Македонија
Плевнелиев: Скопје да даде гаранции за реформи, Софија да се откаже од ветото

Oднecите меѓy Софија и Скопје треба итно да деескалираат со одлучен чекор направен од двете страни, вели поранешниот бугарски претседател Росен Плевнелиев во анализа за „24 часа“.
„Се наоѓаме во историски момент. Бугарија има голема одговорност за она што се случува во регионот. Одлуките што треба да се донесат оваа недела во Софија, Скопје, Берлин и Брисел секако ќе ја сменат насоката. Се надевам дека е за добро на сите. Со среќа“, вели Плевнелиев.
Според него, доброто сценарио е македонскиот премиер Зоран Заев да почне длабоки реформи, воведувајќи ги европските вредности и принципи во политиката, институциите, учебниците, тајните служби, општеството и пристапот кон историјата. Плевнелиев е дециден дека ќе биде добар чекор доколку Заев и Борисов продолжат да разговараат и да прават компромиси.
„Заев мора да покаже добра волја со елиминирање на вештачкото прашање за македонско малцинство во Бугарија, а Борисов да ја прифати статус кво состојбата во Северна Македонија“, вели Плевнелиев.
Тој нагласува дека добро се сеќава на мрачните години од режимот на Никола Груевски, а на Заев гледа како светло во тунелот и надеж за подобра иднина.
Според Плевнелиев, Скопје пред 25 години направило грешка во односите во Грција, а ако тогаш се одлучило за компромис и соработка со властите во Атина, Северна Македонија досега ќе била дел од ЕУ заедно со Бугарија, Хрватска или Романија, а можеби и порано.
Тој вели дека Северна Македонија сега е соочена со истата дилема – да се спротивстави или да соработува со Бугарија. Сепак, како што истакнува Плевнелиев, најголем предизвик за македонската влада во моментот е идеологијата на Тито поддржана од Русија и идејата за „Голема Албанија“ на Албанците во Северна Македонија.
Плевнелиев оценува дека Албанија е понапредна и работи напорно за почеток на преговорите, а како еден од примерите во таа насока го посочува пописот на населението.
„Во Албанија спроведоа национален попис, кој го гарантира правото на различните малцинства, вклучувајќи го и бугарскоро малцинство. Во Северна Македонија сè уште немаме фер попис за сите етнички малцинства. Република Северна Македонија продолжува да негира дека има граѓани со бугарско етничко потекло, наспроти фактот дека над 100 илјади граѓани во Северна Македонија поседуваат бугарски пасоши откако го докажаа своето бугарско потекло“, вели Плевнелиев.
Тој предлага историската комисија да се прошири со ценети историчари од Европа, за да дава објективни резултати.
„Доколку Северна Македонија даде гаранции, прифаќајки ја рамката за преговори предложена од бугарската влада во дијалот со германското претседателство, вратата за членство во ЕУ може да се отвори уште во декември“, вели Плевнелиев.
Според него, лошо сценарио е ако раководството на Скопје одлучи дека стратегијата за победа е да продолжи да се претставува како жртва, што било случај со Грција во минатото.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Скопјанец преку веб-страница продавал билети за непостоен концерт

Полицијата поднесе кривична пријава за скопјанец кој преку веб-страница продавал билети за непостоен концерт.
Денеска, Секторот за компјутерски криминал поднесе кривична пријава против А. Х. (25) од Скопје за сторено кривично дело компјутерска измама.
Според информациите од МВР, А. Х., во периодот од 4.4.2025 до 13.6.2025, како одговорно лице на компанија што организира музички настани, преку веб-страница за продавање билети овозможил електронско купување билети за концерт што воопшто не бил предвиден да се одржи, односно не бил склучен никаков договор за негово одржување, со што ги довел лицата во заблуда да купат билети за концертот и притоа не ги рефундирал парите.
Од МВР најавија дека продолжува активно да спроведува мониторинг на содржините на социјалните мрежи и на целокупниот интернет-простор, со цел превенција од повикување на насилство, загрозување на сигурноста, ширење расистички и ксенофобичен материјал по пат на компјутерски систем, злоупотреба на лични податоци и говор на омраза со елементи од кривични дела за кои се постапува по службена должност.
Македонија
Утре, сончево време, со локална појава на дожд и грмежи

Времето утре ќе биде сончево со мала до умерена облачност. Попладне, претежно во северните делови, ќе има изолирана појава на нестабилност со пороен дожд и грмежи. Ќе дува умерен, наместа повремено засилен ветер од северен правец, информира УХРМ.
Минималната температура ќе биде во интервал од 11 до 18, а максималната ќе достигне од 27 до 35 степени.
Во Скопје сончево со мала до умерена облачност. Попладне во делови од котлината ќе има услови за краткотраен пороен дожд и грмежи. Ќе дува умерен, во делови од котлината повремено засилен ветер од северен правец. Минималната температура ќе се спушти до 16, а максималната ќе достигне до 33 степени.
Потоа следува период на стабилно и топло време со пораст на дневната температура.
Македонија
„Влен“ најави нова болница во Кичево, инвестиција од 47,5 милиони евра

Кичево ќе има нова, целосно модерна болница, достојна за 21 век и за граѓаните кои живеат со гордост, достоинство и доверба во оваа земја, изјави Беким Сали од ВЛЕН.
„Инвестицијата од 47,5 милиони евра во Кичево ќе овозможи изградба на регионален центар по европски стандарди, со нова модерна инфраструктура, најсовремена медицинска опрема и услови што инспирираат безбедност и доверба кај пациентите и стручниот персонал. Тоа ќе биде болница каде што здраството се среќава со етиката, каде што професионализмот се среќава со почитта и каде што услугата не е привилегија, туку човеково право“, рече Сали.
Тој додаде дека граѓаните од Кичево, Македонски Брод, Пласница, Зајаз, Вранештица, Демир Хисар и пошироко ќе гравитираат кон овој здравствен центар, и за прв пат по многу децении ќе се чувствуваат рамноправни, застапени и згрижени.
Сали, исто така, кажа дека само во Тетово, инвестицијата во подобрување на болничката инфраструктура достигнала 77,5 милиони евра, што вклучува изградба на два нови објекти, реновирање на блокот за хирургија и интерна медицина, како и нов Медицински факултет.