случај. Канцеларијата на рускиот државен јавен обвинител го прави тоа“, нагласи Луговој.
Тој исто така ја отфрли како нереална можноста противниците на Навални да се поврзани со владини агенции за да добијат пристап до агенс од типот новичок.
На Навални му се слоши на 20 август додека леташе од Томск кон Москва. Утрото на 22 август беше пренесен во клиниката „Шарите“ во Берлин. Неговите лекари соопштија дека во неговото тело се пронајдени знаци за труење. Според лекарите, симптомите на труење постепено се намалуваат.
Германската влада вчера соопшти дека германските воени токсиколози откриле оти Навални бил изложен на нервен агенс од групата новичок. Берлин ја повика Москва да ги разјасни околностите на инцидентот и вети дека ќе го извести рускиот амбасадор за резултатите од тестовите на Навални.
Портпаролот на рускиот претседател, Дмитриј Песков, претходно изјави дека Русија е подготвена за сеопфатна соработка со Германија за да се разјасни ситуацијата околу рускиот блогер. Тој истакна дека не бил идентификуван токсичен агенс пред Навални да биде однесен во Берлин.
Руското Министерство за надворешни работи соопшти дека Москва чека Германија да одговори на прашањата од Канцеларијата на рускиот државен јавен обвинител.
Руската страна во повеќе наврати изјави дека е заинтересирана за детална истрага на инцидентот. Извор за ТАСС изјави дека руските форензички експерти не откриле отровни или токсични хемикалии ниту во организмот на Навални ниту на неговите предмети. Покрај тоа, за време на истрагата полицијата не најде докази за намерно нанесување телесна повреда на Навални.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп казнет со 9.000 долари
Помалку од седум месеци пред претседателските избори во ноември, на републиканскиот кандидат Доналд Трамп му се суди затоа што се обидел да го купи молкот на поранешната порно ѕвезда Сторми Даниелс неколку дена по изборите во 2016 година на кои ја победи демократската кандидатка Хилари Клинтон.
Судијата Хуан Мерчан рече дека Трамп е казнет со 9.000 долари поради кршење на забраната за коментирање на сведоци. Обвинителите го обвинија поранешниот претседател дека повеќе пати ја прекршил забраната за коментирање и побараа од судијата да го казни со 1.000 долари по прекршок, пишува Гардијан.
Според забраната, Трамп не смее да дава, или да наложува други да даваат јавни изјави за сведоците на судењето, обвинителите и членовите на судскиот персонал. Пред судењето, судијата Мерчан ја прошири оваа забрана за коментирање на членовите на семејството откако Трамп напиша објава за ќерката на Мерчан.
Трамп мора да отстрани седум навредливи објави од социјалната мрежа „Truth Social“ и две објави од неговата веб-страница на кампањата до 14:15 часот. „Го предупредуваме обвинетиот дека судот нема да толерира натамошно кршење на правните наредби и дека доколку е потребно и соодветно со оглед на околностите ќе биде осуден на затворска казна“, се вели во судската пресуда.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.