Свет
САД со санкции за претставници на Меѓународниот кривичен суд поради истрагата за Авганистан

САД во средата воведоа санкции против високи функционери на Меѓународниот кривичен суд (МКС) во Хаг, вклучително и главната обвинителка Фату Бенсуда, под обвинение за нелегитивни обиди да ги стават Американците на нивна надлежност.
Во изјавата, американскиот државен секретар Мајк Помпео го опиша МКС како темелно нарушена и корумпирана институција поради судската истрага за наводни воени злосторства извршени од службени лица на САД во Авганистан.
„Денеска САД преземаат активности за да ги заштитат Американците од неправедна и нелегитимна истрага на Меѓународниот кривичен суд (МКС), која го загрозува нашиот суверенитет и претставува опасност за САД и за нашите сојузници“, забележа Помпео.
„САД се силен поборник за правда во светот, но не се потписнички на Римскиот статут што го создаде МКС ниту пак некогаш сме ја прифатиле неговата јурисдикција над нашиот персонал. Непромисленоста на МКС нè принуди на овој чекор и не може да му се дозволи на МКС да го спроведе своето политичко таргетирање на персоналот на САД.
Санкциите и визните ограничувања објавени денес се однесуваат на лица кои директно се вклучиле во напорите на МКС да го испитаат персоналот на САД без согласност на САД или материјално ги поддржале лицата кои се назначени за такви дејствија“, продолжи тој.
Меѓу санкционираните се Бенсуда, за нејзино учество во истрагата на персоналот во САД, и шефот на Одделот за надлежност, комплементарност и соработка, Факисо Мочочоко, за обезбедување материјална помош.
Според санкциите, и Бензуда и Мочочоко ќе бидат додадени во списокот на Канцеларијата за контрола на странски средства на специјално означени државјани и блокирани лица при Министерството за финансии на САД. Оние што продолжуваат да ја поддржуваат истрагата исто така може да бидат санкционирани во иднина.
Помпео додаде дека овој потег ја одразува американската посветеност на вистинска правда и одговорност.
„Од судењата во Нирнберг и Токио по Втората светска војна до поновиот суд за поранешна Југославија, Либан и Руанда, САД постојано се обидуваа да го поддржат доброто и да го казнат злото според меѓународното право. Ние ќе продолжиме да го правиме тоа. Американците се горди што се залагаат за вистината и за правдата. Немаме намера да дозволиме нелегитимните активности на МКС да станат пречка за тоа“, се вели во неговата изјава.
По објавата, МКС во изјава рече дека одлуката е донесена со декларирана цел да се влијае врз постапките на службените лица на МКС во нивните истраги.
„Нападот врз МКС претставува напад против интересите на жртвите на злосторства за многумина од кои судот претставува последна надеж за правда“, се вели во соопштението.
Реагирајќи на веста, портпаролот на генералниот секретар на ОН, Антонио Гутереш, ја изрази својата загриженост и вети дека „внимателно ќе ги следи настаните по ова прашање и ќе ги анализира сите можни импликации што овој развој може да ги има во однос на спроведувањето на Договорот“.
Создаден преку договор на ОН во 2002 година, МКС требаше да служи како суд за геноцид, злосторства против човештвото и воени злосторства кога националните власти не се во можност или одбиваат да гонат. Сепак, четири од големите светски суперсили – САД, Кина, Русија и Индија – одбија да се вклучат поради наводните согледани предрасуди кон нивните граѓани и не го признаваат неговиот авторитет.
Во јуни американскиот претседател Доналд Трамп издаде извршна наредба со која им се дозволува на САД да го блокираат имотот на вработените во МКС и да ги спречи да влезат во земјата. МКС ја опиша одлуката како неприфатлив обид да се меша во владеењето на правото.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Макрон: Иднината на Украина не може да се одлучи без Украинците

Само неколку дена пред планираната средба меѓу рускиот претседател Владимир Путин и американскиот претседател Доналд Трамп, францускиот претседател Емануел Макрон нагласи дека Украина мора да биде вклучена во сите разговори за нејзината иднина.
„Иднината на Украина не може да се одлучи без Украинците, кои се борат за својата слобода и безбедност повеќе од три години“, напиша Макрон на X.
„Бидејќи и нивната безбедност е во прашање, Европејците исто така мора да бидат дел од решението, рече тој.
Макрон претходно разговараше по телефон со украинскиот претседател Володимир Зеленски, германскиот канцелар Фридрих Мерц и британскиот премиер Кир Стармер, напиша тој.
По разговорот со Макрон, Зеленски напиша на X: „Украина, Франција и сите наши партнери се подготвени да работат што е можно попродуктивно за вистински мир“.
Трамп треба да се сретне со Путин во Алјаска во петок. Според „Волстрит џурнал“, Путин бара целосна руска контрола врз источните региони на Украина, Донецк и Луганск, што Зеленски категорично го отфрла.
Свет
Ердоган за Газа: Одлуката на Израел е неприфатлива, поддршката за Палестина продолжува

Одлуката на Израел да преземе воена контрола врз Газа е апсолутно неприфатлива, му рекол турскиот претседател Реџеп Таип Ердоган на палестинскиот претседател Махмуд Абас во телефонски разговор, пренесува Анадолу.
Според турската Дирекција за комуникации, тие разговарале за израелските напади врз Газа и за најновите случувања во регионот.
За време на разговорот, Ердоган повторил дека Турција ќе продолжи да стои зад Палестина.
Нарекувајќи ги изјавите на Франција, Велика Британија и Канада за можното признавање на палестинска држава достојни за внимание, Ердоган го истакна растечкиот бран критики кон Израел на Западот и додаде дека Турција ќе продолжи со своите напори за мир во регионот.
Свет
Идентификувани останките од три жртви од нападите на 11 септември

Останките од три жртви од нападите на 11 септември се идентификувани благодарение на напредокот во ДНК технологијата.
Службениците во четврток објавија дека ги идентификувале останките на 26-годишниот трговец со валути Рајан Д. Фицџералд, 72-годишната пензионирана директорка на непрофитна организација Барбара А. Китинг и уште една жена, чие име се чува во тајност на барање на нејзиното семејство.
Останките се идентификувани преку подобрено ДНК тестирање на останките пронајдени во урнатините по нападите на 11 септември 2001 година, соопшти канцеларијата на медицинскиот испитувач во Њујорк. Останките на Китинг и жената, чиј идентитет не е објавен, се пронајдени во 2001 година, а останките на Фицџералд се пронајдени следната година.
Китинг се враќала дома во Калифорнија со летот на „Американ ерлајнс“ кога членови на Ал Каеда го киднапирааа и намерно го удрија во северната кула на Светскиот трговски центар. Парче од нејзината банкарска картичка било пронајдено во остатоците.
Во нападите од 11 септември, два авиона се урнаа во Кулите Близначки во Њујорк, трет се урна во Пентагон, а четвртиот се урна во Пенсилванија. Вкупно 2.977 луѓе загинаа, од кои 2.753 во Њујорк. Околу 1.100 жртви остануваат неидентификувани, соопшти канцеларијата на медицинскиот испитувач.
Во 24-те години од терористичките напади, нови останки се идентификувани благодарение на напредокот во технологијата.