Свет
Кина тестира милиони луѓе и затвора училишта поради неколку случаи на новозаразени

Кинеските власти тестираат милиони луѓе, воведуваат карантини и затвораат училишта кога минатата недела открија неколку локални трансмисии на коронавирус во три града во земјата.
Деновиве се спроведуваат обемни мерки во градовите Танџин, Шангај и Манџули и покрај релативно малиот број потврдени нови случаи на коронавирус во споредба со САД и другите земји каде што се забележуваат нови бранови на зараза.
Многу експерти и владини претставници предупредија дека вирусот е поверојатно да се прошири со студеното време.
Неодамнешните нови жаришта покажаа дека сè уште постои ризик од враќање на вирусот, иако во голема мера е под контрола во Кина.
Националната здравствена комисија пријави две нови локални пренесувања на коронавирусот во Шангај во претходните 24 часа, што е вкупно седум случаи од петокот.
Двата најнови случаја на зараза во Шангај се блиски контакти на работници на аеродромот, каде што беше потврдена зараза од коронавирусот во ноември.
Синоќа, меѓународниот аеродром во градот Пудонг одлучи да ги тестира своите вработени и собра 17.719 примероци до раните утрински часови денеска.
Планирано е да се тестираат други во околните заедници доколку се евидентираат нови случаи на зараза.
Видеа објавени преку социјалните мрежи покажуваат хаотични сцени на аеродромот кога на вработените им биле дадени итни упатства да се тестираат. Се гледаат луѓе додека стојат во големи групи и се туркаат меѓу службените лица во заштитни костими.
Шангај е повеќе селективен во однос на масовното тестирање, насочено кон луѓе поврзани со одредено место, како што е аеродром или болница, наместо да тестира цела населба.
Во Тијанџин здравствените власти собраа повеќе од 2,2 милиона тестирани примероци од жители на округот Бинхај бидејќи минатата недела беа регистрирани пет локално пренесени случаи.
Во Тијанџин властите затворија една градинка и ги преместија сите воспитувачи, семејства и деца во централизирана област во карантин. Тие исто така го затворија станбениот комплекс каде што беа пронајдени тие пет случаи.
Во Манџурија, град со над 200.000 жители, локалните здравствени власти ги тестираат сите жители кога во саботата пријавија два случаја на зараза од коронавирусот. Тие исто така ги затворија сите училишта и јавни места и забранија јавни собири и прослави.
Кина применува груб пристап секогаш кога ќе се забележи локални случаи на пренесување. Заклучува цели населби и тестира милиони луѓе.
Кина евидентирала вкупно 86.442 потврдени случаја на зараза и 4.634 починати од моментот кога вирусот првпат беше забележан во градот Вухан кон крајот на минатата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Премиерот на Канада: Путин се плаши да се сретне со Зеленски

Рускиот претседател Владимир Путин се плаши да се сретне со украинскиот претседател Володимир Зеленски за да разговара за условите за завршување на војната, изјави канадскиот премиер Марк Карни на заедничката прес-конференција со германскиот канцелар Фридрих Мерц.
Како што објави Укринформ, Карни рече дека Путин постојано поставува нови услови и ги одложува работите затоа што се плаши од состанокот. Според канадскиот премиер, Зеленски е подготвен да се сретне со Путин на која било неутрална територија.
Премиерот на Канада нагласи дека Зеленски не очекува Путин да дојде во Киев или дека самиот ќе патува во Москва за таков состанок. Сепак, секоја неутрална локација би била прифатлива, додаде Карни.
Тој рече дека е клучно сојузниците на Украина да продолжат да даваат поддршка додека не се одржи таков состанок.
Фото: принтскрин
Свет
Зеленски: Од украинска страна, сè ќе биде што е можно поподготвено за да се стави крај на војната

Украинскиот претседател Володимир Зеленски објави дека во текот на оваа недела претставниците на таа земја ќе имаат повеќе меѓународни контакти, што би можело да биде чекор кон завршување на војната со Русија, како и дека „сè ќе биде максимално подготвено за завршување на војната“ од украинска страна.
„Оваа недела ќе има контакти со Турција, ќе има контакти со земјите од Заливот, со европските земји, што може да биде платформа за разговор со Русите“, рече Зеленски во вечерното видео обраќање, пренесува Укринформ.
Тој рече дека е важно земјите-партнери на Украина да го потврдат ова.
„Дури и во иднина, сè ќе зависи исклучиво од волјата на светските лидери, првенствено на Соединетите Американски Држави, да извршат притисок врз Русија“, нагласи Зеленски.
Според него, потребни се нови чекори и нов притисок преку санкции и царини за да се принуди Русија да ја заврши војната.
„Тукушто одржав состанок со дипломатскиот тим – Министерството за надворешни работи, Канцеларијата, сите. Подготвуваме нови контакти со лидерите на земјите партнери. Очекуваме дека наредните недели ќе бидат многу активни“, додаде Зеленски.
Фото: принтскрин
Свет
Трамп: Нема да има светска војна, но ќе има економска

Претседателот на САД, Доналд Трамп, изјави дека е подготвен да воведе економски санкции врз Русија доколку рускиот претседател Владимир Путин не се согласи на прекин на огнот, предупредувајќи на сериозни последици.
„Сакаме да заврши. Имаме економски санкции. Зборувам за економски бидејќи нема да влеземе во светска војна“, рече Трамп.
Трамп не постави нова временска рамка за спроведување на санкциите доколку војната во Украина не престане, објави Си-Ен-Ен.
„Нема да има светска војна, но ќе има економска војна. Ќе биде лошо за Русија“, рече Трамп.
Тој изрази надеж дека сè уште постои пат до медијација во постигнувањето договор за прекин на војната во Украина.
Трамп, исто така, повторно посочи дека украинскиот претседател Володимир Зеленски носи дел од вината за конфликтот.
„Она што мислев дека ќе биде најлесно, се покажа како најтешко“, рече Трамп за војната во Украина, наведувајќи дека сè уште мисли дека ќе може да помогне во прекинувањето на тој конфликт.
Трамп неколку пати се закани со воведување санкции кон Русија ако не ја заврши војната во Украина и постави временски рамки за тоа, но подоцна ги продолжи, потсетува CNN.
Фото: принтскрин