Министерството за внатрешни работи набави пет пловни објекти за езерската полиција, со што значително ги зајакнуваме капацитетите за заштита на границите, особено овде на Охридското Езеро, рече министерот Оливер Спасовски.

„Ова е набавка што се прави првпат по повеќе од 20 години, а е уште еден пример за нашата посветеност комплетно да ја опремиме македонската полиција и да обезбедиме максимални услови за работа на полициските службеници, што носи подобри резултати, односно ја зголемува безбедноста на граѓаните. Во оваа пригода сакам да упатам огромна благодарност до владата на Република Чешка и до Амбасадата на оваа пријателска земја, кои во изминатите години постојано ни помагаат во оваа цел“, рече министерот Спасовски.

Два пловни објекта со цврсто корито се набавени од сопствени средства од буџетот на МВР со вредност од 8.055.511 денари, а во согласност со склучениот договор за донација помеѓу министерствата за внатрешни работи на Македонија и Чешка набавени се два пловни објекта со цврсто корито и еден гумен патролен чамец со вредност од 8.144.074 денари.

„Ова ќе им овозможи висока ефикасност на припадниците на граничната полиција во секакви временски услови како во делот на граничниот надзор и спречување на секаков вид прекуграничен криминал во Охридското и Преспанското Езеро така и во услови кога е потребно да се укаже помош и спасување во водите на езерата од разни причини“, рече Спасовски.