Македонија
Вакцинирањето во земјата ќе почне до март и ќе биде бесплатно
Вакцинирањето против Ковид-19 ќе почне во првите два-три месеци в година, најави министерот за здравство, Венко Филипче.
Ќе се примаат по две дози, а на 21. ден по втората доза се очекува лицето да стекне имунитет.
„Во делот на набавката на вакцините, да повторам дека се веќе се обезбедени 833 илјади вакцини за 400 илјади граѓани преку Ковакс-механизмот. Тоа е механизам на СЗО и глобалната Алијанса за имунизација, во која учествуваат сите соседни земји, освен членките на ЕУ. Покрај овој механизам, веќе доставивме барања за директни договори до две светски компании – ‘Астра зенека’ и ‘Фајзер’ за нивните вакцини и по нивните иницијални одговори, сега ја чекаме и дефинитивната потврда дека дополнтелна количина ќе можеме да набавиме директно од компаниите“, рече Филипче.
Освен тие вакцини, министерот вели дека ќе биде искористен и механизмот што го понудија некои од членките на ЕУ.
„Беа договорени 400 милиони дози за граѓаните на ЕУ, а од кои 100 милиони за земјите што не се членки на Унијата. Иницијална понуда добивме од Полска и од Грција. Освен тоа, аплициравме за 800 илјади допоплнителни дози“, истакна министерот.
Фрижидерите на -70 степени, кои служат за чување на вакцините, се набавени од американска фондација, која министерот не ја именува, и тие ќе пристигнат на почетокот на јануари.
„Вакцинацијата ќе се врши во постојните наши капацитети, а тоа се вакциналните пунктови и болниците. Ќе се спроведе брз процес на тренинг за вакцинирање, сите здравствени работници ќе бидат соодветно обучени. Веќе имаме соодветна експертиза во делот на здравствените работници што работат на вакциналните пунктови“, рече Филипче.
Цената на вакцината изнесува 10 долари, но таа за граѓаните ќе биде бесплатна.
Пациенти што прележале Ковид-19 ќе може, доколку сакаат, да се вакцинираат, но сепак ќе постои приоритетна листа.
Како приоритет ќе се вакцинираат сите здравствени работници што работат во ковид-центрите или се директно изложени или работат со заболени или суспектни. Понатаму, здравствените работници што работат на земање брисеви, граѓаните над 65 години и пациентите со хронични болести во делот на хронично белодробни и кардиоваскуларни болести според шифрите на дијагноза преку системот „Мој термин“, како и вработените во критичната инфраструктура и транспортот.
„Епидемијата е сѐ уште многу силна. Има навистина многу голем број заразени. Пред нас претстои период на традиционални семејни собири и слави. Апелирам и замолувам – сите да се воздржиме од такви прослави и собири, сигурен сум дека в година новогодишните и сите други празници практично ќе се слават како што тоа било порано. Но, оваа година сите да ги почитуваме мерките, да не се групираме заради тоа што тоа е најефикасниот начин на спречување на патот на заразата“, апелира Филипче.
На прашањето во однос на тоа кои категории граѓани треба да се вакцинираат, претседателката на Комитетот за имунизација, д-р Александра Грозданова, потенцира дека правилото за примање вакцина, како за сите други вакцини така и за ковид-вакцината, е таа да се прими во општа добра здравствена состојба.
