Македонија
Захариева бара да се состане меѓувладината комисија за договорот за добрососедство

Министерката за надворешни работи, Екатерина Захариева, ќе им предложи на премиерите на Бугарија и Македонија, Бојко Борисов и Зоран Заев, да биде свикана меѓувладината комисија за спроведување на договорот за добрососедство.
„Нашите забелешки не се само за историјата, туку и за напредокот на инфраструктурните проекти, како што е Коридорот 8. Секој што патува ја гледа состојбата на односите меѓу двете земји. Повеќе од една и пол година чекаме на програмата за соработка од областа на културата и образованието, која ја испративме, но сè уште немаме одговор од нив. Само во областа на туризмот е постигнат напредок, но ова беше пред пандемијата на коронавирусот. Овој напредок воопшто не е доволен“, рече Захариева.
Бугарската министерка повторно ги повика македонските власти да се обидат да го спроведат договорот со добра волја.
„Бугарија е крајно категорична. Ние сакаме да видиме во рамките на преговорите дека договорот ќе се спроведе, дека нема никакви претензии за малцинствата во Македонија. Има над 15.000 антибугарски публикации. Не можеме да ги едуцираме генерациите да мразат. Не можеме да бидеме сојузници во НАТО и бугарските војници да се нарекуваат фашистички окупатори“, додаде таа.
Захариева ги опиша како неосновани обвинувањата на македонскиот вицепремиер за европски прашања, Никола Димитров, дека Бугарија го крши членот 2 од договорот.
„Ги повикувам подобро да го прочитаат членот 2 од договорот и тој го спроведува Бугарија. Во него се вели дека Бугарија ќе ја поддржи РС Македонија на евро-атлантскиот пат споделувајќи го своето искуство, но тоа не значи дека не можеме да имаме услови. Изјавата дека само Бугарија има тврдења против Македонија за исполнување на критериумите не е точна“, рече таа.
Захариева порача дека никој нема да изврши притисок врз Бугарија.
„Мојата порака до Северна Македонија е да не се потпира дека некој ќе изврши притисок врз Бугарија да замижиме на неспроведувањето на договорот за пријателство и добрососедство, што го потпишавме во 2017 година. Да се вратиме на тонот на добрососедството и спроведувањето на договорот“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицевски: Интерпелацијата за министерот Тошковски не доби поддршка

„Интерпелацијата за министерот Панче Тошковски не доби поддршка. Очекувано од неколку причини“, напиша Никола Мицевски, пратеник од ВМРО-ДПМНЕ.
„Потребна е стабилност, а не политичко дестабилизирање. Во услови кога Владата е во фаза на спроведување важни реформи, особено во безбедносниот сектор, несериозни интерпелации создаваат дополнителна нестабилност и можат да го компромитираат спроведувањето на започнатите процеси. Јавната безбедност бара стабилност, континуитет и институционално зајакнување, а не секојдневни политички турбуленции“, додаде тој.
Македонија
Ахмети: Албанците се соочуваат со опасна офанзива насочена кон демонтажа на клучните столбови на Охридскиот рамковен договор

Претседателот на Демократската унија за интеграција, Али Ахмети, денес беше пречекан во Приштина од страна на претседателката на Република Косово, Вјоса Османи. Средбата се одржа во топла атмосфера и се фокусираше на политичката ситуација во двете земји, регионалните предизвици, меѓусебната соработка и загрижувачките случувања во Северна Македонија, извести ДУИ.
Ахмети ѝ се заблагодари на претседателката Османи за топлиот прием и го пофали нејзиниот лидерски ангажман во достоинственото претставување на Косово на меѓународната сцена. Тој ги поздрави успешно завршените избори и изрази очекување за брзо формирање на институциите, како и за потребата од поблиска координација и заеднички ставови во одбрана на заедничките интереси и зачувување на стабилноста, мирот и евроатлантската интеграција во регионот.
Во овој контекст, Ахмети ја изрази својата длабока загриженост за влошувањето на политичката и институционалната состојба во Северна Македонија, каде Албанците се под систематски напад од еден хибриден политичко-олигархиски блок со етнички супремацистички карактер и со политички инжињеринг на албанското претставување.
„Денес, Албанците се соочуваат со опасна офанзива насочена кон демонтажа на клучните столбови на Охридскиот рамковен договор. Уставниот суд се трансформира во партиски инструмент со кој се укинуваат темелите на еднаквоста, како што се употребата на албанскиот јазик и механизмите на Бадентеровото мнозинство и балансерот. Ова претставува флагрантно прекршување на принципот на меѓуетничка еднаквост,“ истакна Ахмети.
Тој додаде дека европската агенда е маргинализирана, а земјата е оддалечена од патот на интеграцијата и соживотот.
За првпат, во јавниот и политичкиот дискурс почнуваат да навлегуваат алтернативни идеи спротивни на мултиетничкиот и унитарен карактер на државата, како што е предвидено со Охридскиот рамковен договор, се додава во соопштението на ДУИ.
Македонија
Ковачки: Денешната интерпелација служи како штит за оние што се соочуваат со правдата

„Денешната интерпелација, служи како штит за оние што се соочуваат со правдата, обидувајќи се да го дискредитираат напорот за расчистување со наследените криминални мрежи на ДУИ и СДС. Граѓаните заслужуваат да знаат дека ваквите потези не се во интерес на правдата, туку во интерес на заштита на старите политички елити“, напиша на социјалните мрежи, Драган Ковачки, пратеник од ВМРО-ДПМНЕ.
„Поделбата на власта е сржта на нашиот уставен поредок. Таа осигурува дека ниту една институција, ниту поединец, ниту политичка сила не може да се издигне над законот.
Многу важно место има какво-таквото Јавното обвинителство, кое е независна институција со јасна мисија: да ја спроведува правдата без пристрасност, без страв и без мешање.
Во трагични моменти, како случајот во Кочани, разбирливо е дека јавноста е потресена.
Гневот и тагата се природни реакции за сите нас, но не смееме да дозволиме тие да ја надвладеат правната процедура.
Јавното обвинителство, кое веќе има осомничено над 60 лица во врска со оваа трагедија, мора да има простор да ја заврши својата работа – да ги утврди фактите, да ги собере доказите и да ги изведе одговорните пред лицето на правдата.
Секое политичко мешање, секој притисок врз оваа институција – без разлика дали доаѓа од власта или од опозицијата – е закана за демократијата“, додаде Ковачки.