Пратеникот од ВМРО-ДМНЕ Антонио Милошоски на вечерашната собраниска дебата за предлог-законот за решавање на спорот меѓу Владата и „Макпетрол“ АД по пат на спогодба, рече дека ваков случај немало никаде во регионот.

„Вакво нешто не се случило никаде во регионот, никаде нема случај влада да предлага закон во кој субјект е владата од една и приватен стопанственик од друга страна. Закон се носи за општа норма и ако приватен субјект треба да реши проблем има закони кои тоа го регулираат, а ако не може да се најде договор, има судови кои одлучуваат по тоа. Мислам парите ќе се делат по онаа едно евро за црквата, една за Вицето и многу пари за Андреја Јосифовски, телевизија ‘Телма’ и ‘Макпетрол’. И ова се случува во период на криза кога се одбиваат амандмани за да се помогне на граѓани и на правни лица“, рече Милошоски.

Тој додаде дека државниот правобранител и неговите соработници како институција биле под голем притисок во 2019 година и почетокот на 2020 година.

„Имало до оваа институција многу дописи, дури и со заклучок од Влада дека државното правобранителство треба да го прифати овој договор. И покрај сите дописи и ургенции од Влада правобранителството го почитува законот и не подлегнало на притисоци“, рече Милошоски.

Пратеникот преку цитати на државното правобранителство кажа дека се гледа дека имотната штета е констатирана и истата тежи 33 милиони евра.

Претставникот на ВМРО-ДПМНЕ посочи и свое толкување зошто нема вакцина против корона во Македонија, додека има во земјите од регионот.

„Цела година Заев нема писмо напишано до фирмите производители на вакцината, ама има напишано осум писма до државната правобранителство. Заев не му е грижа за вакцините, туку му е гајле за 33 милиони евра. Тоа е зделка од 33 милиони евра која треба да ја делат со ‘Телма’ и ‘Макпетрол’ и знае Заев дека не му е легална, па сака да ја гласаат пратениците од СДСМ и да му ја изгласаат, но истата порано или подоцна ќе падне бидејќи е штетна за имотните интереси на државата и за граѓаните“, кажа Милошоски.