„Пациентите што прележале Ковид-19, во зависност од состојбата во која се наоѓаат и временскиот период, секако, доколку сакаат, може да ја примат вакцината, но имајќи предвид дека ќе имаме приоритетна листа, ќе треба на некаков начин да им се даде приоритет токму на тие категории. Како што спомна министерот, здравствените работници директно изложени на работа во ковид-центрите, тие што ги третираат или работат со пациенти, микробиолошките лаборатории и оние што ги тестираат и потоа, секако, хронично болните. Од хронично болните ќе се прави приоритет во зависност од нивната здравствена состојба, најчесто се тоа кардиоваскуларните заболувања, респираторните, малигните заболувања и, секако, еден параметар ќе биде возраста кај пациентите, поприоритетна ќе биде повозрасната група пациенти. Во моментот со оваа категорија вакцини не се опфатени децата. Врз основа на резултатите од клиничките испитувања, по 21. ден од втората доза, би можело да се очекува покачување на титарот на заштитните антитела. Кога вистински ќе дојде, ќе видиме индивидуално, меѓутоа повторно ќе кажам – како и за секоја вакцина, по примање на втората доза, најмалку во тој период од еден месец би се очекувал заштитниот ефект од вакцината“, истакна Грозданова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДПМНЕ пак дели тендери, фирмата на Нефи Усеини дел од колачот вреден 3 милиони евра, велат од СДСМ
Мицкоски и ДПМНЕ сите тендери ги собраа за себе, па почна да ги раздаваат. Фирмата на контроверзниот Нефи Усеини од Охрид, кадар на ДУИ, добила дел од тендерот вреден 3 милиони евра од Македонија пат, за зимско одржување патишта, истакнуваат од СДСМ.
„Додека секој ден зборуваат за ДУИ пред граѓаните зад грбот им делат тендери.
Никој не може да добие тендер без одобрение на Мицкоски и ДПМНЕ.
Владата на Мицкоски нема пари за земјоделците, нема за сточарите, им ги нема исплатено ниту субвенциите. Но затоа за криминални тендери мора да има пари“.
Дури и парите од ИПАРД 3 програмата, како што додаваат од опозициската партија, посегнаа да ги крадат, по што ЕУ ја суспендираше програмата вредна 130 милиони евра поради корупција.
Прашуваат, дали земјоделците имаат разбирање за ваквото однесување на ДПМНЕ.
Македонија
Утре променливо облачно, претпладне со појава на магла по одделни котлини
Утре променливо облачно, претпладне со појава на магла по одделни котлини. Попладне и во текот на ноќта ќе има повремени локални врнежи од дожд. На планините врнежите ќе преминуваат во снег. Минималната температура ќе биде во интервал од -3 до 3 , а максималната ќе достигне од 5 до 12 степени.
Во Скопје, променливо облачно и тивко со појава на магла. Кон крајот на денот и во текот на ноќта ќе има повремени врнежи од дожд. Минималната температура ќе се спушти до 0, а максималната ќе достигне до 7 степени.
Под влијание на влажни воздушни бранови во среда и четврток ќе има повремени локални врнежи од дожд, кои наместа ќе бидат пообилни (над 25 л/м2 за 24 часа). На планините врнежите ќе бидат од снег при што ќе се формира снежна покривка од 5 до 10 см. Поради спуштање на постуден воздух од север, врнежите ќе преминуваат во снег и на некои од повисоките места. Од петок ќе има стабилизирање на времето.
Македонија
Гаши-Спиропали: Албанија ќе продолжи да ја поддржува Северна Македонија во европските процеси се до конечно надминување на сите потешкотии
Претседателот на Собранието, Африм Гаши, денеска оствари средба со министерката за надворешни работи на Република Албанија, Елиса Спиропали.
Гаши констатираше дека двете држави градат одлични билтерални односи, со интензивен политички дијалог и соработка во значителен број области од заемен интерес. Тој истакна дека се радува на прогресот што Албанија го има при процесот на приближување кон Европската унија и отворање на сите преговарачки кластери согласно новата методологија на ЕУ.
Спиропали истакна дека иако Албанија веќе преговара за членство во Европската Унија, смета дека и останатите држави од Западниот Балкан треба да ја следат и процесот на проширивање треба да продолжи затоа што носи голема трансформација во сите општества на земјите во регионот. Албанија ќе продолжи да ја поддржува Северна Македонија во европските процеси се до конечно надминување на сите потешкотии што се појавуваат на европскиот пат.
Двајцата соговорници се согласија дека зачленувањето во Европската унија носи големи придобивки за граѓаните на земјите од Западниот Балкан затоа што процесот е реформски и потребно е да се имплементираат домашни задачи, како што е борбата против корупцијата и реформи во правосудните системи.

