Македонија
(Видео) Арсовски: Семејната фирма на Бочварски добила тендер еден ден откако тој стана министер
Општина Штип доделила скандалозен тендер на семејната фирма на Благој Бочварски, еден ден откако ја напуштил градоначалничката функција, обвини Димче Арсовски, портпарол на ВМРО-ДПМНЕ.
„Ако сеуште не ви беше јасно зошто најнеуспешниот градоначалник Благој Бочварски од редовите на СДСМ стана министер за транспорт и врски, после оваа прес конференција ќе ви се разјасни. Системот за цицање на народните пари во семејните фирми кој што го воведе Зоран Заев во Струмица, не е исклучок, туку e правило на функционирање во СДСМ. Овој модел се применува и во Штип. Семејната фирма на министерот Бочварски кој е доскорeшен градоначалник на општина Штип, добила тендер од општина Штип“, рече тој.
Арсовски кажа дека семејната фирма „Де Лукс ДОО“ која, според него, е во сопствеништво и управувана од чичкото и таткото на Благој Бочварски, Владимир и Венцислав Бочварски, добила тендер во износ од над еден милион денари од општината.
„Да биде уште посомнително тендерот фирмата го добива еден ден откако Бочварски станува министер, односно на 1-ви септември. Дали тоа значи дека семејната фирма на Бочварски учествувала на целата постапка додека траел тендерот дури тој бил градоначалник, а се чекало само тој да биде избран за министер за да се официјализира како добитник на тендерот неговата семејна фирма“, праша Арсовски.
Тој ја повика Aнтикорупциската комисија и другите надлежни органи да го истражат и санкционираат случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Арсовска како главни проблеми на локалната власт ги посочи политичкото мешање и ограничените финансии
Градоначалничката на Град Скопје, Данела Арсовска, денеска, на покана на Европскиот комитет на региони присуствуваше на 162. Пленарна седница во Европскиот парламент во Брисел, каде ги посочила предизвиците со кои се соочуваат институциите на локално ниво во земјава, соопштуваат од Град Скопје.
Како што стои во соопштението, Арсовска во своето обраќање истакнала дека главните предизвици со кои се соочува локалната самоуправа се политичкото мешање во нивната работа, обидите за влијание врз независноста на локалните институции од страна на централната власт, како и ограничените финансиски ресурси.
– Главни предизвици со кои се соочува локалната самоуправа се политичкото мешање во нивната работа и обиди за влијание врз независноста и интегритетот на локалните институции од страна на централната власт, но и ограничените финансиски ресурси и капацитети. Во заклучоците воедно акцентирани се и забелешките за еднаквост и правичност, оваа година има значителен пад на статусот на жената во локалната власт, а младите девојки и жени се обесхрабрени да учествуваат, знаејќи дека немаат системска поддршка и заштита од родово базирано насилство, што се рефлектира и преку големиот пад на процентот на жени градоначалници низ Европа, истакнала Арсовска.
Локалната власт во Македонија, додава, е составен дел на процесот на интеграција на земјата во ЕУ и севкупната рамка на управување. Вели локалните власти значително можат да придонесат кон аспирациите за членство во ЕУ, за што е неопходно зајакнување на локалните институции, промовирање на граѓанскиот ангажман и справување со уникатните потреби на локално ниво.
– Поради говорот на омраза, сајбер насилството, закани и континуираната загриженост за личната безбедност, бројот на жени градоначалници во Европа падна од 25 на 16%, во земјите од Југоисточна Европа на 8,3%, додека во Македонија на рекодно најниско за Европа на 2 отсто. Локалната власт во Македонија е составен дел на процесот на интеграција на земјата во ЕУ и севкупната рамка на управување. Локалните власти значително можат да придонесат кон аспирациите за членство во ЕУ, за што е неопходно зајакнување на локалните институции, промовирање на граѓанскиот ангажман и справување со уникатните потреби на локално ниво. Тековните напори за унапредување на децентрализацијата, подобрување на локалното управување и поттикнување меѓуетничка соработка ќе бидат од суштинско значење за градење стабилно, демократско и просперитетно општество кое ќе се усогласи со вредностите и стандардите на ЕУ, истакнала Арсовска.
Македонија
Петрушевски: ДУИ се согласија да се укине балансерот, а сега бараат причина за дестабилизиција
Додека ДУИ беа дел од власта се согласија да се укине балансерот, сега само бараат причина за дестабилизација, прочитани се, изјави на прес-конференција Бране Петрушевски, пратеник на ВМРО-ДПМНЕ.
