Македонија
Ванчо Чифлиганец по вторпат добитник на најпрестижната награда во Радовиш

Ванчо Чифлиганец денеска по вторпат ја доби највисоката награда 6 Ноември, која ја доделува Општина Радовиш.
Чифлиганец е бизнисмен, сопственик на градежната компанија „Адора инженеринг“ и најголем акционер во „Комерцијална банка“, хуманист, филантроп, кој има вложено над 5 милиони евра во поддршка на образованието, здравството, науката, спортот, културата во земјава, од кои значаен дел и во неговиот роден Радовиш.
„Ќе ни треба многу време за да ги наброиме донаторските акции, спонзорства, поддршката што и денеска Чифлиганец несебично им ги дава на голем број граѓани од Радовиш и Радовишко, за обнова на целосно опожарената куќа во село Дедино на семејството Трајкови, донации за голем број спортски клубови во речиси сите спортови, борење, ракомет, баскет, џудо, стрелаштво, алпинисти и на младите спортисти. Особено се значајни донациите во образованието, градинките и училиштата, со опрема, од училишни клупи и столчиња, до смарт-табли, компјутери, таблети за реализирање на наставата во услови на пандемија, како што беше една од последните донации во октомври годинава“, се вели во образложението за наградата подготвено од Советот на Општина Радовиш.
Во него се додава и дека граѓаните на Радовиш добро го паметат времето кога Чифлиганец бил на чело на рудникот „Бучим“ како генерален директор, десет години во кои, како што се вели, Радовиш доживел ренесанса.
Заблагодарувајќи се за наградата, Чифлиганец истакна дека е горд на своите сограѓани и дека енергијата сите овие години ја црпи токму од неговото родно место Раклиш, Радовиш, и од сите граѓани од Радовишко.
Тој им порача на младите да бидат толерантни и да градат пријателства, а непријателите и оние што се против нив, да ги освојуваат со дела.
„Мојот слоган уште од 1994 години е ‘само делата се вистина’, а во последните 20 години не застанав со работа и градење добри дела и тој слоган го надградив со ‘како каменот што тежи на своето место, така човекот тежи со своите дела’. Оваа реченица е водилка на мојот живот“, истакна Чифлиганец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.