Свет
Макрон: Повеќе од 300 сириски исламисти пристигнале во Нагорно-Карабах преку Турција
Франција потврди дека повеќе од 300 радикални исламисти од Сирија пристигнале во зоната на конфликтот во Нагорно-Карабах преку турски Газијантеп, рече францускиот претседател Емануел Макрон по првиот ден од самитот на ЕУ во Брисел, пренесува ТАСС.
„Можам со сигурност да потврдам дека повеќе од 300 сириски исламистички милитанти, претходно изнесени од зоната во Алепо, се распоредени во зоната на конфликтот во Нагорно-Карабах преку турски Газијантеп да учествуваат во непријателствата од страната на Азербејџан. Ова е потврден факт, тие лица се идентификувани и следени и сите имаат врски со терористичката група Исламска држава“, рече тој.
„Разговарав за ова со претседателот Владимир Путин, кој потврди дека и Русија е информирана. Однесувањето на Турција е недостојно за земја членка на НАТО, сметаме дека ваквите активности се тотално недозволиви. Во овој случај црвената линија веќе е премината“, додаде Макрон.
#BREAKING French President Macron claims fighters from Syria operating in Karabakh pic.twitter.com/p2qRqFrSbX
— AFP news agency (@AFP) October 1, 2020
Францускиот лидер нагласи дека Франција и другите копретседатели во групата од Минск на ОБСЕ за Нагорно-Карабах – Русија и САД, ќе излезат со низа иницијативи за запирање на конфликтот.
„Русија, САД и Франција, како копретседатели на групата од Минск на ОБСЕ, ќе преземат низа иницијативи за запирање на конфликтот во Нагорно-Карабах во најкус можен рок“, рече тој.
Во меѓувреме, претседателот на Европскиот совет, Шарл Мишел, рече дека лидерите на ЕУ ја повикуваат Турција да престане да се меша во прашањето на Нагорно-Карабах и да игра конструктивна улога во деескалацијата на ситуацијата.
„ Да, секој треба да игра поконструктивна улога за промовирање на деескалацијата. Ние сакаме странското мешање да престане, тоа само ја отежнува ситуацијата“, рече тој.
На 27 септември Баку објави дека позициите на азербејџанската армија се интензивно гранатирани од Ерменија. Ереван, од своја страна, тврдеше дека вооружените сили на Азербејџан почнале офанзива во правец на Нагорно-Карабах гранатирајќи ги населените места на непризнатата република, вклучително и главниот град Степанакерт.
Двете страни пријавија жртви и меѓу цивилното население. Ерменските власти прогласија воена состојба и најавија мобилизација. Азербејџан воведе воена состојба на целата територијата.
Конфликтот меѓу Ерменија и Азербејџан за планинскиот регион Нагорно-Карабах, спорна територија што беше дел од Азербејџан пред распадот на Советскиот Сојуз, но главно населена со етнички Ерменци, избувна во февруари 1988 година кога автономниот регион Нагорно-Карабах најави повлекување од Советската Социјалистичка Република Азербејџан.
Во периодот 1992-1994 година тензиите зовреа и ескалираа во големи воени акции за контрола над енклавата и седумте соседни територии кога Азербејџан ја изгуби контролата над нив. Разговорите за решението за Нагорно-Карабах траат од 1992 година под закрила на групата од Минск на ОБСЕ, предводена од нејзините тројца копретседатели – Русија, Франција и САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Ирак воведува казна затвор за геј бракови, промена на пол и промоција на хомосексуалност
Ирачкиот парламент усвои закон со кој се криминализираат истополовите врски и се воведува максимална казна од 15 години затвор за ова дело. Овој потег е насочен кон зачувување на верските вредности, но активистите за човекови права го осудија како последен напад врз ирачката ЛГБТ заедница, пренесува Ројтерс.
Во самиот текст на законот се наведува дека тој има за цел „да го заштити ирачкото општество од морално распаѓање и да предупреди од хомосексуалноста што го зафати светот“.
Законот беше поддржан од главно конзервативни шиитски муслимански партии кои ја формираат најголемата коалиција во мнозинскиот муслимански ирачки парламент.
Овој акт „за сузбивање на проституцијата и хомосексуалноста“ забранува истополови односи под закана за казни од најмалку 10 и максимум 15 години затвор и предвидува најмалку седум години затвор за секој кој промовира хомосексуалност или проституција.
Исто така, казна затвор од една до три години е пропишана за секој што ќе го промени „биолошкиот пол“ или за маж кој носи феминизирана облека.
Предлог-законот првично вклучуваше смртна казна за истополови дела, но беше изменет поради силното противење од САД и европските земји, наведува Ројтерс.
„Усвојувањето на законот против ЛГБТ од страна на ирачкиот парламент потврдува дека правата на ЛГБТ луѓето се ужасно прекршени во Ирак и е сериозен удар за основните човекови права“, рече Раша Јунес, заменик-директор на програмата за правата на ЛГБТ Хјуман Рајтс Воч.
