Свет
Бондарев: Присуството на руски мировници во Нагорно-Карабах ќе обезбеди траен мир

Распоредувањето руски мировници во Нагорно-Карабах ќе обезбеди траен мир во регионот, рече шефот на Комитетот за одбрана и безбедност при Советот на Руската Федерација, Виктор Бондарев, во интервју за ТАСС.
„Присуството на руски мировници во Нагорно-Карабах ќе обезбеди мир во регионот на долг рок. Не е првпат Русија да игра клучна улога во решавањето на конфликтите меѓу нашите најблиски соседи. Ние длабоко ги почитуваме двете завојувани страни и им посакуваме среќа и просперитет, кои се невозможни за време на војна“, рече тој.
Според Бондарев, трилатералниот договор постигнат меѓу Русија, Ерменија и Азербејџан стави крај на братоубиствената војна во Нагорно-Карабах и овозможи да се спречи поголемо крвопролевање.
„Азербејџан се согласи на целосен прекин на огнот и распоредување руски мировници на линијата за контакт меѓу азербејџанските и ерменските трупи. Ерменија, од своја страна, направи големи отстапки по должина на безбедносниот појас за да ги спаси животите на жителите на Нагоро -Карабах и за одржување контрола над поголемиот дел од територијата “, нагласи Бондарев.
„Сите имаат корист од крајот на војната во Нагорно-Карабах. Се надеваме дека тоа ќе биде пресвртна точка во текот на долгорочниот ќорсокак и дека ќе го отвори патот за траен мир во регионот. Уверен сум дека руските мировници ќе ги исполнат своите задачи со чест и достоинство“, додаде сенаторот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Милановиќ: Европа лудува, војува, се вооружува

На денешен ден, пред 80 години, Загреб беше ослободен, а по овој повод во загрепската сала „Ватрослав Лисински“ се одржа свечена седница, каде што хрватскиот претседател Зоран Милановиќ рече дека проекцијата на НАТО е Хрватска да инвестира пет проценти од БДП во одбраната, што, како што рече, води кон пропаст.
Милановиќ рече дека Европа полудува, војува, се вооружува, а ниту еден одговорен државник не може и не треба да биде против вооружувањето на својата земја за да се одбрани.
„Без тоа, нема држава. Додека овде зборуваме за славното минато, постојат иницијативи за неколку години да се трошат пет проценти од БДП за вооружување и одбрана“, рече Милановиќ.
Тој објасни дека инвестицијата од пет проценти од БДП е за одбрана на иницијативите на НАТО за следниот самит, кој ќе се одржи за еден месец.
„Јавноста мора да знае за ова. Ова не се воени тајни, ова се политички факти – дека пет проценти од БДП се трошат за вооружување, за одбрана“, рече Милановиќ.
Тој додаде дека во моментов Хрватска троши една милијарда и четиристотини милиони долари за одбрана, а дека според проекцијата на НАТО треба да се потрошат пет милијарди долари.
„Ова значи дека Европа ќе биде натоварена со оружје. Од кого, каде и како ќе се купува и што ќе можеме да добиеме со таа количина? Ова се теми за размислување бидејќи тоа води кон неповратност и пропаст. На овој начин, нема да изградиме среќна Европа, нема да има мир и соработка меѓу народите, нема да го има сето она поради што е Европа основана, која е сепак голем и успешен мировен проект во кој либералните демократии, со сите свои недостатоци, соработуваат и не војуваат“, рече Милановиќ, објави загрепски „Јутарњи лист“.
Свет
САД и Велика Британија постигнаа трговски договор

