„Катастрофата што СДСМ ја создаде во АД ЕСМ е најочигледна преку секојдневната борба на новото раководство да го одржи производството во Рударско-енергетските комбинати РЕК Битола и РЕК Осломеј. Актуелното раководство ја наследи компанијата во целосен колапс и за тоа ќе одговараат виновниците“, реагираат од АД ЕСМ.

„Нема ден да не се соочуваме со предизвици како резултат на недомаќинското и нестручното управување со производствените капацитети во изминатите години. Штетата нанесена на термоцентралите и рудниците за јаглен бара натчовечки напори за стабилизација и за жал, последиците од нивното неразумно владеење и деструкција ќе се чувствуваат уште некое време. Процесите на консолидација се комплексни и едноставно не можат да се реализираат за неколку месеци.

Зачудувачка е дрскоста на опозицијата што се осмелува да коментира за одржувањето на постројките, кога токму тие се одговорни за:

· Оставање на термокапацитетите без неопходни ремонти.

· Систематска негрижа за механизацијата и урнисување на рудниците преку хаотично копање надвор од рударските проекти.

· Празни депонии без јаглен.

· Неплански исцицан хидропотенцијал.

· Систематско полнење со партиски, нестручни кадри во сите сектори, подружници и ДООЕЛ-и, и за деформирани систематизации кои ја доведоа компанијата во финансиска и организациска бездна.

· Закупи на LNG терминал и прекугранични капацитети преку кои не е можно да се донесе ниту 1 грам гас до државата и за кои ќе претрпиме најмалку 50 милиони евра штета во наредните 15 години, за колку што нè врзале со штетни договори.

И за сето останато за кое се доставени или допрва ќе се достават сите наоди до соодветните институции за постапување.

Затоа, апелираме СДСМ да престане со шпекулации и со дрски обвинувања заради собирање евтини политички поени преку грбот на РЕК Битола и Осломеј“, се наведува во соопштението на АД ЕСМ.

Министерот за социјална политика, демографија и млади, Фатмир Лимани заедно со заменик министерот, Ѓоко Велковски и претставници на Германското друштво за меѓународна соработка (ГИЗ), ја посетија Националната младинска летна школа за социјална инклузија, која се одржува во Маврово.

Во своето обраќање пред присутните млади, министерот Лимани искажа задоволство од изразениот интерес на младите за учество на летната школа и благодарност до Амбасадата на Германија во земјава вклучително и ГИЗ за соработката.

„Вистинско задоволство е да бидеме пионери во креирањето на платформи за зајакнување на нашата младина. Ова е прво издание на Националната младинска летна школа за социјална инклузија, иницијатива која го носи силниот печат на нашето Министерство за социјална политика, демографија и млади. Прва Национална младинска летна школа за социјална инклузија — иницијатива која го носи духот на солидарноста, еднаквоста и визијата за поинклузивно општество,“ истакна Лимани.

Тој посочи дека школата не е само проект, туку симбол на нов почеток. Симбол на партнерство, на заедничка работа и на вистинска посветеност – и од институциите, и од младите.

„Денес испраќаме силна порака – дека младите се во центарот на нашите политики и дека инклузијата не е опција, туку потреба. Во едно здраво и праведно општество, никој не смее да биде оставен зад себе. Затоа сме тука: да ги слушнеме младите, да ги поддржиме, да ги охрабриме да бидат носители на промените што сакаме да ги видиме“, порача Лимани.

Тој се осврна на суштината на школата која претставува простор за учење, вмрежување, градење лидерски вештини, но и за развој на чувствителност и одговорност кон другите. Преку предавања, работилници и практични активности, спорт, младите имаат можност да ги развијат своите потенцијали и да станат гласници на социјалната правда во своите заедници.

„Како Министерство, остануваме посветени на креирање на инклузивни младински политики, заштита на ранливите групи и зајакнување на гласот на младите. Ова е само почеток – и верувам дека заедно, со поддршка од партнерите, ќе изградиме трајни решенија кои ќе ја направат нашата држава похумана, поправедна и поеднаква за сите“, порача Лимани.

Општина Илинден го пушти во употреба новото спортско-рекреативно катче околу „Бучинското Езеро“ во населеното место Бучинци – целосно преуреден туристички локалитет што нуди простор за одмор, спорт, релаксација, рекреација и дружење на отворено.

Овој проект, кој произлегува од предизборната програма на градоначалникот Георгиевски и е дел од Стратешкиот план на Општина Илинден за 2022–2026 година, е целосно реализиран. Просторот околу езерото е партерно уреден и поплочен со нови бекатон плочки, изградени се пешачка патека долга 60 метри, како и платформа за прошетка и одмор. Исто така, тампониран е и пристапен пат од 100 метри. А за љубителите на риболовот е изработена специјална платформа за риболов, велат од Општината.

Местото е осветлено со нови енергетски ефикасни канделабри, поставени се урбани елементи како клупи за одмор и корпи за отпадоци, а централниот летниковец нуди пријатна сенка и простор за дружење и уживање. Сето ова, го прави „Бучинско езеро“ идеален простор за релаксација и рекреација во природните богатства на општина Илинден, се вели во соопштението на Општината.

„Со овој проект на жителите на општина Илинден, но и на сите граѓани од околината, им обезбедивме едно модерно, пристапно и функционално јавно место во кое ќе можат да уживаат и да го поминуваат слободното време. Ова не е само исполнето ветување, туку инвестиција во квалитетот на секојдневието на граѓаните од сите населени места во општина Илинден,“ изјави градоначалникот Георгиевски.

„Бучинско езеро“ е само уште еден од низата проекти што ја рефлектираат заложбата на Општина Илинден за развој, урбанизација и подобар животен стандард. Од сега, жителите на општината имаат ново омилено место за рекреација и уживање, токму во своето место на живеење, се додава во соопштението.