Грција ги легализираше геј браковите
За првпат во современата грчка историја, конзервативна влада спроведе либерална реформа – против волјата на Православната црква и против волјата на многу нејзини гласачи и пратеници. По многу страсна дебата, оваа година грчкиот парламент усвои предлог-закон (15 февруари 2024 година) со кој се легализираат истополовите бракови. За неа гласаа 176 од 300 пратеници.
Ова ја направи Грција првата земја со православно мнозинство што ги легализираше хомосексуалните бракови.
„Грција е горда што е 16-та земја во Европската унија која ги усвои законите за брачна еднаквост. Ова е пресвртница за човековите права“, објави премиерот Киријакос Мицотакис по гласањето во парламентот.
Свет
Детали од пропаднатиот мировен договор меѓу Русија и Украина: „Киев да гарантира трајна неутралност, а Москва да не напаѓа“
Русија и Украина беа блиску до постигнување мировен договор во пролетта 2022 година, според кој Киев бил подготвен да се посвети на неутралност, пренесува „Велт“ повикувајќи се на нацрт-договорот.
Повикувајќи се на документ од 17 страници од 15 април 2022 година, германскиот весник наведува дека Москва и Киев постигнале начелен договор и дека преостанатите разлики ќе бидат „измазнети“ на самитот меѓу претседателите на Русија и Украина, Владимир Путин и Володимир Зеленски.
Според „Велт“, Украина тогаш се обврзала на „постојана неутралност“ без присуство на странско оружје или војници, како и да не „прима, произведува или стекнува“ нуклеарно оружје. Киев, наводно, гарантирал и дека нема да одржува воени вежби со други земји.
За возврат, Русија се обврза да не ја напаѓа Украина, а Киев можеше да добие безбедносни гаранции од САД, Велика Британија, Франција и Кина. Доколку Украина биде нападната, нејзините гаранти ќе го поддржат нејзиното право на самоодбрана во рок од три дена, со ратификација на соодветните договори од секоја држава учесничка, што ќе ги направи правно обврзувачки.
„Велт“ наведува и дека договорот го исклучил рускиот полуостров Крим, како и делови од Донбас од какви било безбедносни гаранции дадени на Украина.
Сепак, не е јасно кои делови на Донбас беа опфатени со клаузулата. Весникот наведува дека иако Русија сакала да се утврдат точните граници на самитот Путин-Зеленски, Киев одбил, инсистирајќи дека тие се засновани на украинско толкување.
Во исто време, Москва наводно сигнализирала дека е подготвена да ги повлече своите војници од украинска територија, но не и од Крим и Донбас. И тоа требаше да разговараат Путин и Зеленски.
Двете страни, исто така, наводно имале големи несогласувања околу големината на украинската војска, бидејќи Киев сакал да задржи многу повеќе војници отколку што Москва била подготвена да дозволи.
„Велт“ објави дека Москва бара рускиот да стане втор официјален јазик во Украина. Русија, наводно, побарала укинување на сите меѓусебни санкции и отфрлање на тужбите, истовремено повикувајќи го Киев да го забрани нацизмот и „агресивниот национализам“. Украина ги одби тие барања, пишува весникот.
Коментирајќи го сега пропаднатиот договор, еден украински преговарач за „Велт“ изјави: „Тоа беше најдобриот договор што можевме да го постигнеме“. Преговарачот исто така изјави дека Киев бил во посилна преговарачка позиција во 2022 година отколку сега.
Руските власти претходно потврдија дека Украина и Русија се блиску до мировен договор, но тврдеа дека напредокот е закочен од тогашниот британски премиер Борис Џонсон, кој наводно го советувал Киев да продолжи со борбите. Џонсон ги отфрли обвинувањата.
Свет
„Смрт за Америка и Израел“: Хутите тврдат дека собориле американски борбен дрон
Јеменската милитантна група Хути соопшти дека соборила американско борбено беспилотно летало MQ-9 Reaper и објави видео на кои се прикажани делови од дронот.
Хутите тврдат дека го собориле дронот со проектил земја-воздух, дел од новата серија напади на бунтовниците оваа недела, по релативно затишје во војната меѓу Израел и Хамас во Појасот Газа.
Пентагон, Централната команда на САД и американските воздухопловни сили не ја коментираа изјавата на милитантите, но Си-Би-Ес Њуз цитираше неименуван американски функционер кој потврдил дека дронот се урнал во Јемен.
Видеото објавено од Хутите вклучува ракета која е лансирана кон беспилотно летало, а во позадина се слуша како човек го рецитира слоганот на групата по ударот на авионот: „Господ е најголем, смрт за Америка, смрт за Израел, проклетство на Евреи, победа на исламот“.
На видеото се прикажани и неколку главни делови од дронот, вклучувајќи го и логото на General Atomics, која го произведува авионот, како и серискиот број.