Американскиот претседател Доналд Трамп објави на својата социјална мрежа „Тру соушал“ и потврди дека Соединетите Американски Држави и Обединетото Кралство постигнале трговски договор.
„Договорот со Обединетото Кралство е целосен и сеопфатен и ќе ги зајакне односите меѓу Соединетите Американски Држави и Обединетото Кралство уште многу години. Поради нашата долга историја и сојузништвото, голема чест е што Обединетото Кралство е наша прва објава. Набргу ќе следуваат и многу други договори, кои се во сериозна фаза на преговори“, напиша тој.
Само неколку минути подоцна американскиот претседател објави дека доаѓа златната доба на Америка.
„Њујорк тајмс“ претходно објави за договорот, што го потврдија три извори запознаени со плановите. Тоа го потврдија и извори за Би-би-си и „Скај њуз“.
Според „Скај њуз“, британската влада е подготвена да направи одредени отстапки при увозот на храна и земјоделски производи од Соединетите Американски Држави во замена за олеснување на извозните давачки за автомобилската индустрија.
Иако деталите сè уште не се познати, нивниот дописник Пол Келсо наведува дека договорот може да зависи од волјата на Британија да направи отстапки за трговските царини.
Меѓутоа, проблемот е што ОК, всушност, нема многу царини за американските стоки – трговијата меѓу двете земји е прилично балансирана, со сличен обем на извоз и увоз.
Претходно денес, британскиот премиер сер Кир Стармер одржа говор по повод Денот на победата во Европа, фокусиран на темите за војната и одбраната, но накратко се осврна и на клучната економска тема на денот – трговскиот договор со Соединетите Американски Држави.
„Како што знаете, преговорите со САД се во тек. Ќе слушнете повеќе за тоа од мене подоцна денес“, рече Стармер.
„Нема сомнеж – секогаш ќе постапувам во националниот интерес, за доброто на работниците, претприемачите и семејствата, за да гарантирам безбедност и обнова за нашата земја“, додаде тој.
Во продолжението на говорот тој се осврна на одбранбената политика и најави дека одбранбената индустрија ќе биде клучен дел од економскиот раст и развој под неговата влада.
Свет
Колку плаќаат Русите за Денот на победата: Москва блокирана, таксито двојно поскапо

Парадата на победата во Москва, која се одржува секоја година на 9 мај на Црвениот плоштад, е еден од најважните државни собири во Русија.
Иако официјалните податоци за трошоците за парадата не се секогаш јавно достапни, одредени извори даваат увид во обемот и во трошоците за организирање на овој настан.
Илјадници војници, стотици воена опрема
Парадата вклучува поминување на повеќе од 9.000 војници, 110 парчиња тешка воена опрема, 70 авиони и хеликоптери, придружувани од воен оркестар од 1.100 музичари. Подготовките за парадата вклучуваат речиси два месеца обука на единицата во Алабин, 50 километри југозападно од Москва, каде што се наоѓа реплика на Црвениот плоштад.
Исто така, потребно е да се извршат поправки на тротоарите на Црвениот плоштад и околните области, како и да се подготват патиштата за пристигнување воени возила. Покрај тоа, градските работници беа ангажирани за чистење на големите советски симболи, како што се црвената и златната ѕвезда, објави веб-страницата на Џејмс Таун.
Трошоци за парадата
Според достапните податоци, трошоците за организирање на парадата во 2025 година се проценуваат на речиси 205 милиони рубли (приближно 6,3 милиони американски долари). Оваа сума опфаќа разни аспекти на организацијата, вклучувајќи подготовки, логистика и поправки на инфраструктурата. За споредба, трошоците за парадата во 2019 година надминаа 450 милиони рубли, според веб-страницата на „Статиста“.
Од економски ефект, според написите во странските медиуми, парадата може да влијае и на целокупната економија поради дополнителните неработни денови, затворање на сообраќајот во центарот на Москва, можните трошоци за безбедност. Проблеми со мобилната врска за време на парадата. Цените на такси-услугите во Москва нагло се зголемија поради недостиг на бесплатни возила, како што објави агенцијата „РИА новости“. Оваа ситуација беше дополнително влошена од проблемите со мобилната врска и интернетот, што создаде дополнителни тешкотии во функционирањето на такси-услугата.
Операторите, банките и онлајн-услугите веќе се информирани дека може да има тешкотии со поврзувањето, па затоа експертите препорачуваат користење на вај-фај мрежи во тие денови.
Претходно, беше објавено и дека на 7 и 9 мај ќе бидат воведени привремени ограничувања во работењето на услугите за изнајмување, како што се електрични скутери, велосипеди, споделување автомобили и такси. Како што објасни заменик-градоначалникот на Москва, Максим Ликсутов, овие мерки се поврзани со подготовките и со одржувањето на настаните по повод 80-годишнината од победата во Втората светска војна.
Според написите, парадата на победата во Москва е значаен настан што бара значителни инвестиции во подготовка и организација. Иако трошоците може да изгледаат високи, тие ги одразуваат обемот и значењето на овој настан за Русија, што е многу значајно.