„ДУИ како власт во 2023 година учествуваше во изготвување на Стратегија за реформи во администрацијата 2023 – 2030 во која се нотира дека балансерот има бројни злоупотреби и истиот треба да се укине. ДУИ прифатија укинување на балансерот од позиција на власт, и тогаш не повикуваа на протести, затоа што беа насочени на матни тендери и играње фудбал по канцеларии. Од позиција на опозиција, сега корумпираните функционери од ДУИ не може да местат тендери и тогаш почнуваат да злоупотребуваат етнички прашања со цел дестабилизација. ДУИ само бараат причини за дестабилизација затоа што се плашат дека нивните функционери кои 20 години ја крадеа државата ќе се соочат со одговорност. И додека функционерите на ДУИ 20 години ја ограбуваа државата, јавајќи на бранот на етнички теми, стотици илјади наши сограѓани ја напуштија државата, токму заради тие лоши политики. ДУИ се прочитана книга и никој повеќе не им верува. И Европската Комисија нотираше дека балансерот се злоупотребува и дека истиот треба да се укине. Тогаш ДУИ молчеше, за да краде“, додава Петрушевски.
Тој вели дека Македонија сега оди напред, кон економска трансформација, владеење на правото и држава во која младите ќе ја гледаат својата иднина.
Македонија
Замрзнувањето на „балансерот“ нема да ги спречи новите вработувања, вели вицепремиерот Фетаи
Важно е тоа што конечно ќе се донесе Закон за правична застапеност, кој уставното правило ќе го преточи во законска обврска со контролни механизми. Вакво нешто недостасуваше до сега, а особено со „балансер“, за кој што знаеме дека беше многу злоупотребен и не овозможуваше правична застапеност, смета вицепремиерот задолжен за политики за добро владеење, Арбен Фетаи.
Тој на денешната прес-конференција по повод 100-те дена нова Влада, одговорајќи на новинарско прашање дали се согласува Законот за правична застапеност да биде согласно препораките на Венецијанската комисија според барањето на премиерот, одговори дека е меѓународна пракса да се земе мислење од Венецијанската комисија.
Тој е на ставот дека замрзнувањето на „балансерот“ нема да ги спречи новите вработувања.
-Правичната застапеност е дел од Уставот. „Балансерот“ беше дигитална алатка која овозможуваше реализирање на годишните планови за вработување. Замрзнувањето на „балансерот“ е додека да најдеме ново законско решение. Ова нема да ги спречи вработувањата. Ќе има вработувања според уставното правило на правична застапеност, како што кажа и премиерот. За Законот за правична застапеност се зборуваше со години. Јас сум еден од оние кој во рамките на мојата партија Алијанса за Албанците го изготви овој предлог закон со меѓународни експерти, рече Фетаи.
Според него Венецијанската комисија е механизам кој ни овозможува да донесеме решение кое ќе се вклопува со меѓународните практики на Советот на Европа. Исто така, потенцираше дека процесот на донесување на Законот ќе биде транспарентен, ќе се вклучат експерти, граѓани, цивилното општество.
-Меѓународна пракса е да се земе мислење од Венецијанската комисија. За овој закон се зборуваше со години наназад. Законот доцни 22 години. Требаше да се донесе во моментот кога го усвоивме амандманот 6 од Уставот. Но, важно е процесот да почне. Ќе бидат вклучени експерти, граѓани, цивилното општество, како и медиуми. Процесот ќе биде транспарентен, и секој ќе има можност да даде свое мислење, со цел да се најде најдоброто законско решение за реализирање на уставното право, додаде Фетаи.
На новинарско прашање дали ги слуша препораките од Државната комисија за спречување на корупцијата (ДКСК), Фетаи одговори дека ја поддржуваат работата на оваа институција, ги прифаќаат нивните извештаи и ги следат нивните препораки.
-Јас имам постојани контакти со членови на Антикорупцијата. Активно учествуваме во изготвување на новиот Закон против корупцијата и политички ја поддржуваме работата на оваа институција. Се разбира, ги прифаќаме нивните извештаи и ги следиме нивните препораки. Како вицепремиер и како дел од коалицијата, можам да кажам дека сите сме заинтересирани да докажеме дека нашата влада е реформска, посветена на владеење на правото и на борбата против корупцијата. Ќе видите дека за првпат ќе има промена околу пристапот на финансирање на институциите против корупцијата. Какво Влада заинтересирани сме да инвестираме повеќе буџетски ресурси во сите антикорупциски институции, додаде Фетаи.