Македонија
Забрането е нехумано однесување кон коњите – АХВ почна кампања за подигнување на јавната свест
Агенцијата за храна и ветеринарство (АХВ) денес почна со реализација на кампањата за подигнување на јавната свест за благосостојбата на работните коњи, како дел од приоритетите од Стратегијата за благосостојба на животните. Во рамки на оваа кампања изработен е едукативен аудио и видеоспот, постер на македонски, албански и ромски јазик и билборди кои ќе бидат поставени во Скопје, Тетово, Битола, Штип и Прилеп.
Кампањата за благосостојба на работните коњи е една од компонентите на кампањите за подигнување на јавната свест за благосостојбата на животните, со која во рамки на проектот „Подобрена имплементација на законодавството во делот на здравјето на животните, безбедноста на храната и фитосанитарната област и соодветните информациски системи” се опфатени и фармските животни, зголемување на контролата на популацијата бездомни животни преку зајакнување на одговорното сопствеништво, за благосостојба на животните за време на транспорт, благосостојба на кокошките несилки и за благосостојбата на животните при колење.
Проектот е вреден 1,6 милиони евра и се реализира со финансиска поддршка од Европската Унија во рамки на ИПА 2015. Агенцијата за храна и ветеринарство е носител на активностите на овој проект, кои се реализираат во соработка со Фитосанитарната управа, Државната фитосанитарна лабораторија и Државниот инспекторат за земјоделство при Министерството за земјоделство, шумарство и водостопанство.
Почетокот на кампањата е со заедничкиот состанок кој денес Агенцијата го одржа со претставници од Министерството за внатрешни работи, Заедницата на единиците на локалната самоуправа – ЗЕЛС, Град Скопје, Општина Шуто Оризари и Коњичкиот клуб Бравадос – Скопје. На состанокот се дискутираше за клучните аспекти, потенцијалните решенија и потребата од подигнување на свеста на сопствениците на коњи кои ги користат за влеча, превоз и работа, но пред сè за потребата од унапредување на здравствената заштита и благосостојбата на оваа категорија животни, која претставува и сериозен сообраќаен и безбедносен проблем на патиштата, особено во урбаните средини. Недоволната грижа за овие животни влијае директно на нивното здравје и работна способност, а сериозно ја загрозува и благосостојбата, не само на животните туку и на нивните сопственици, бидејќи коњите претставуваат ресурс за остварување приход и преживување на многу семејства.
За оваа категорија животни, до Агенцијата за храна и ветеринарство се упатуваат голем број претставки од страна на невладините организации, но и од граѓаните кои алармираат за негрижа за здравјето и благосостојбата на работните коњи. Животните често се во лоша здравствена кондиција, се доведуваат и до изнемоштеност. За жал, и покрај спроведените инспекциски постапки, состојбата со заштитата на овие категории животни засега е непроменета.
Прашањата за заштитата и благосостојбата на животните во Република Северна Македонија е уредена со Законот за заштита и благосостојба на животните и со подзаконски акти. Законската регулатива во овој дел е целосно усогласена со Европската. Законските обврски за заштита и благосостојба на коњите, кои се однесуваат на сопствениците и одгледувачите, регулирани се со Законот за заштита и благосостојба на животните, со Кривичниот законик, со членот 233 кој се однесува на измачувањето на животни. Ова прашање го регулираат и законите од областа на безбедноста во сообраќајот и комуналните закони.
За чување и употреба на работните коњи, согласно Законот за заштита и благосостојба на животните неопходно е да бидат исполнети минимум услови. Животните не смее да се изложени на глад и жед, да се заштитени од неудобност и да се сместени во средина која е соодветна за нивниот вид. Тие треба да бидат заштитени и од болка, повреда или болест, неминовно е да им се овозможи нормално однесување, а неминовно е да се води сметка и да не бидат изложени на страв и вознемиреност.
На коњите треба редовно да им се обезбеди свежа вода за пиење и храна со соодветна хранлива вредност, хигиенски исправна и соодветна за нивната возраст заради одржување на здравјето, физиолошките потреби и работната кондиција. Во случај кога коњите не се во добра здравствена состојба, или покажуваат промени во однесувањето, сопственикот и/или одгледувачот без одлагање треба да преземе мерки да ја утврди и отстрани причината. Доколку преземените мерки не покажуваат ефекти, сопственикот и/или одгледувачот треба веднаш да повика ветеринар.
Забрането е предизвикување болка, страдање или повреди, сурово и нехумано однесување кон коњите! Забрането е присилување на животните на работа која го надминува нивниот физиолошки капацитет, здравствена или кондициона способност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Снег на Попова Шапка, магла на одредени патни правци, сообраќајот на државните патишта се одвива во зимски услови
Сообраќајот на државните патишта се одвива во зимски услови,по претежно влажни коловози.
Врнежи од снег на Попова Шапка со задржување на коловоз од с.Лисец-Попов Шапка.
Намалена видливост поради појава на магла до 80 метри на патниот правец Штип – Неготино кај Серта, во Крушво до 50 метри на планинскиот премин Стража до 100 метри и кај Маврово до 50 метри.
Сите патни правци во државата се проодни.
Од 15.11.2025 година започна законската обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2026 година.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре променливо облачно и релативно топло
Времето утре ќе биде променливо облачно и релативно топло.
Претпладне ќе има слаб локален дожд, а по одделни котлини ќе има појава на магла. Кон крајот на денот и во текот на ноќта во западните делови ќе има врнежи од дожд. На повисоките планини во северозападните делови врнежите ќе бидат од снег. Ќе дува слаб до умерен, а во западните делови наместа повремено засилен ветер од западен правец. Минималната температура ќе биде во интервал од 2 до 5, а максималната ќе достигне од 11 до 18 степени.
Во Скопје, времето ќе биде променливо облачно со сончеви периоди. Претпладне во делови од котлината ќе има појава на магла. Ќе дува слаб променлив ветер. Минималната температура ќе се спушти до 3, а максималната ќе достигне до 15 степени.
Во наредните денови следува период на променливо време. Во недела претпладне ќе има локални врнежи од дожд, а на планините во северозападните делови од снег. Врнежи од дожд ќе има и во понеделник кои ќе бидат поинтензивни во југоисточните делови, а на планините ќе бидат од снег. Поради продор на постуден воздух врнежите од дожд ќе преминуваат во снег и на некои од повисоките места. Потоа во следните два дена ќе се задржи претежно стабилно време, а нови врнежи повторно се очекуваат од четврток.
Македонија
Трипуновски: Работиме на стабилен откуп и цена на суровото млеко
Министерот за земјоделство, шумарство и водостопанство, Цветан Трипуновски оствари средба со претставниците на поголемите млекарници во државата, на која се разговараше за стабилен откуп и цена на суровото млеко, покрај тоа што европскиот пазар и регионот се соочуваат со вишок на млеко.
На средбата се договори дека откупната цена на суровото млекото ќе биде стабилна, како и дека нема да има неоткупено млеко од страна на млекарниците.
Ќе се засилат контролите на пазарот со фокус на безбедноста и квалитетот на млекото и млечните производи, како и на добиточната храна.
Министерството останува посветено на унапредување на млекопроизводниот сектор и обезбедување на одржливи услови за фармерите и млекарниците, велат од таму.

