Свет
Трамп: Пентагон води војни, за компаниите кои произведуваат оружје да бидат задоволни
Американскиот претседател Доналд Трамп го нападна воениот врв на вооружените сили на САД и го обвини Пентагон за водење војни со цел да се зголеми профитот на компаниите за производство на оружје.
„Раководството на Пентагон сака да води војни, со цел сите оние прекрасни компании за вооружување, кои произведуваат бомби, ракети и авиони, да бидат среќни и задоволни“, рече Трамп на прес-конференција во Белата куќа, објави Си-Ен-Ен.
Овие необични коментари на шефот на државата дојдоа во време кога бројни воени команданти и лидери во Пентагон му се доверија на Си-Ен-Ен дека односите со претседателот стануваат сè понапнати.
Поранешен воен службеник за Си-Ен-Ен потврди дека Трамп јавно изговорил груби и навредливи квалификации на сметка на припадниците на американската армија и воените ветерани.
„АП“ исто така известува дека за време на неговата официјална посета на Франција во ноември 2018 година, по повод одбележувањето на 100-годишнината од крајот на Првата светска војна, американскиот претседател дал несоодветни изјави и навредливи квалификации на штета на загинатите војници.
Овие извештаи беа емитувани и на „Фокс њуз“, а Доналд Трамп жестоко ги демантираше.
„Најновите коментари на претседателот за военото раководство на САД и нивната мотивација не само што ја деградираат и ја прават бесмислена нивната посветена работа во службата, туку имаат корозивен ефект и врз американската војска“, рече пензионираниот поморски генерал и воен аналитичар на Си-Ен-Ен, Џон Кирби.
Пентагон официјално не одговори на барањето да ги коментира изјавите и односот на Трамп кон армијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.