Пратеничката група на СДСМ и коалицијата на денешната седница на комисијата за финансирање и буџет, посветена на ребаланост на Буџетот поднесе амандман за зголемување на буџетските средства за противпожарна заштита во износ од 500 милиони денари.

„Со предложениот амандман бараме зголемување на буџетските средства наменети за функционирањето и развој на територијалните противпожарни единици во износот 500 милиони денари, со цел зголемување на платата на пожарникарите нови вработувања и подобрување на условите за работата безбедноста и ефикасноста на пожарникарите, како и за одржување на постојната механизација, подобрување на условите за работа во противпожарните станици, набавка на лична заштитна опрема за пожарникарите и дополнителен надомест за вонредно ангажирање на пожарникари и други лица“, истакна пратеничката на СДСМ Сања Лукаревскa, образложувајќи го амандманот.

Лукаревска нагласи дека изминатиот период има активни пожари низ целата држава -Чучер Сандево, Крива Паланка Николич во Дојран, Куманово, Македонски Брод, Прилеп, вчера актуелно и пожарот во Злокуќани во Карпош и на други населени места, а истото се случи и минатата година, кога изгоре 10% од територијата на државата.

„Ние, како пратеничка група на СДСМ и коалицијата, добро знаете дека ги повлековме сите амандмани за да имаме насочени средства повеќе кон системите во Центарот за управување со кризи и Дирекцијата за заштита и спасување. Сè што треба да се направи за да се помогне на овие институции, за да не доаѓаме во ситуации да немаме соодветни капацитети, да немаме доволно капацитети и да не сме соодветно подготвени. Затоа треба да бидеме вклучени сите во рамки на овој процес“, кажа таа.

Додаде дека законот предвидува да има еден пожарникар на 1.500 жители.

„Врз основа на оваа математика има двојно помалку пожарникари од законски предвидените норми. А се провлекува, исто така, и проблемот со возила и со опрема. Во моментот, ако ја имаме предвид оваа законска одредба, имаме помалку од 400 пожарникари во сите единици, иако тој број треба, нели, да биде поголем од 800“, рече Лукаревска, додавајќи дека дел од пожарникарите работат со стари возила, некаде и од 50-тата година и со стара опрема, а не постои ниту соодветен тренинг-центар за обука на новите и старите пожарникари.

Според неа, иако има огромен број на донации и од посебни организации, и од амбасади, сепак секоја општина е оставена сама на себе да се снаоѓа.

„Затоа треба сите заеднички да направиме напори да ја унапредиме оваа ситуација — да создадеме подобри услови и за противпожарниот систем, но и да овозможиме соодветно вреднување на трудот на самите пожарникари. На минатиот ребаланс во 2024 година, повторно, како пратеничка група на СДСМ и коалицијата, поднесовме амандман за соодветна награда за пожарникарите, полицајците, војниците и сите оние коишто учествуваа во гасењето на пожарите, бидејќи во тој период алармиравме и укажувавме дека се наоѓаме во сериозен процес. Врз основа на тоа, потребно беше да се дадат соодветни награди и соодветна сатисфакција. Но, повикувавме да имаме еден заеднички пристап, да не полемизираме, да не ја злоупотребуваме состојбата за евтини политички поени — напротив, сите заеднички да застанеме во афирмација на овој процес“, истакна Лукаревска.

Првиот заменик-претседател на Владата и министер за животна средина и просторно планирање, Изет Меџити, денеска одржа работна средба со шефот на Светската здравствена организација во Северна Македонија, Аким Али, и координаторката на процесот, Симона Атанасова, на која беше претставена финалната верзија на Стратегијата за соработка за периодот 2026–2030 година.

Стратегијата претставува клучна рамка за заедничка работа меѓу СЗО и државните институции во следните пет години, со јасен фокус на јавното здравје, климатските промени и квалитетот на животната средина. Новата Стратегија е усогласена со националните здравствени приоритети, Целите за одржлив развој и процесот на пристапување во Европската Унија.

Меџити порача дека интеграцијата на здравјето и екологијата не е само потреба, туку обврска кон идните генерации.

„Грижата за животната средина е директна грижа за здравјето на нашите граѓани. Затоа, Министерството ќе продолжи да биде двигател на политики што го подобруваат квалитетот на воздухот, чистата вода, климатската адаптација и одржливото урбано планирање – како клучни предуслови за подобро здравје и благосостојба. Оваа стратегија ја потврдува нашата заложба да делуваме навремено, одговорно и системски,“ изјави Меџити.

Во изработката на Стратегијата учествуваа над 150 претставници од институции, граѓански организации, младински групи и развојни партнери, а Министерството за животна средина одигра клучна улога во вклучувањето на еколошките аспекти како суштинска компонента на јавното здравје и одржливиот развој.

Следниот чекор е заедничко потпишување на Стратегијата на меѓуресорски состанок во есен 2025 година, со учество на премиерот, министерот за здравство, регионалниот директор на СЗО и други високи претставници.

Пратеничката група на СДСМ и коалцијата поднесе комисиски амандман за ребалансот на Буџетот, со кој се предлага обезбедување на средства во висина од една милијарда и дваесет милиони денари за финансиска поддршка на повредените и семејствата на починатите лица во трагедијата што се случи во дискотеката „Пулс“, во Кочани, како и за реновирање и набавка на неопходна медицинска опрема за Општата болница во Кочани.

„Во март се случи најголемата трагедија во историјата на нашата држава. Загинаа 62 млади животи, а над 200 лица беа повредени, од кои многу со трајни последици. Владата досега не инвестираше доволно за справување со последиците, а најголем дел од помошта стигна од граѓаните и општествено одговорни компании преку Црвениот крст и Сапорт Кочани“, рече пратеничката на СДСМ, Јована Тренчевска.

Таа додаде дека амандманот е одговор на секојдневните апели на семејствата на загинатите и на повредените, кои со месеци бараат поддршка и правда.

„Сведоци сме секојдневно на излегувањето низ улиците на Кочани на семејствата на загинатите. Сведоци сме секојдневно на барањето на помош и поддршка од настраданите и повредените од оваа трагедија, од овој пожар, и од тие причини сметаме дека овој амандман навистина ќе помогне и во справувањето со проблемите во болницата, и за обезбедување на средства за реновирање и за обезбедување на медицински материјал, меѓутоа и во оној дел што значи поддршка и помош на семејствата и на повредените од пожарот во Кочани“, рече Тренчевска.

При тоа, Тренчевска апелираше до сите пратеници да го поддржат амандманот, испраќајќи порака дека Собранието треба да стои зад граѓаните во најтешките моменти.

„Да покажеме дека сме единствени кога е најпотребно – за да помогнеме, да обновиме и да вратиме надеж таму каде што е најмногу изгубена“, изјави Тренчевска.